熱爆娛樂: 屈前度係斷背　洪永城又呃掂唐詩詠 [壹週刊

2016年6月23日星期四

屈前度係斷背　洪永城又呃掂唐詩詠 [壹週刊 - 1372] __,唐詩詠,洪永城,M1,

探熱針

屈前度係斷背　洪永城又呃掂唐詩詠

洪永城近日爆出翻撻做形象設計的前度 Bird Tse，結果搞到現任唐詩詠打爛醋埕。不過，冧女有一手的他，三兩下散手就救熄這場「醋火」。拆彈招數其實好簡單：用一個大話冚另一個大話！洪永城竟然屈前度係斷背，同歌手鍾舒祺（鍾舒漫胞妹）係一 pair。妙在唐詩詠咁都信，仲同身邊朋友表示已經放心晒！

Bird被問到與鍾舒祺是情侶關係時，反應激動：「完全無中生有！」但對於會否跟洪永城保持聯絡，她說：「 Sure！我哋一路都係朋友！」

姊弟戀亮紅燈

一三年，洪永城與唐詩詠合作《載得有情人》，第一時間睇中這個世間罕有、「專一崔建邦」多年的無綫女筍盤，花了多月發力狂攻，又不惜打鑼公告天下，最終成功令對方放下防線，奪得「絕種好女友」芳心。對另一半火裡火裡去的唐詩詠，自此一條心，甚至做晒阿四，上門幫男友拖地餵貓。

上月初，傳出洪永城刻意安排台灣之旅，借幫唐詩詠慶生求婚，以為這段姊弟戀開花結果，點知突然轉向，更一度亮起紅燈。原來氹女本事絕不下於崔建邦的洪永城，跟前度 Bird仍未完全斬纜。

早在有線時期，已是花弗仔的洪永城，當時雖然有個做金融的女友 Emily，但對公司女同事，特別是經常一同出埠拍旅遊節目的拍檔黃翠如勁細心，其後因工作關係識到做形象設計的 Bird，兩人經常相約夜蒲。

「 Tony（洪永城）同 Bird性格好夾，玩得好埋，兩個都係好熱情嗰隻，攬頭攬頸，喺朋友面前唔避忌，『寶寶』、『寶貝』咁稱呼對方。」知情者說。

熱戀有幾開心，唐詩詠完全放喺面上，行又笑，等𨋢又笑，就算男友約會前度，已經唔係問題。

陪洪永城揀運動裝，唐詩詠視線全程跟住男友。

前度玩踢爆

上月中，唐詩詠和馬國明出埠拍節目，洪永城與前度 Bird同場現身朋友活動，二人全程黐埋坐，事後 Bird更將二人合照加「心心」圖案放上 ig，披露兩人關係未斷。

「最初睇到啲相， Natalie（唐詩詠）好唔開心冇晒心機！但 Tony真係好有辦法，唔夠兩日，阿 Nat又開心番晒，話 Tony解釋 Bird只係朋友，仲要對方已經有另一半，話佢同 Sukie（鍾舒漫胞妹鍾舒祺）係一 pair，大家聽到都覺得好奇怪，但阿 Nat信到十足，所以都冇人敢多講！」

就與洪永城翻撻一事， Bird否認說：「我哋一路都係朋友！」

在 ig上載同前度合照心心相，還寫上「我要嫁給你」，她解釋說：「其實冇特別意思！只係隨意抒發吓自己感覺！（唔怕 Tony女友誤會？）冇嘢嘅！我哋不嬲都係咁玩！」

不過，對被指與鍾舒祺係一對， Bird表現十分激動：「咁講完全係無中生有！冇啲咁嘅事！」

把口啷過油的洪永城，對 Bird一樣好熱情，不時發關心短訊。

拍《載得有情人》嘴戲，洪永城和唐詩詠都好投入。

去年八月，本刊拍到唐詩詠一個人上男友屋企，幫手拖地餵貓。

大話冚大話

有相有真相！但洪永城為令唐詩詠相信自己即使仍與前度有來往，一樣冇事發生，竟然大話冚大話，屈 Bird「轉性」。

洪永城出此下策，事緣他未想做老襯，但已滿三十五歲的唐詩詠，想法卻不一樣。

「 Tony覺得事業仲喺搏殺期，想個基礎再打穩啲，過多兩年三十五歲後先諗結婚。佢知道 Natalie好，啱做老婆，但 Tony認為只要一日未婚，係自由身，就算同前度見面，都唔係咩事。佢同 Bird有好多共同朋友，所以好多機會見到。」

是日約埋一男一女朋友四人行的唐詩詠、洪永城，睇真啲，原來都好有夫妻相。

上星期日，洪永城開工前先一個人食麵，之後行去雲咸街一座商業大廈期間，有女途人認出，要影合照。

Bird表示跟鍾舒漫姊妹只係好朋友，在 Bird的 ig，的確不時放上與 Sukie的合照。

傳出洪永城翻撻前度 Bird翌日，唐詩詠出席活動被追問回應時，強擠出笑容。

同崔建邦一齊九年，男方不停偷食，唐詩詠仍不離不棄，更不時做埋對方司機。

動搖肯同居

拍劇會買定早餐，凍就準備暖包，仲專登等埋收工製造相處機會，咁 sweet，洪永城做一次唔信，做十次，唐詩詠就點都動搖！當「絕世好女友」的防火牆被攻破，男友講乜，唐詩詠都不會懷疑。當年同崔建邦，如是！

「 Tony雖然唔想咁快結婚，但佢哋一齊都兩年， Tony成日氹阿 Nat同居，只係阿 Nat覺得一係就結婚，否則，都係留啲空間俾大家好。」知情者說。

不過，「天真無邪」的唐詩詠始終抵不住男友長期攻勢，早前開始去睇樓，希望物色到理想愛巢，試吓一齊住。