袁文傑六九年出世，五十歲。
「有啲網上資料話我七二年，有啲仲話我七八、七九年添，其實都似o架，哈哈哈。」「都似」的意思，是因為他擁有滑溜溜的皮膚。「呢樣嘢都係多得我阿媽，佢仲喺度（在生）嘅時候，最誇張試過一個禮拜煲足七晚湯！」
做演員，外表keep得住是最基本的，但論到要滲出個人性格和獨特性，就必須要看本身的閱歷，畢竟有些角色，不是隨便一個小生就可以駕馭得來。亦因此，袁文傑年前參演《不懂撒嬌的女人》中的「游生」時，演得很純粹。
「我睇完個劇本，就好直接咁去做，冇加添太多自己嘢落去。我覺得呢個角色，係一個經歷過年月日，加埋一種歷練聚落嚟嘅一個產品。就算十幾年前——我嗰陣都唔係細——你俾我做一個咁嘅角色，我都拿捏唔到。」
是的，單看他這十年間事業上的際遇，已經夠豐富了：一一年離開效力了十五年的亞視，繼而加盟過Now TV、有線電視，又做過網台和電台節目，介紹音樂評論吓足球。「基本上，我幾邊（傳媒機構）都走勻晒，幾圓滿o架！」
經過多年來歲月的沉澱，聽着看着當下他的言談舉止，便會很易明白，何解無綫會找他擔演「游生」，和《多功能老婆》中「邢老闆」的角色。
一七年的「游生」，是他沒有想過會令他人氣大增的角色。「拍嗰陣，我只係諗住，返去TVB第一套戲，盡量做好佢，我冇加添太多嘢。」
坐唔定
袁文傑說，他小時候性格很內向，但同時間卻又很清楚自己坐唔定。「我冇可能朝九晚五坐喺辦公室，我鍾意周圍走。」所以他十多歲出來打暑期工時，都是服務性行業。「賣過衫，又做過酒樓侍應，因為要面對好多人，我先慢慢打番開自己。」
九○年，在中學同學提議下，他報讀了無綫藝訓班，可是翌年畢業後，卻未被取錄。「嗰屆成廿二、三個同學，公司最後只簽得六個。嗰陣嘅我，仲係好內向，個人又好嫩，如果簽咗我，嗰兩年我可能都係渾渾噩噩，然後覺得呢行冇發展就離開咗o架」
簽不到無綫沒打緊，猶幸那個年頭，潮流興卡拉OK，他靚仔又有六呎二吋高，順理成章便當了那些MV的模特兒。「我仲做過吓電影特約o架。」又因為喜歡聽歌，閒時會在灣仔一間唱片舖做售貨員，其中一位熟客仔，就是亞視高層葉家寶。
「有晚我睇電視，見到佢坐喺觀眾席前排，先知佢做電視，我問番佢，佢話：『係呀！你有冇興趣入嚟亞視玩吓呀？』講笑咩？哈哈哈！估唔到幾年之後，我哋再見到面，就已經係同事。」
養了十年的愛貓囝仔，雖然於八月時離開了，但卻教會了他和Jackeline，更包容無私的相處之道。
|
鍾意就快D Share啦！
|
|
|
