2月份的某一天，身在清邁第四度短期出家的洪朝豐，主動致電記者，說要公開他60年來的一個秘密——他是一個同性戀者。
上月「登六」的洪朝豐，結過婚生過仔，也跟香港富婆寶詠琴展開過一段轟天動地的愛情故事，不過過去20多年，洪朝豐性向一直受人猜疑。一直否認是同性戀者的他，日前接受《蘋果》獨家專訪，終於就自己性取向坦然表白。
洪朝豐：「我想公開我性取向，我由原本嘅雙性戀，慢慢演變成而家嘅同性戀者。點解我會喺呢個時候講呢？因為我覺得人都60歲，根據中國曆法，60歲係一個甲子，一切重新開始，我想講嘅目的有兩個：我想60歲開始，活喺光天化日底下，開始我嘅新生命；另一個係我天生抑鬱狂躁症，所以我覺得我生命除咗喜悅自己之外，仲要有益於精神病人，因為我有一個確切嘅經驗同埋體會，我知點樣去幫到人。另外我亦係一個舌癌病人，我覺得我係要幫啲癌症病人，我天生係一個雙性戀者，而家係一個同性戀者，我天生係要幫同性戀或者雙性戀呢個性取向而感到迷惑、唔開心嘅人，呢個就係我想公開我性取向兩個目的。」
甚麼時候發現自己是雙性戀？
「其實細個時都好模糊，我印象中細個對男性係有好感，但我對女性都係有好感。喺愛情上，我係一個遲熟嘅人，我去到16歲都唔識鍾意人。」
洪朝豐先細數他的愛情故事，16歲那年有女同學跟他表白，但自己仍戇居居不知情為何物，到兩年後發現喜歡上那位女同學，終止已經有要好的男友。
「21歲遇到我前妻葉桂好，好被佢吸引，認識冇幾耐我就開始追求佢，我哋好快就一齊住。」同居日子葉桂好意外懷孕，二人決定簽紙結婚，生下獨生子洪葉，但婚姻維持到1988年便結束。
「我同佢婚姻最後一年時間，我開始發覺我鍾意咗個男仔，呢個男仔喺香港管弦樂團做樂手，係個美國人，我同佢當時有啲交往，我想同前妻告白，然後中止呢段婚姻，但喺我未曾開口講之前，我前妻先開口話要同我分手，理由係同我喺呢個婚姻裏邊唔開心，覺得呢個婚姻綁住佢人生發展，同埋我哋咁早有細路仔，佢覺得個仔比較困身。」
前妻可知道丈夫性向轉變？
「佢唔知㗎，到後尾我哋正式分開咗，好多年之後佢開洪葉書店，我幫佢打工，我先正式同佢講。」兒子洪葉其實一早知道父親性向，只是沒有跟母親多講半句。
作為一個丈夫和父親，喜歡上男人，內心可曾好掙扎？
洪朝豐想了好一會：「其實我18歲時有同性嘅性經驗，嗰個係一個英國人，我唔知點解我後生時比較容易吸引外國人......我自己都搞唔清楚。或者我講得清楚少少，18歲發生咗第一次同同性嘅性行為，完咗之後我覺得自己好污糟、好污穢、好恥辱、好羞辱，我覺得我唔應該做呢樣嘢，咁跟住我就唔記得咗呢樣嘢。」
第一次性行為是位英國中年陌生人，洪朝豐清楚記得當日在尖沙嘴等人，對方上前搭訕。
「傾傾吓偈佢邀請我去佢屋企飲杯咖啡，我諗我當時感覺係好奇，去到佢屋企之後，好似好順理成章就發生咗一個性關係。而喺呢個性行為前後，我係鍾意返16歲時喜歡我嘅一個女仔，係呢一件事嘅前後，我鍾意嘅一個女仔係真正嘅感情嚟，去到21歲我識我太太嘅時候，我係全然被佢吸引。」每個細節，洪朝豐都清清楚楚交代。
跟前妻離婚後，洪朝豐跟好幾個外籍男士「交往」，但強調不是拍拖。「我有同一啲外籍人交往，但我冇拍拖，我正式拍拖係一個香港人，係1991年聖誕，佢喺紐約從事電影工作，我第一個男朋友，香港人，我同佢拍拖3個月就分手。第二個男朋友係95年，佢都係香港人，喺台灣工作，係現代舞蹈團總監，我同佢拍咗拖半年；第三個男朋友係1996年，佢係一個內地人，我同佢拍拖12年。」
一起12年？換言之1998年跟寶詠琴拍拖時，仍在跟內地男友交往？
洪朝豐笑說：「係。寶詠琴係知道嘅，一陣先再講。」
他繼續細數戀愛史，2009年跟第四個內地男友拍拖10個月，到2012年跟第五個亦是最後一個馬來西亞華僑男友交往，拍拖5個月便分手。
「我同寶詠琴1998年11月16號第一次見面，但1996年已經同呢個男仔一齊，寶詠琴係完全知道（笑），佢（寶詠琴）係一個好有閱歷嘅女人，喺第一次我哋見面嘅時候，因為我要訪問佢講關於安樂死呢個課題，所以事先做research同佢傾偈，喺金鐘香格里拉酒店，啲陽光透過玻璃射落嚟影到佢好靚，我第一眼已經俾佢吸引咗，原來佢都俾我吸引咗。第二日我哋做訪問，訪問過程大家好投契，我話可唔可以再嚟做多次訪問，佢即場答應，相隔一星期我哋再做訪問，之前我哋又約話再做一次research，呢次佢就約我上佢山頂屋企。嗰晚我好坦白同佢講，我有男朋友，佢話：『我知。』佢嗰時先講話何鴻燊嘅女，當佢搵到愛情嘅時候，面上邊流露嘅笑容就係同我笑容一樣。」
有要好男友仍跟寶詠琴交往，其實是一種背叛，一腳踏兩船。
洪朝豐認同：「係，冇錯，因為開始我同寶詠琴之間關係唔係好明確，我唔敢同我男朋友講，當然喺某一個角度嚟講，我係背叛咗佢，後尾我覺得係時候要同我男朋友講，我男朋友都唔開心，但隔咗一日之後佢同返我講，佢可以接受我有一個女朋友，因為我唔係鍾意咗另一個男仔，同埋佢可以了解我係一個雙性戀者、我對女仔嘅渴求，我內心深處、靈魂深處同肉體上對女仔嘅渴求。」
洪朝豐指寶詠琴很早已經知道他有男朋友，問他女朋友有否跟男朋友見面？
洪朝豐說：「有，我哋有一齊出去玩，我哋有去上海、杭州、蘇州、北京、西安。佢哋兩個都好愛我，佢哋都認同我呢個性取向，認同我係雙性戀者，佢哋覺得同我相愛，除咗成全佢哋之外，亦都成全咗我，因為我係一個雙性戀者。」洪朝豐強調，三個人一起只是遊山玩水吃喝玩樂，就此而已。
究竟何時確定自己由雙性戀變成同性戀？
洪朝豐低下頭想了好一會說：「有一樣嘢我唔怕講，因為呢個係事實，2000年3月，當寶詠琴提出復合，佢話好掛住我，佢話當時天氣好冷，佢驚我凍親，好想攞啲棉被落嚟我舖頭（當年霎東門古董首飾店）畀我，佢話仍然好愛我，好想同我復合，我當下就同佢講：『我哋可以復合，不過我有一個條件，條件就係我唔可以好似以前咁樣同你有正常嘅性關係，佢話：『唔緊要，我哋攬吓錫吓就可以。』我唔知點解我當時咁樣同佢講，但呢個係一個直覺，當時我就係咁樣講，因為我經歷咗幾個月，同佢發生咗咁多咁戲劇性嘅事情，引起咁多香港人關注，我覺得我哋復合，我唔可以同佢有全然放鬆嘅性關係。」
性格上差異，造成洪朝豐與寶詠琴經常為一些生活上小問題發生拗撬，復合年半，二人2001年8月在紐約旅行期間再次分手。
「我喺酒店出嚟（紐約），我同自己講，我唔會再搵女朋友㗎喇！因為女仔對於我嚟講太複雜，我handle唔到，由嗰時開始，我正式成為一個全然百分之一百同性戀者。」
洪朝豐抑鬱狂躁症發作期間，內地男友未有來港照顧，直至跟寶詠琴第二度分手後，男友來港相伴，洪朝豐抑鬱狂躁症復發入住精神病房，男友也有來港照顧。
何以跟這位拍拖12年男友分手？
「原因係覺得我背叛咗佢，佢攞返寶詠琴呢樣嘢，覺得我背叛咗佢，喺我哋12年關係裏邊，我有兩次背叛咗佢，所以頭尾有3次背叛咗佢，佢好唔開心，對我完全絕望。」
2013年跟大馬男友分手至今沒再拍拖，洪朝豐表示需要愛情滋潤，自己生理上仍有需要。問如何解決？洪朝豐笑說：「自己幫自己。」
洪朝豐承認自己是一個渴望愛與被愛的人，渴望找真正人生伴侶，跟喜歡的人光明正大拖手行街。
「甚至乎對方想結婚，咪同佢結婚囉！」
採訪：戴彩煥
攝影：郭賢興、周樂恒
攝錄：馮嘉銘、林賓尼
-----------------------------
第三屆最港電影大獎
按此立即投票
-----------------------------
《果GYM》隨身播 健身壹App過！
一按即玩
來源 source: http://hk.entertainment.appledaily.com
|
鍾意就快D Share啦！
|
|
|