面對疫境真係好頭痛~
早前於《法證先鋒IV》中有亮眼表現被捧為新一代無綫「咪神」的胡美貽（Nicole），年前踩過界搞榴槤生意，還連開三間分店，雖然期間遇上社會運動，但仍無損一班榴槤粉絲的喜愛，令其逆市中也沒有蝕本，沒料突然來個新冠肺炎病毒，疫情更愈見嚴重，再加上政府實行「限聚令」，禁止四人以上聚會，再加上冇人敢出街，頓時令Nicole生意大受打擊。
其實早於疫情初期，Nicole已將尖沙咀舖位的樓上堂食區關閉，只餘下底層做外賣，同時削減一半人手。她說：「最大支出係尖沙咀，因為地方大，舖租亦相應提高，依家又冇遊客，主要做附近街坊生意，生意跌咗幾多成，真係唔想提，總之好心傷。」至於天后與元朗店一早預了做外賣，店舖租金不算太貴，但冇生意一樣唔掂。
為減省開支，她親自落場幫忙分擔職員工作。不過，即使左慳右慳，再掏出自己的積蓄，也只能捱幾個月，大抵疫情未見曙光，她十分擔心生意前景，但又不敢向遠在美國的父母訴苦，搞到食唔安坐唔樂，一日只食得一餐，結果短時間內令體重急跌17磅，不但如此，就連生理周期也搞到亂晒龍，再加上情緒起伏，據知她一度要看心理醫生，認真我見猶憐！
日前Nicole單拖到位於天后的榴槤舖打躉，坐足成粒鐘的她眼見零客人，即戴上膠手套搬貨，又到凍櫃整理榴槤及手調珍珠奶茶，及後拿起消毒噴霧在舖內起勢四圍抹，期間既擒高又踎低。
對於生意大減，Nicole表現無奈：「都冇計，呢個疫情之下一定差，頂得就頂（瘦咗咁多？）因為冇乜工開，生意又咁樣都真係擔心，生理期我不嬲唔準，呢排就更加亂！（睇心理醫生？）都係去諮詢一下，醫生都叫我放鬆心情，唔好諗咁多，媽咪本身係中醫，都有睇住我嘅情況。（有冇叫父母喺生意上幫手？）佢哋當初畀完第一筆錢我做生意之後，已經講明有咩事都唔會出手，所以我冇同佢哋講，之前父母係有叫我返美國住吓，但依家嗰邊疫情咁勁，都唔知點，最後覺得留喺香港安全啲！希望疫情快啲過，所有嘢回復番以前咁。」
來源 source: http://hk.on.cc
|
鍾意就快D Share啦！
|
|
|
