同張達倫等埋位，胡定欣有助手傍實，生人勿近。
探熱針
好心波比被圍 胡定欣冇義氣運路走
二線變視后的胡定欣，為了服眾，往後開工又準時態度又好，仲經常萬歲收買人心。但忍得一時，劇集未殺科，已經開始現形。
上個禮拜，新劇《一屋老友記》拉隊在廟街附近拍外景，惹來過百人圍觀，有份落場的視后搵助手擋駕，謝絕應酬 fans合照，反而歐陽波比因為留低陪住一齊開工的前輩羅蘭、胡楓，全程被圍住硬做人肉布景板，忙過開工！
驚胡楓俾人撞到
上週五（二月二十六日），《一屋老友記》在廟街附近的橫街開工，水車、大光燈，加上工作人員四圍灑水，劇組到場不夠十五分鐘，已經惹來半百途人圍觀。
男主角歐陽波比雖然多人識，但論知名度，還不及羅蘭姐跨地域，圍觀的人群中，提起羅蘭姐的聲音最多。「 This lady from the films.」「唏！佢係龍婆，拍緊鬼片？」
波比、胡楓同羅蘭姐都十分專業，個多小時已經拍完一個場口，眼見現場愈來愈多人圍觀，轉位拍下一場戲時，波比一直刻意留守在兩位前輩身邊，以防萬一！波比有心，卻惹來途人不斷擁上前要求合照，情況完全失控。
「開夜仲多人圍過日頭，大家顧住做嘢，都擔心修哥同羅蘭姐會俾人撞到，其實波比大可以返上自己架車等，但佢專登留喺度，睇住兩個老人家，真係唔話得！」一名劇組人員說。
視后帶助手跟場
拍外景兩個多小時，波比除了埋位，就是影合照，有時還要幫修哥、羅蘭姐做埋攝影師，忙到呢！
至於視后胡定欣，一早同好友胡杏兒睇齊，請來助手跟場，做先頭部隊視察環境，令胡定欣可以成功繞路，避開圍觀途人，匿埋工作人員堆中的她，就算遇到途人隔住欄杆嗌合照，助手亦會立即擋駕，連記者影相，見視后面露不悅，醒目助手立即配合，揮手嗌停，更第一時間通知工作人員幫拖，趕！
之後胡定欣同 Bobby拍雨中相遇戲，見圍觀的人愈來愈多，波比被纏住合照，胡定欣立即電兔上身避走，沿途有人嗌影相視后亦充耳不聞，話之你！
羅蘭姐好腳骨
至於已年屆八十一歲的羅蘭姐，捱更抵夜完全冇放蚊。事隔幾日，繼續開夜班，接近凌晨時分，羅蘭姐踩上唐六樓開工，見到記者又精神打招呼，然後一口氣行上天台，勁！
當晚羅蘭姐一身龍婆 look，半天飛等動作場面由替身代勞，凌晨時分人多聲響，加埋大光燈𥋇住，劇組答應盡快搞掂，總算和氣收場。
人緣差
人緣一向麻麻的胡定欣，近年受無綫力捧，去年更砌低強手汪阿姐奪視后，惹來一眾花旦不滿。
杯葛王君馨
08年拍攝《舞動奇跡》時，因對手王君馨跳舞出色搶盡風頭，得罪胡定欣；之後二人再合作《公公出宮》，胡定欣又不滿對方過分進取，於是與另一女主角林夏薇聯手排斥王君馨，出席公開活動時，刻意冷落對方。
撰文、攝影、攝錄：娛樂組
|
鍾意就快D Share啦！
|
|
|
