面對拍檔出賣，簡珮筠同時還要經歷小產，身心俱疲。
探熱針
生意冇咗 小產傷痛 前大台小花簡珮筠雙重打擊
在娛圈消失 19年的前無綫上位小花簡珮筠， 97年拍罷《大鬧廣昌隆》後，毅然轉行從商。在美容界打拼十多年，去年底，她說一盤心血被自己十分信任的拍檔出賣，一切化為烏有。
重重打擊，還要承受女人最痛！面對一連串被陷入的困局，簡佩筠沉得住氣，但保不住胎兒，事業受創兼小產。但她抹掉眼淚說： 40幾歲，我再重新開始。
埋頭苦幹四張先嫁
由藝人變成生意人，簡珮筠為自己一手創立的美容生意，日日埋頭苦幹，除卻農曆大年初一，做足 364日。
二十幾歲創業，身邊同齡的朋友有假期就玩通宵，簡珮筠選擇元旦日，一個人拖住兩個喼，飛往上海開山劈石；捱到可以在國內幾十個城市，發展至全球三十多個國家，均有其瑞士品牌的專櫃，將青春、血汗全押在生意上。
「由廿幾歲到三十幾歲，我嘅時間全部放晒喺工作，好多時做到凌晨先收工，所以我四十歲先嫁得出，朋友都話我幸運。」簡珮筠說。
十七年拍檔傷害太深
近十年，生意上軌道，以為人生下半場可以安逸過，她說料不到被生意拍檔出賣，將她的多年心血化為烏有。去年底，四十五歲的簡珮筠，陷入一場苦難當中。
「依家明白咩叫只可共患難，不可共富貴，原來當有錢時會改變。」
金錢、心血付諸流水，及不上被一個信任了十七年，視為恩師及家人一樣的拍檔出賣來得傷害。
「佢（拍檔）爸爸過身時，佢唔喺身邊，係我送終，係我老公攞住佢爸爸啲骨灰去下葬。」說到此，簡珮筠情緒再起波動，因為十多年的心血化為烏有外，她與家人還不斷被電話、短訊騷擾、有人企圖要一個女人仔，在受盡精神折磨情況下退縮不追究。
精神折磨至小產
去年底，簡珮筠意外懷孕！但身心處於壓力下，屬高齡孕婦的她最終流產，承受雙重打擊！
重提小產傷心事，她的眼淚流個不停。「兩個幾月，都係過唔到第三個月，好失望。我已經盡力保住，盡量叫自己唔好喊咁多，呢個 BB我冇話俾家人知，因為我仲面對緊生意件事。
「嗰日係一月一號，醫生幫我用藥流，我半夜痛到頂唔順要 call十字車送院。最後都捱過咗，我係咪好傷心？係好傷心。我老公係九代單傳，佢屋企人係好希望有小朋友。」說罷，她望一望坐在一旁的丈夫，兩公婆一個眼神，撐住對方。
縱然傷痛落淚，但眼前的簡珮筠還是個硬淨女人。
「冇時間俾我調整，抖一抖氣，伙記從來唔可以因為你唔開心而停止出糧。好在呢啲事喺我仲年輕時發生，若過多十年後先出現，我根本冇翻身機會。」簡珮筠收拾心情東山再起，四十幾歲，重新開始。
守護她
與丈夫 Justin結婚五年，風雨同路。夫婦互相夫持走出陰霾，重新開始與另一位瑞士朋友開拓新品牌「 SUR PUR」，好友戴蘊慧來撐場。
神鵰陸無雙
94年當無綫小花的簡珮筠，是監製李添勝及潘嘉德的愛將，同秋官合作《笑看風雲》， 95年在《神鵰俠侶》飾演陸無雙， 97年拍罷《刑事偵緝檔案 3》及最後作品《大鬧廣昌隆》，事業未見突破決定離場。
撰文、攝影、攝錄：娛樂組
|
鍾意就快D Share啦！
|
|
|
