豪語錄
加時 李健和
姓名中有此字，李健和卻不以「和」為貴：「我鍾意勝負。」勝固欣然，敗亦激發。
關於加時。李健和說，作為觀眾（尤其購票進場）覺得抵睇；作為球員，雖然辛苦，但總比互射十二碼好；作為教練，多一次機會變陣，道理同上，命運還是自決的好。
三種身份和思路，李健和兼而有之，這晚他是評述員，較直接：「講波冇 OT錢嘅。」
十九歲入行，踢頂級聯賽廿三載，香港紀錄，六年前掛靴至今像一場更考功夫的加時賽——例如，讓不讓兒子繼承衣鉢好？便不是第一右翼交個波咁簡單。
其實點都分唔到輸贏。
短途馬
李健和足球生涯太長了，長得分別與張志德、葉鴻輝共事過，張和葉都是力阻中國隊出線的英雄，三十年來家國；現職本地班霸領軍，適逢廣州富力植入港超聯又惹公憤，李健和說：「運動就是運動，不要太政治，廣州富力未夠料踢中超，想借我們練吓先啫。」中央借特區過橋""
OK不談政治，今晚有線講波，羅馬對波圖，我關注托迪上唔上陣，人年紀漸大，偏愛老將，偶像仍能踢便想像自己也一樣咁 fit。托迪卅九歲，號稱羅馬王子；李健和何嘗不是香港王子？
「足球令我年輕，世界愈複雜，有咩好得過喺場上淨係諗住個波就得？
「我相信托迪會善用體力，畢竟有限了。後期我也每場和教練商量，讓我出卅分鐘。」
李健和說，尾卅分鐘比頭卅分鐘好——不怕逆境波壓力大嗎？「尾段，對方的後生仔也體力下降啦，拉勻便公平。」
古來存老馬，不必取長途。——杜甫《江漢》
「進攻又比防守好，因為做後衞很被動，要轉身快又要不斷散越位，反而前鋒攻一次就係一啖氣。」
即是，資源愈短缺愈要主動一擊即中。係，我無限聯想，足球可引伸成男人處世智慧。
勝在冇計劃
李健和四十二歲收山，托迪應該比唔上，但我貪心啲，仍嫌太早，香港球壇需要他這種代表人物。
「缺乏代表人物是，生計冇保障，踢十年？之後點？年輕時要諗，年紀稍大更加要諗，所以留不住令人有印象的球員。」
若人人像李健和，十五歲受訓，至今從事相關項目，如無意外仲有排撈，比我輩新聞工作者更足付託終生，談何冇保障？
「實際上機會真係少，我勝在只諗一場波，最多諗埋下一場，諗太多反而一早轉咗行。我冇諗過可以咁耐。」
對，不只他，球迷也冇諗過——「大泡和」魯莽、長毛飛又係煙民，渾不似長青樹。
「正因為我貪玩，希望玩得耐啲，生了孩子，為家庭戒煙。踢波好玩在捉弄對手，即使退了役，踢衞生波，也不想俾後生仔玩晒，有時可以捉弄番佢哋，所以我不容許自己肥。」
魯莽之作，二千年埠際賽向裁判不公的球證猛力省波，被提起他當然說：「係唔啱。」但讚他替觀眾做了不敢做的事，他又點點頭：「唔係專登射中佢㗎。」筆者說：「咁你潛意識有射門觸覺嘛。」他又點點頭。
「大泡和」果然可愛。
運氣
為什麼引言寫「分唔到輸贏」？李健和帶領東方奪今年聯賽冠軍，卻旋即傳出東方因資金問題下季退出（最近才起死回生）。咁你話，得失點計？
「我轉咁多次會，並非高薪挖角，通常因為球會解散，同成績無關，這情況好難變，以後再發生咩我都唔會愕然。」
兒子李嘉華效力東方青年軍，爸爸副總監，就不是貪父蔭了（理由見上），踢波算否美滿前途亦不容為父者置評（理由同見上），李健和說：「實情是他應該唔得。」這句倒評述員口啓。
頂級聯賽班霸的巨頭竟有餘暇（或說幫補）講波、教波甚至教埋中學生，香港怪現象。
「教細路仔更重要，因為兼教做人。我改變髮型便為做榜樣。
「以前懶剪，留吓留吓又好似腳風特別順、冇咁易受傷。」李健和說，退役後受傷機會降低，而且，若這是天賜的運氣，做人無謂貪心攞到盡。
家
我的坪洲 friend叫陳偉超，每天路過天后廟附近會想嵋嵋和仔在不在家， fans心態。
李健和奇道：「踢波嗰個陳偉超（鑊鏟）？」當然不是，球員的名字總親切如鄰里同事，我還識得李志豪（虎哥）、王志強（牛屎）""如果繼續做落去，應該湊得齊一隊波。
與歐偉倫雙翼齊飛，李健和是「左倫右李」。作為街坊代表，因為反對過林偉強（鄉議局副主席），被歸類為泛民，李健和說：「不是，我的政綱只是維持地方特色，不要太紛亂。近年，很多人搬出坪洲因為愛熱鬧，又很多人愛清靜搬入坪洲，拉勻啱數。」不在意自家物業能否升值。
直性子包含大智慧，放諸全香港何嘗不是？沒必要分本土外來，喜歡便留下，咁簡
撰文：余家強
攝影：黃志明
攝錄：葉志明
|
鍾意就快D Share啦！
|
|
|