蔡卓妍（阿Sa）熱愛陽光與海灘，前日她去了玩wakesurfing（無繩滑水），但不慎出意外，撞傷左眼眉尾對上位置需入院縫針，阿Sa更表示連醫生都不知縫了幾多針，頗為嚇人。雖然阿Sa自言有機會破相留疤，但她仍然樂觀面對，笑言疤痕可以令自己面孔更有個性，阿Sa說：「可以加character囉，刀疤Sa，哈哈！」
蔡卓妍（阿Sa）平日不用開工的日子，都會抽空出海遊玩，不時跟麻雀館太子爺男友石恆聰去泰國、印度同陽光玩遊戲。前日阿Sa去了玩wakesurfing（無繩滑水），這次是她第二次試玩，但一不小心就出意外。阿Sa在Ig留言說：「第二次wakesurfing，終於滑到超過兩秒，不過之後就……見紅。」阿Sa更hashtag了一大堆說話來鼓勵自己，充滿正能量：「#慶祝入行18年#見紅#好嘢係咪即係繼續#大紫大紅#其實每樣運動都一定有唔同程度嘅危險#惟有玩得小心啲囉#仲有所有fans嘅祝福#我都收到晒#多謝你哋」。
| | |
自嘲刀疤Sa
意外發生後，她在Ig上載受傷相片，清楚可見她的左眼眉尾對上位置有一道頗深傷痕。由於傷痕十分紅腫，不少粉絲留言，紛紛表示傷口很深，因而大感心痛。阿Sa昨日接受《蘋果》訪問時表示：「落水嘅時候，其實個人同塊板都分開咗㗎喇，不過咁啱有個浪沖番塊板過嚟，撞到個頭囉，即晚搵咗醫生縫咗針，唔知縫咗幾多針，因為縫咗幾層有好多針，醫生話佢都冇數，同埋打咗破傷風針。」
既然縫了這麼多針，阿Sa會否擔心因而留疤破相？阿Sa大笑說：「破咗哈哈哈！」不過女生始終愛美，難道阿Sa真的不擔心留有疤痕？阿Sa搞笑地說：「可以加character囉，刀疤Sa，哈哈！」藝人靠樣搵食，阿Sa雖然俏臉受傷，但她表示在工作上影響不大：「𠵱家要黐住膠布，好彩嚟緊套戲做警察，有傷口都好合理嘅，不過好似都要改少少劇本，覺得唔係咁好意思。」
冇驚過照玩
問阿Sa以後還敢不敢玩無繩滑水？她勇字當頭說：「玩呀！啱啱先可以企喺個浪度滑，都仲未甩繩。或者之後帶打拳嗰啲頭盔囉，哈哈！不過𠵱家唔浸得水，要等個傷口好番，都可能要下一個夏天先玩得。」阿Sa男友石恆聰出名細心，似乎他都要諗諗計，好好照顧這位粗心大意的女友！不過，阿Sa似乎又不用太緊張這個傷痕。
《蘋果》昨日向皮膚科醫生史泰祖查詢，他表示：「面部由於血管多，所以面部皮膚充血能力較強，復原能力較好，所以一般面部傷口留下疤痕嘅機會較低。」似乎阿Sa應該都做不成「刀疤Sa」。
採訪：皓騫、沈麗珠
【潮流解讀】無繩滑水花式多
今次阿Sa玩無繩滑水（wakesurfing）出事，其實無繩滑水利用快艇製造浪花，開始時玩家尾隨快艇，然後利用繩扯起身體企在滑水板上，穩定後可放開繩，利用身體控制左右活動和加減速。Wakeboard（滑水）跟無繩滑水類似，但需要穿上與wakeboard相連的鞋，而玩的時候亦要握住繩子，故對體力要求較高，但比較易上手。不過由於不用拖繩，無繩滑水玩到的花式亦較wakeboard為多。
|
鍾意就快D Share啦！
|
|
|