張家輝的餅印女張童高咗唔少，就嚟同阿媽關詠荷平排。14歲的她正值青春期，除身理變化大，心理可能亦有啲改變，例如典型的想擺脫父母監管，事關以往同關詠荷出街會糖黐豆搭晒膊的張童，變得只顧低頭撳電話，同阿媽無兩句，連關詠荷伸手抆一抆個女衫尾，都立即被撥開手。
大台劇《陀槍師姐2020》拍攝中，相距1998年播映的第一輯22年，而有份參與的舊班底，只剩下滕麗名、朱咪咪及李成昌。「娥姐呢？」仍有不少觀眾記得關詠荷飾演的娥姐一角，但她沒復出參與新一輯拍攝，如常人盯人式湊女。
與其話湊女，不如話個女勉強陪阿媽出街買嘢多啲，因為呢日係師奶級行程，首站去買中成藥保健品，張童悶到坐埋一二邊等；然後轉戰家電店舖，關詠荷睇完多士爐再揀電動牙刷，連行幾間格埋價都無幫襯，睇張童叉住腰挨落貨架個款就知佢行到頹晒；最後超市買埋餸，關詠荷專攻火鍋牛肉，似乎準備打邊爐，但張童一直背着手跟喺阿媽身後，堅係悶到玩手指。
張童全程陪行陪買，悶到有啲不耐煩神情都正常。不過，一啲小細節，就睇得出兩母女感情關係根基深厚，例如有𨋢到，張童未等人出𨋢已經心急想入𨋢，但佢未起步就被阿媽抆住衫尾阻止咗，果然係知女莫若母，趷起條尾就知個女想點。唔出奇，張家輝經常開工不在家，兩母女連暑假去旅行有時都係二人世界，稱得上「相依為命」。所以，陪阿媽行街悶還悶，但終於返得屋企嗰刻，張童都轉換心情，拖返實阿媽隻手。
55歲關詠荷淡出幕前多年，專心湊女，等老公張家輝放心拍戲搵錢。而家個女都亭亭玉立開始唔黐身，而關詠荷又唔係虎媽，唔需要監督個女學呢樣學嗰樣，可以考慮下做返啲自己想做嘅事，例如拍返劇？畢竟，佢同歐陽震華、滕麗名呢啲舊拍檔同場現身活動時，曾感慨地說：「好似返咗TVB開廠咁熱鬧，突然有個可以開返部戲嚟拍的想法。」佢仲補充：「如果有好劇本，都會出山拍《陀槍師姐》續集。」
《陀槍師姐》續集堅係有，之但係無關詠荷份，就算大台有邀請，相信老公張家輝未必支持，話晒佢公開講過：「佢拍戲屋企無人理仲得了嘅！梗係我要自私啲唔畀佢拍戲啦。」再加上，關詠荷2013年復出拍《情逆三世緣》都要part住歐陽震華，但keep住每年幫大台拍劇的歐陽震華，一樣無參與新一輯《陀槍師姐》，咁關詠荷都無咩誘因接拍啦。
APP 內 1-Click 訂閱
按此了解更多
-----------------------------
【昔日紙本檔案庫】
30年壹仔經典 壹壹重現！
|
鍾意就快D Share啦！
|
|
|
