育有一對兩歲孖女的熊黛林，今日接受商台節目《一家大晒》訪問，大談湊女經驗。談及她產後能回復以前模特兒身型，她坦言當時很艱難，又想瘦，但由於要餵母乳，又不能食得太清，「前半年唔敢減肥，之後就節制啲，做返啲運動，唔好畀自己太肥。」
熊黛林表示湊兩個小朋友，相比起拍戲辛苦好多，「有時搞唔掂就要發惡，佢哋對住我係受硬唔受軟，要打手手，佢哋就驚，所以全屋都係好人，得我係衰人，試過有一輪，佢哋話『no mummy』，我好傷心，有喊過一、兩次，老公就安慰我，我諗吓唔可以全屋人都縱佢哋。」
主持人問到會否訓練孖女，待長大後做模特兒？熊黛林表示：「我覺得家姐都係模特兒呢行，佢比普通女仔高啲，又鍾意唱歌、跳舞畀你聽，表演慾好強，入到我間房，見到我啲衫、袋就癲架喇，但妹妹特別高，佢似3、4歲嘅小朋友，好鍾意食嘢，又嗲。」熊黛林笑指老公已經開始擔心兩個女兒，「老公話家姐對眼識放電，有試過去playgroup，家姐同鬼仔一齊，拖住手，我話畀老公聽，佢開始滴汗，不過佢管唔到，因為佢唔係送返學，見唔到就算啦。」
周日就是母親節，熊黛林笑言不需要驚喜，「因為我同老公講千祈唔好畀驚喜我，我怕到時驚多過喜，我驚我唔鍾意，兩個女錫我一啖就已經夠。」對於跟孖女最難忘的時光，熊黛林說：「佢哋打歲半嗰枝針，因為枝針好勁，佢哋真係發燒，好彩唔係同一日發，我一路攬住妹妹瞓，一路摸住佢，我個心好痛，好難得退咗少少燒，點知隔一陣又燒返，佢又好辛苦，平時佢哋唔跟我，一病就搵媽咪，嗰下好似心連心，真係好難忘，好心痛，好肉赤。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
