2016年6月23日 星期四

iPhone 7功能率先睇 蘋果「軟」實力晒冷 [壹週刊 - 1372 - 生活] __,蘋果,iPhone,iPhone 7,M1,

壹科林iPhone7功能率先睇 蘋果「軟」實力晒冷雖然蘋果喺大陸的侵權官司中敗訴,不過亦無阻其「雅興」,日前美國三藩市舉行的WWDC(AppleWorldwideDevelopersConference)中發布預計會跟iPhone7面世的全新iOS10,仲有全新macOS及watchOS,蘋果的「軟」實力,一樣有睇頭,全部第三季就有得更新。每年一度的WWDC,是個以軟件為主的盛會,目標對象是一眾軟 ...


壹科林

iPhone 7功能率先睇 蘋果「軟」實力晒冷

雖然蘋果喺大陸的侵權官司中敗訴,不過亦無阻其「雅興」,日前美國三藩市舉行的 WWDC( Apple Worldwide Developers Conference)中發布預計會跟 iPhone 7面世的全新 iOS 10,仲有全新 macOS及 watchOS,蘋果的「軟」實力,一樣有睇頭,全部第三季就有得更新。

每年一度的 WWDC,是個以軟件為主的盛會,目標對象是一眾軟件開發者,在會上,會率先公布不同平台的 OS( operation system)新功能,等開發者可以預覽 OS新功能,從而可寫出相應的應用程式。

再見 OS X 改名叫 macOS

絕對是意料之內,當全家人都姓 OS( iOS、 tvOS、 watchOS),叫了多年的 OS X,點都要改名,全名叫做 macOS Sierra,再加啲新功能,全場又叫餐飽。

Siri上身

毋須再葡萄 iOS用家,一眾 Mac用家,話你知,今年第三季終於可以在 Mac機上玩 Siri,以後搵圖搵文件搵檔案搵賽果問天氣,講就得,你唔講,又點知你想要呢。

無線剪貼

既然都同一個姓,當然要好好拍住上,所以 macOS加強與 iOS的連接性,例如在 iOS上複製一段文字,可即時傳送到 macOS上,毋須再靠電郵或 WhatsApp,快夾爽。

iOS 10好多新嘢玩

相信香港人最關心的,肯定是幾時出 iPhone 7,不過新機未有住,但相信極大機會裝上 iPhone 7的 iOS 10,就有得睇。

控制中心

以往於屏幕由下至上拉出控制中心,只可以開關 Wi-Fi、藍牙、調校屏幕光暗度等,但今次在拉出控制中心後,更可以左右撥,例如顯示更多功能的音樂控制畫面。

強化 Siri

今次 Siri又再被強化,用家可以直接講出訊息,然後以指定 IM程式傳送,例如講:「 Send個 WhatsApp俾阿強叫佢今晚返屋企食飯。」 Siri就識自動搞掂,除 WhatsApp外, WeChat一樣得。

智能相簿

蘋果向來鍾意玩相玩片, iOS 10的相簿不但可以認人、認地點、認時間之外,就連風景都認到,並且會自動結集成相簿,當中包括相片及影片,兼剪接出相、片兼備的智能相簿。

強攻家居

內置全新「 Home」應用程式,可在手機上控制屋企大小電器及家居設施,連大門防盜眼都可以睇埋,但就未有詳細講解操作原理,相信要等 iPhone 7正式推出,先會有更多資料。

來電阻擋

iPhone向來對垃圾來電都欠缺抵抗力,但在 iOS 10中,新加入智能辨識功能,將所有疑似垃圾來電加入提示功能,對每日接無數垃圾來電的香港人來講,夠實用。

Apple Watch上打 999

自 Apple Watch推出後,備受蘋果力捧,不斷加入新功能,務求將 Apple Watch有咁盡用到咁盡,今次仲可以報警。

緊急求助

用 Apple Watch講電話,好多人都試過,今次在新 watchOS中,只要連按錶側按鈕兩次,就會自動打出緊急電話,而發布會上,特別以香港作示範,因不少國家的緊急電話號碼都是 112,所以在會場大型屏幕上,就出現 999三個大字,估唔到,咁都可以衝出國際。

手寫輸入

名為「 Scribble」的新功能,可以在錶面上手寫輸入文字,發布會上特別以中文作示範,不過是簡體中文,我諗,繁體中文都得啩,毋須太擔心。

Minnie現身

由第一代 watchOS開始,已預設有米奇老鼠錶面,今次更加入其拍檔米妮的錶面,終於都齊齊整整。

健康分享

Apple Watch可記低每日步行數目、心跳次數等健康資料,新功能是可以跟朋友分享,邊個最懶邊個勤力一眼就睇到。

撰文、攝影、攝影:劉耀祥(美國三藩市)

features@nextdigital.com.hk


鍾意就快D Share啦!