應屆港姐冠軍麥明詩（Louisa）同「鴨王」何浩文（Dominic）以及大律師林作嘅「三角戀」，真係愈演愈烈，而最近唔單止何浩文發功，連林作同網友都加入戰團，不過女主角麥明詩就暫時未有表態。
麥明詩同何浩文因為合作劇集《賭城群英會》而傳緋聞，加上Louisa男友早前被拍得同女性友人夜蒲，有指兩人戀情出現暗湧，就係呢個時候，亦傳出Dominic力追Louisa嘅消息！
合照惹圍摷
其實力追傳聞傳出之後，唔少網友已經鬧爆Dominic抽水，不過Dominic就繼續不避嫌，喺Instagram上載同Louisa嘅合照，結果再次觸動網民神經，留言狂插Dominic，仲指責佢想破壞Louisa同林作嘅戀情。
Dominic見狀，亦都唔客氣，霸氣留言反擊網民話：「我同我啲frd影咗相又唔係拖手又唔係攬又唔係錫，然後我po我ig又同你有關？」佢仲話對方嘅留言先至係影響Louisa，護花心切嘅佢仲話：「係你講嘅說話會影響倒（到）女仔你明唔明，可唔可以用腦諗吓？」
林作急召網民訴心聲？
另一邊廂，林作亦有所動靜，佢轉發網民喺討論區嘅留言，仲擺上IG；睇番佢轉載嘅相關留言，內容如下：「我覺得佢（指林作）唔會睇唔起鴨王，但佢亦都唔會欣賞鴨王，林作個樣係麻麻地，但佢有種強烈既（嘅）反差感，外形似乞衣但知識淵博。」林作咁做，係咪暗示佢真係唔欣賞Dominic，同埋覺得自己被睇高一線呢？更搞笑嘅係，林作就叫個網民同佢聯繫，到底佢係覺得搵到知音，定還是想叫個網民留一線、他朝好想見呢？
寸林作唔識做戲
不過件事嚟到呢度並唔係完結，唔知係咪因為批評嘅聲音太多，Dominic直接潛入討論區，逐一回應網民嘅疑問，有人質疑佢收入唔多，Dominic即刻反擊指佢有能力令老婆生活無憂，更處處維護Louisa。好似有網友暗指Louisa拍過好多次拖，Dominic即挺身護花謂：「可靠消息指佢拍過好少拖，拍得最耐應該係教科書。」對於網友將Dominic同林作比較，仲話覺得林作有魅力啲，Dominic就寸爆回應：「林作教唔到佢（指Louisa）做戲，但成部劇我都幫到佢。」火藥味勁濃喎！
「多謝討厭我嘅人」
唔知係咪反擊開有感情，啱啱Dominic又喺社交網發展，發出三項好似聲明一樣嘅嘢，內容如下：
1. 小弟年少氣盛為人較真。比較喜歡直話直說，對咩人講咩話。
2.而（依）家啲人，好樣啲嘅，係男嘅話（就）係食軟飯mk溝女王...真係咁酸咩？
3. Thanks haters! "they hate you cuz they aint you"（多謝討厭我嘅人，人哋憎你，係因為佢哋唔係你）
嘩，好有別人笑我太瘋癲，我笑他人看不穿嘅感覺喎。
|
鍾意就快D Share啦！
|
|
|
