【娛樂人物】「蘋果尊訪」系列二
提起鄧兆尊的名字，除了想起轟動一時的鄧家爭產事件外，可能最快勾起印象的，就是他的風流韻事，同時擁有三位女朋友。
鄧兆尊三位女友的生活全部由他照顧，難得的是，三女相處和諧，至少沒有爭風呷醋讓兆尊煩惱。但多女友並非一定是好事，結婚就是一個大難題，你跟哪一個結婚，其餘兩個都不會開心，就算妹妹小艾和弟弟兆榮曾向兆尊催婚，但兆尊卻無成家立室之意，因為不想得罪其中一位女友。
緣份到避唔到
兆尊笑說：「好多人同樣問過我呢個問題，首先我唔可以下下滿足到大家嘅要求，我結唔結婚係我將來生活嘅事。香港嘅一夫一妻制係幾困擾我，兩個人一齊唔係一定要在乎一紙婚書，我見到好多後生嘅結咗，唔夠三、四年就離婚，離婚率係相當高，反而我哋呢啲捱到10年、20年嘅就係另一回事，已經唔係愛情，係感情。佢哋亦唔係話要爭乜嘢名份，我相信佢哋已經唔係追求轟烈愛情嗰種人，反而係想安穩同開心，我哋可以喺埋一齊咁耐係一種機緣。」
兆尊與拍拖三年的「阿三」Claire分手，直言多女友並非好事，還說：「好忙㗎，嗰啲煩係比普通人大幾倍。」既然覺得女人煩，兆尊為何甩了一個，又去交回一個？他說：「當你年紀大咗，你會發現有緣份來到，啲嘢係好落力去避都避唔到。好似你哋幫我宣傳有咁多錢（傳祥嫂留下15億遺產），啲狂蜂浪蝶衝晒埋嚟，有好多同我好耐冇聯絡嘅女仔，突然換晒頭像相打嚟搵我，我覺得好奇怪，總之唔好搵我，三個已經好夠，冇可能再有第四或第五個。」兆尊揚言對女友的要求好簡單：「就係人品要好，樣貌係次要，最重要個人係好係純嘅，如果人唔好，我畀你幾靚都好，返到去盞日日嗌交。」
堅拒一屋三妻
三女共侍一夫，爭風呷醋是必然，兆尊笑說：「哈哈，話冇就呃你嘅！不過有時佢哋會同我一齊出嚟食飯、行街，因為好簡單，當佢哋有一個共同敵人，即係我，佢哋就會好合拍。好似過時過節，各人想買一份禮物，咁敵人係我，想嚟鋸我條頸，咪去俾佢哋鋸囉！」三位女友都是住在灣仔區，方便兆尊出入，但他卻沒想過一屋三妻：「我爸好早講過，呢樣嘢只有劉克宣做得到，呢樣嘢就唔好博我媽生前都講過，要買間有三層高嘅屋畀我同三個女朋友住，我就同我媽講：『收樓時，記住將啲刀刀碗碗收埋晒，仲要小心會火燭！』我覺得盡量留啲空間畀大家，個人有個人嘅生活方式，如果連中間屋過屋嘅路程位都冇埋會好慘，因為中間嗰個路程我可以好自由，做乜都得。」
撰文：鍾國仁
攝影：沈健程
下回預告：鄧兆尊與弟妹在童年時竟每日捱打，祥嫂更試過以鞋拍打兆榮臉頰！
來源 source: http://hk.entertainment.appledaily.com
|
鍾意就快D Share啦！
|
|
|
