熱爆娛樂: 執羅仲謙二攤　袁偉豪終於孭正 [壹週刊

2016年6月23日星期四

執羅仲謙二攤　袁偉豪終於孭正 [壹週刊 - 1372] __,袁偉豪,羅仲謙,M1,

袁偉豪被有精神分裂的黃智雯狂摑。

娛樂偵訊

執羅仲謙二攤　袁偉豪終於孭正

加入大台快 10年的袁偉豪，終於有機會在新劇《三個女人一個「因」》做男一，雖然是執羅仲謙二攤，但機會難逢，就算劇中要俾黃智雯打，都笑笑口頂硬上。上位有望， 35歲袁偉豪，下個目標是快啲儲夠錢娶老婆，盡快將碩士港姐女友岑杏賢，私有化！

𦧲飯應

拍拖接近四年，早已視女友岑杏賢為結婚對象的袁偉豪，一直心急想拉埋天窗，因為對方已經二十七歲，再拖落去，好易變高齡產婦。

「 Benjamin（袁偉豪）真係好努力，想快啲儲夠錢結婚，佢話點都要俾女友一個好好睇睇嘅婚禮，唔想求其。其實今次佢孭正都係執羅仲謙二攤，一知道謙仔推咗，佢即刻應承接。出道九年頭一次做男主角，天跌落嚟嘅機會， Benjamin話唔想錯過，佢希望自己可以上到位，有機會做多啲賺錢 job，同 Jennifer（岑杏賢）拿拿臨拉埋。」知情者說。

黃智雯出手重，絕不留力。

除咗打戲，二人亦不乏親密場口。

做咗「老襯」的羅仲謙推掉新劇，最後才由袁偉豪接手。

熱到頭昏腦脹的黃智雯狂食螺絲，被拖累的袁偉豪唔詐形，仲主動開風扇為對方解暑。

任打唔嬲

日前劇組在中環拍外景，卅幾度又翳焗，熱到傻咗的黃智雯狂食螺絲，搞到袁偉豪都要重複又重複。

劇中黃智雯的角色是精神分裂，會失驚無神對袁偉豪拳打腳踢，被對方篤住個鼻鬧，連摑幾巴，袁偉豪照笑笑口，逆來順受。

拍打戲唔識就力的黃智雯，曾有過打傷世界健身先生銀牌曾海昌的紀錄，一嘢批落對方眼角，非常重手。還好袁偉豪亦有番咁上下大隻，頂得住。

07年，袁偉豪奪得港男冠軍入行，係大隻仔，捱黃智雯打，當𢱑痕。

信任最緊要！二人融入對方的朋友圈，無分彼此。

同女友岑杏賢拍拖四年，袁偉豪早已認定對方為結婚對象。

唔撈等嫁

男友趕劇日夜開工，岑杏賢行街打發時間，自己搞掂。

「 Benjamin咁死心塌地，因為佢覺得 Jennifer性格好，唔似公司其他姐仔咁，勾心鬥角；雖然 Jennifer讀咁多書，但大班朋友出去食飯，佢都會俾足面男友， Benjamin成日讚佢夠大體。」

事實上，岑杏賢亦明白自己不受公司器重，加上性格隨和唔鍾意爭，同袁偉豪一齊後，對事業更加零鬥心。

「 Jennifer已經有晒心理準備，只要男友 ready，佢就嫁，專心做人妻同生 B。」知情者說。