2016年3月10日 星期四

擔完煙再飲酒 吳綺莉放任卓林 [壹週刊 - 1357] __,卓林,吳綺莉,吳卓林,M1,

只得16歲的卓林,在吳綺莉的陪同下試飲威士忌,店員代為影合照。娛樂偵訊擔完煙再飲酒 吳綺莉放任卓林去年吳綺莉爆出涉虐女被捕,16歲卓林唔肯返屋企,要社工調停,雖然最後獲警方撤銷控罪,但她將女兒出走事件歸咎學校老師,並多次踩上門搵校長理論,搞到學校一度要卓林退學。搞出個大頭佛,吳綺莉得好友翁靜晶教路,向學校寫求情信,才保得住學位。事隔一年,兩母女關係大有改善!但記者發現,「教女有方」的吳綺莉,將下午 ...


只得 16歲的卓林,在吳綺莉的陪同下試飲威士忌,店員代為影合照。

娛樂偵訊

擔完煙再飲酒 吳綺莉放任卓林

去年吳綺莉爆出涉虐女被捕, 16歲卓林唔肯返屋企,要社工調停,雖然最後獲警方撤銷控罪,但她將女兒出走事件歸咎學校老師,並多次踩上門搵校長理論,搞到學校一度要卓林退學。搞出個大頭佛,吳綺莉得好友翁靜晶教路,向學校寫求情信,才保得住學位。

事隔一年,兩母女關係大有改善!但記者發現,「教女有方」的吳綺莉,將下午茶當 happy hour,仲要任由個女飲威士忌,繼「擔煙」一役,又一傑作。

開放式易溝通

四十三歲的吳綺莉和現年十六歲的卓林相依為命,要養起頭家,又要做單親媽,經濟壓力下,吳綺莉逐漸養成酗酒習慣,加上女兒正值反叛期,兩母女相處,火星撞地球。

「係人都知佢老豆係成龍,由細到大被人指指點點,令卓林變得好偏執,就算喺學校,亦冇幾個同學啱傾,最弊兩母女都係硬頸嗰隻,好多時一傾唔埋,就企硬唔肯讓步, Elaine(吳綺莉)唔開心就飲酒,有時飲咗酒對個女發脾氣,先搞出上次個大頭佛!」

爆出虐女事件後,為修補和卓林的關係,吳綺莉作出多方面改善和尋求專家意見,尤其積極處理酗酒問題;加上翁靜晶從中幫忙,令母女關係已大大改善。

上月尾,卓林陪埋媽咪去沙田行超市上糧,吳綺莉拎起包急凍蝦問卓林意見,二人有商有量,之後再一齊揀魚生壽司,滿載而歸。

放棄「有你講,無佢講」的教女方法,吳綺莉同卓林以朋友方式相處,反而更了解對方的想法。

卓林一邊嗒威士忌,一邊同吳綺莉開餐吹水,兩母女笑容滿面,關係融洽。

卓林急不及待將飲酒相放上社交網站。

職員拎出黑牌威士忌斟俾卓林,吳綺莉一度皺晒眉,但未有阻止。

揸車唔敢飲酒

不過, open式教女有好有唔好,例如「請卓林食煙」的舉動,便惹來部分人非議;但吳綺莉話之你,繼續我行我素,最新動作,是任由卓林威士忌送 pizza。

話說當日吳綺莉、卓林連同外籍友人,一車人去石澳歎下午茶,一行人目標明確行入一間餐廳,吳綺莉更直入廚房,跟大廚等人打招呼。為方便食煙,吳綺莉選擇坐戶外,坐低同卓林睇餐牌未點餐,先點煙。

過不久, pizza出爐,其時記者見侍應自動自覺斟了半杯威士忌給卓林,吳綺莉不單冇阻止,反而急不及待,拎住自己的凍朱古力與女兒的威士忌影合照。之後卓林攞住杯酒先聞一下酒香,再細嗒一口,然後開始滔滔不絕,同吳綺莉及外籍 auntie分享試酒心得。

卓林飲威士忌三點三,但負責做司機的吳綺莉全程滴酒不沾,好守規矩。

吳綺莉煙癮大,一坐低,未點餐先點煙。

與翁靜晶相識超過廿年,在對方的提議下,吳綺莉寫信向學校求情,卓林先有得留低繼續讀。

擁有車牌多年的吳綺莉,泊車技巧超水皮,要勞煩後面的車退後,才夠位開車走人。

吳綺莉同卓林與友人在石澳下午茶至傍晚六時才離開。

翁靜晶好幫手

去年兩母女水火不容,卓林更兩度離家出走,唔知點收科的吳綺莉先後向謝偉俊及翁靜晶求助。

「 Elaine覺得個女咁細個,離家出走一定唔係自己意思,卓林接觸最多嘅係學校,所以佢認為個女係受老師唆擺,佢成日諗埋一邊,有幾次仲嘈到去學校,又要校長道歉,最慘仲要見晒報,學校方面覺得聲譽受損,雖然後來 Mary姐(翁靜晶)幫手溝通,叫做解決咗件事,但校方怕咗 Elaine,提出叫卓林退學。

「搞到個女幾乎冇書讀, Mary姐勸 Elaine親自寫求情信,同學校交代自己家庭狀況,又應承會檢討改善,校方先放佢一馬,俾卓林留低繼續讀。」

關係重回正軌,早前同卓林到沙田行超市,吳綺莉態度寬容,買乜都有商有量。

卓林只得 16歲,但已有媽咪咁高。

母女冰釋前嫌後,卓林上吳綺莉的節目接受訪問,手上有明顯的𠝹手傷痕。《蘋果日報》圖片

開始學識體諒

有相識超過二十年的翁靜晶幫忙緩衝,加上吳綺莉母親去年十月過身,卓林開始嘗試體諒媽咪。

「經過卓林件事, Elaine成日都會帶埋個女去 Mary姐屋企, Mary姐自己都有兩個女,係過來人,佢講嘢 Elaine會接受。

「而家兩母女溝通多咗,有啲嘢可能卓林唔應該做,但又好奇想試,以前 Elaine會墩起個阿媽款,乜都話唔俾,而家佢會彈性處理,如果唔係太過分,都會俾個女試吓。因為你愈阻止佢,反叛期嘅卓林就會更抗拒,俾佢試吓,知道原來煙係咁臭,酒係咁辣,反而更好。」知情者說。

積極同卓林破冰的吳綺莉,幫囡囡擔煙相曝光後,外界嘩然!

05年,陪吳綺莉到上海醫院求診的吳母鄭黎明,於去年 10月離世。《 Face》圖片

同成龍分手後, 12年吳綺莉同立法會議員石禮謙有過一段短暫情。《蘋果日報》圖片

爆出虐女案後,卓林一度由社工安排,離家暫住,但如常返學。

搞出個大頭佛後,卓林拒見,傳媒又不停追訪,當時的吳綺莉徬徨無助。

虐女事件

多年來一直母兼父職的吳綺莉,去年傳出對十六歲卓林動粗,事後女兒兩度離家出走,母女關係一度僵持不下。

11/3 虐女被捕

卓林向學校投訴被母親虐打,並搬到契媽家暫住;校方一度報警,吳綺莉被捕並在其大埔寓所搜獲小量疑似大麻。

14/3 送院留醫

有傳卓林送院檢查,並在大埔那打素醫院留醫,但吳綺莉否認,聲稱女兒只係唔舒服入院。

7/4 和好回家

母女冰釋前嫌,卓林搬返大埔寓所。

22/4 再度出走

有傳吳綺莉唔俾女兒買啤酒飲及阻止她見生父,兩母女再起爭執,卓林再一次向學校投訴,並再度離家出走。

28/4 匿埋學校

卓林匿埋學校拒絕回家,吳綺莉在翁靜晶陪同下到學校了解,卓林則交由社工照顧。

14/5 勸退學

吳綺莉三番四次到學校理論,雙方一度無法達成共識,當時有指校方為免事件再度失控,要求卓林學期完結後轉校。

21/6 銷案

卓林去完瑞士遊學後,終於下咗啖氣肯原諒媽咪搬返屋企,同時吳綺莉收到警方正式通知,無條件銷案。

愧對女兒

成龍跟吳綺莉搞婚外情,其後女方懷有龍種, 99年,小龍女出生前 9天,成龍召開記者會交代事件,直言自己犯下天下男人都會犯的錯。小龍女出世後,成龍幾乎與兩母女劃清界線;直至去年爆出虐女事件,才一反常態,自稱愧對女兒,主動關心,又在公開場合承認自己身份影響女兒成長,甚至不排除父女日後有機會見面。

但另一邊廂,「小龍女」則透露從未見過生父,未嘗父愛,更因「小龍女」之名,受盡同學欺凌。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...