Babar的爺爺當年來港定居，他是家族第三代香港人，一直過着窮困生活。但他不覺得因膚色被歧視，「如果成日諗遭人歧視，會好辛苦。」
坦白講
義氣巴基
Babar， 24歲，香港土生土長巴基斯坦裔青年。上週日清早，他跳入元朗臭渠救了一個為情自殺的醉酒洋漢，做了一日英雄，更獲熱心人贈送全新價值三千多元的 iPhone SE手機。他性格衝動，卻是義氣仔女，他最保護的人，是和他相依為命的母親。
我其實唔識游水，但當日人命關天，即使條渠有屎又污糟到爆，為咗救人，我諗都無諗就跳落去，仲跣腳仆倒，飲咗幾啖臭水。好彩水位只係去到腰咁高，最後我同個醉酒佬都平安冇事上岸。我褲袋裡的銀包和那部二手 iPhone 4入晒水，之後有位女士送咗部新手機俾我，話欣賞我勇敢，但講真我唔覺得自己好偉大。
我拎住部新 iPhone返屋企，將佢送俾我阿媽，自己就買部二手三星，六百蚊唔使，我想將最好嘅留俾阿媽。
有次阿媽打俾我，話被車撞傷入了醫院，當時我做緊地盤工，嚇得我即刻辭工由九龍飛的士去北區醫院。我喺車不停亂諗，阿媽會唔會斷手斷腳、會唔會死呀。最後不幸中之大幸，只係尾龍骨裂咗。阿媽得我一粒仔，如果佢有事，我生不如死。
我其實有老豆同兩個阿哥，不過對佢哋完全無印象，人哋問起我，我會話老豆死咗。父母一早分開，阿哥跟老豆，我就跟阿媽。阿媽唔識中文，喺屋企用巴基斯坦語同我溝通。我識講流利廣東話，係靠睇電視，但寫就唔得，所以我無中文名。阿媽唔知有免費教育，一直收埋我喺屋企，直到十五歲我先讀小三，但好難跟得上，讀到小六就退學。
捱窮
阿媽靠執垃圾和攞綜援養大我，而家佢年紀大唔做得嘢，我惟有努力打份清潔工，幫人洗地打蠟，月入一萬蚊。依家我每月用三千蚊，租元朗一間百多呎鐵皮屋和阿媽住，落大雨間屋會漏水，周圍又有蛇同蜈蚣，部冷氣開到盡都唔涼，廚房極簡陋，仲要無廁所。周圍無街燈，半夜試過俾人撬門，又試過有人拎木棍打我阿媽，治安差到我要放支長電筒喺床邊自衞。
由細到大我都捱窮，又會無端端俾村民指住話我係賊冇出息。但生活就算幾苦，我都叫自己要忍，因為我身邊仲有阿媽。當日跳河嗰個人話，自己失戀所以要死，我真係忍唔住叫佢去死，問佢有無諗過就咁死咗，佢阿爸阿媽有乜感受，做人唔好咁自私啦。前幾年，我幫朋友出頭，一個打十幾個，傷到件衫至底褲都係血。由醫院返到屋企，見到阿媽喊晒口，嗰刻我就同自己講，以後做乜都好，要諗阿媽。
每個人嘅生活總有唔如意，我嘅生活都好艱苦，不過望見阿媽，我相信日子再苦，我都一定捱得過。
撰文：黎雅婷
攝影、攝錄：葉漢華
news@nextdigital.com.hk
|
鍾意就快D Share啦！
|
|
|
