咁…咁快手？
藝人馮盈盈去年12月30日突然自爆與拍拖四年的同居醫生男友分手，見記者時喊晒口講「相處容易同住難」，點知就有消息指佢公布分手之時，同一時間原來已經同無綫藝人兼大隻主播鄭衍峰「起暗湧」，更有指佢哋原來已經暗撻3個月！
消息指去年11月，馮盈盈飛溫哥華拍攝《後生仔傾吓偈》特輯時，與全組人跟加拿大長中嘅鄭衍峰周圍去而變得熟稔，一路去到除夕時，即馮盈盈宣布分手翌日更疑似一齊過。而今個月，馮盈盈喺自己主持嘅節目《#後生仔傾吓偈》安排8位小鮮肉玩Speed dating環節，當中就有指佢親自點名提議監製請鄭衍峰做其中一位猛男，疑似公器私用。
節目中二人黐到實，又有多次身體接觸，好似公主抱、托美腿、隔口罩餵蝦條等，借「鏡頭需要」公然Sweet Sweet，馮盈盈又即場漏口風指鄭衍峰知道佢喜歡周星馳，將電影對白重新包裝成為節目中嘅示愛內容！對於二人緋聞，鄭衍峰口窒窒唔敢認，更叫大家畀少少時間佢，等佢了解吓。
來源 source: http://hk.on.cc
|
鍾意就快D Share啦！
|
|
|