呂志和八十年代到美國加州發展酒店業，有「酒店大王」之稱。○六年，理大以呂志和酒店及旅遊資源中心命名。右起：細女呂慧玲，長媳、長子呂耀東；左起：呂志和五妹、細仔呂耀華太太及長女呂慧愉。《蘋果日報》圖片
中環人語
呂志和私人錢包自己睇
富豪聚財的袋一般並非放在上市旗艦，反而係家族的私人錢包，四叔李兆基有「兆基財經」，鄭裕彤有其周大福，因賭業而發圍的嘉華集團主席呂志和，○七年都搞番個家族私人錢包「呂志和管理有限公司」，英文 LCW Management Ltd。
呢間公司結構簡單，由一間在英屬處女島註冊的 CWL Asset（ PTC）全資擁有，此公司亦是銀河娛樂（ 27）、嘉華國際（ 173）主要股東，持有資產以數百億元計，「和哥」最在意亦是這間公司，以高薪在外資行挖走不少投資精英，但通常都做得唔係好長，事關「和哥」請班外援返來都係吸收吓外邊最新投資情報，班投行精英每日向「和哥」匯報，但公司內都大多是呂氏親屬，投資決策都唔輪到班投行精英話事，又點會有癮。不過「和哥」呢個私人錢包公司，除咗自己，唯一董事就是來自英國的唐家達，呢位老外在呂志和轉型做賭業擔當重要角色，伴隨「和哥」十幾年，○七年才辭任銀娛行政總裁告老歸田，依然獲「和哥」重用作為家族公司董事。又係嘅，在《呂志和傳》內提到對子女的財富分配，「我不會講我的分配，不然可能我未走，他們已經吵架了，這是很難處理的。」莫非搵個律師出身的唐家達先鎮得住個場？
中環寸嘴：做嘢唔好咁揚，但要威！
工廈大王楊耀松長子，游走高級酒店、銀行，及知名食肆，與各路人士打交道，自認有 jet set生活方式，透過美酒佳餚，察看人生百態，把「生平絕學」不吐不快與粉絲分享。
上海迪士尼開幕，競爭激烈，香港迪士尼啲酒店房就賣大包，我 check過，仲平過馬來西亞 Legoland添呀，香港旅發局真係要加把勁，林建岳做旅發局主席，唔好話求其喺外國登吓個廣告，搞個記者會，去法國搵個菠蘿包送紅酒，喺唐人街舞獅大鑼大鼓入場，就當係 promote香港？
我去新加坡睇到，香港迪士尼都親自派隊人去參加龍舟比賽，美國迪士尼七月尾又派人去加拿大放煙花，旅遊業梗係要曲線推廣。
好似溫哥華年年夏天都有 Celebration of Light放煙花，趁住暑假淡季咪去谷吓旅遊業，如果唔係冇人去溫哥華，今年冠名贊助搵咗 Honda，李澤鉅個大學同學 Terry Hui間 Concord Pacific都有贊助，想當年係加拿大滙豐做贊助㗎，家陣都好難搵到銀行去贊助。當年我都自認身價不菲被力捧，加拿大滙豐攞五十萬加紙做贊助商放煙花，由我嚟擔任贊助商代表，替滙豐做評判，睇吓邊隊放煙花放得靚，有人問滙豐高層呢位小子何德何能，滙豐咁撐我，唓，你多啲幫襯，下年咪考慮俾你做咯。同我喺嘉慧園做過鄰居嘅九叔，個仔羅守耀監製嗰套戲《以和為貴》，陳惠敏喺套戲入面交帶啲細嘅「做嘢唔好咁揚，但係要威」，即係做嘢要慳慳哋，但係又要有 fly colours！
日圓賭上八算
英國公投是否脫歐，令外匯波動，炒家有藉口在短時間搵食，日圓更加成為炒家熱炒對象，金融大小鱷都傾巢而出，賭日圓升上八算，街外盤口更是八、二之比，謂揸住日圓搏升值之餘，仲可以用嚟買日債避險，呢個世代，冇咁屎嘅屎就係好屎！
親戚唔夠銀紙親
由李氏家族控制的東亞銀行，主席李國寶連同兩個仔李民橋和李民斌三仔爺，三雙手去年攞走四千五百萬人工，股息又派少咗兩成，咁搞法，親戚都唔及銀紙親，李國寶個堂細佬李國仕索性掟貨，五月至今第八次沽東亞套現六千多萬，李國仕都係投資銀行界人士，睇實幾隻歐洲和英國的對沖基金，仲係馬來西亞投資銀行 Affin Hwang Investment Berhad董事，咁有國際金融視野，東亞銀行乜料，心中有數啦，況且李國仕持有的一千六百多萬股東亞股份，部分是其父李福善剩低的遺產以及信託；呢批股份難以郁動，咁佢個人揸住千二萬股東亞，沽得就沽啦。
|
鍾意就快D Share啦！
|
|
|
