豪語錄
嘥 黃又南
黃又南說：「是時候投入拍戲。」數是這樣計的——十六歲出道，懵懵懂懂；中期花了六年清還六百八十九萬（真邪門）父債，根本分心，現在才重新開始。
一臉稚氣已飽歷滄桑，如同組合 Shine被稱為「嘥」。
戲謔很有趣，切膚之痛便不好玩了。
但嘥，文藝腔叫惋惜，至少還有感覺。
「人愈大，日子過得愈來愈快，年輕時的愛恨都談不上，每天就是工作，累了就睡，睡醒又工作，沒變化，只剩下麻木。」
卅二歲，他說醒起工作佔據一半人生；其實諗多咗，往後，比例一定更大。
所謂世故、成熟，不外如此。
真車迷
黃又南拍嘢拗柴，這天仍拖着腿駕駛心愛的 Audi來。
首先解釋吓拍嘢，現市道已不限於正規影劇，正如拍檔徐天佑搞微電影甚至自任 producer；黃又南今次是幫幫龍虎武師朋友，行多步。
其次想說，黃又南真的很愛車，久不久便被狗仔隊捕獲在銅鑼灣同一間車房洗車、吹水打躉，到一個地步，要向經理人報備。「自己都唔好意思，好似無所事事咁，我的生活除了工作就係咁簡單。
「我一星期洗四次，以前爸爸印刷生意還順景時，我便說過：『將來不會繼承父業，我志願做職業賽車手。』」
男人車迷分兩種定義。落手落腳、鑽研技術固然值得尊重；但另一種愛——密密換新車，才直頭令人艷羨。黃又南顯然只屬於前者。
「入行以來，買過兩部，第一部 Civic，第二部就是 Audi，一揸十幾年。朋友話：『新車冇得頂，舊車冇得整。』我卻保養得好好，像親人一樣。」
出車那年，適逢沙士經濟低迷，黃父被走數幾百萬，黃又南諗了一晚，第二天簽名為擔保人，着爸爸申請破產，父債子還。
「人家怪我屋企搞成咁仲揸 Audi，我不提及拿了去加按，當時還『新車冇得頂』嘛；人家亦唔知我根本好少揸，因為冇錢入油，我改搭地鐵，有時開短途接媽媽收工（全家動員還債）郁郁機件，媽媽硬塞三百蚊俾我入油。
「它陪我走過很多路，十幾年，我當養貓，會養到它終老。」
少眼淚
黃父轉職路政署外判鋸樹工人，可能算因果，豈非說印刷業過度砍伐嗎？「後來他做七人車司機。外界不知情，話黃又南賭波欠下巨款，我無奈解釋一次，怕爸爸睇到報導，卻在七人車的太陽擋發現夾着那份報紙……
「爸爸比我承受更大壓力，背負連累兒子罪名；冇得計，在他搞生意養活全家時，兒子會不會問：『老豆，點解你要咁搏？』
「為慳錢，全家搬進我西灣河寓所，我開始嘗試動作片，多條出路，最怕撞傷碰瘀返屋企被見到。」
明星賽車也是財路呀？
「朋友有路數介紹我去日本受訓做職業賽車手，年紀上，是最後一次機會。我們先去澳門練了一百個圈，攰到手震震離場，很 high，我知道終於不屬於這裡，正如去旅行最開心時醒覺並非家鄉。賽車是，以為自己快啫，畢竟贏才有獎金；娛樂圈卻容許我不考第一，也長做長有嘅。
「拍完《花花刑警》滿身傷，搭𨋢去影樓影海報終於忍唔住，但也只限一瞬間，𨋢門打開便流完眼淚。」
鬥圈速
上期《豪語錄》訪問徐天佑，徐天佑只輕描淡寫說 Shine長大後少了共同話題，真相其實深刻得多。
「有些數來自財務公司，知我幾時出 show就打電話來，天佑可能聽到我答：『有冇試過唔還吖。』會拍拍我膊頭，然後一齊上台笑晒嗌：『大家好，我哋係 Shine！』那份支持不用口講。天佑告訴你話題少了，是保護我。
「但的確彼此的路愈來愈不同。」
○七年分飛以後，徐天佑創作小說和音樂，黃又南則狂接電影。「他慢慢追尋完美，經理人也是有要求的，只對我說：『明白你的情況，你盡量做好吧。』我用了六年還清債務，我是賽車手思維，覺得圈速仲可以快啲——當然唔希望有下次，但正因為商業電影很多局限，鞭策着我下次更好。」
去年徐天佑結婚，黃又南做戥穿石。
「一早諗住成家立室，沒料到天佑快過我。發生那件事，解決了，女朋友還是分手。既然有計劃都搞成咁，我一定要令另一半不用工作，才敢講結婚生仔。」
唔怕輸
無債一身輕，吸取教訓，與朋友合作出太陽眼鏡。「標榜我的設計，總賣得一兩千蚊吧，但還是賣三百九十八，採用寶麗萊鏡片，寧願做起咗先。」
又如一三年 Shine重聚演唱會，主辦單位提出添食，二子一致推辭。「人家奇怪兩條友唔等錢使咩，等㗎！尤其我才剛斷窮根，一句到尾，想賺錢，更要睇長線，無謂重複呃觀眾，等明年做到新歌吧。」
那次竟成為集體回憶，黃又南說，其實無關他個人的際遇與復出。「是社會轉差得愈來愈快，後生仔提早懷念十年前的好日子。」十年前適逢沙士，怎算好日子？「以為很差，原來可以更差，當年起碼我們戰勝過，還有第一次七一大遊行，創造過改變。」
即將的舞台劇，仍演學生，黃又南笑了，對，點解仲係佢？年紀上也剛巧相差十年。有得解的，勵志劇不外講年輕人挫折與奮鬥。「母校邀請我回去講 talk，我問老師師弟們有什麼不同，老師說：『就是怕輸。』」
怕輸，便沒戲唱了。
後記
上期拍過徐天佑搖玩具木馬；今期順理成章來了這張。
天佑是跨着木馬的王子，又南是開着舊車的戰士。
戰士生活要簡樸，在那相熟車房附近，黃又南甚至被捕獲帶現任女友去燒烤。
「那次我剛離開，一睇手機已出現黃又南燒烤的動新聞，快到咁。」
係囉，快到咁。紙媒印刷真敵不過網上洪流，黃父的生意，只不過提早而已……
撰文：余家強
攝影：黃志明
攝錄：葉志明
協力：鄧凱珊
形象指導：蘇韻詩
化妝： Henry Tse@Big C Styling
髮型： Louis Tse@POP Eight
場地提供：小時光
|
鍾意就快D Share啦！
|
|
|
