娛頭
實則細廿年 51歲羅霖鮮肉未婚夫起底 強國富二代王嶠
八月踏入 51歲的羅霖，數月前自爆有個後生十年的富二代男友 J君，原來男方已多次求婚，但離婚三年孭住照顧三個兒子責任的羅霖，卻遲遲未有應承，但近日，她又改口，暗示隨時閃婚。
據了解，羅霖男友名叫王嶠，年紀細她接近廿年， 12年羅霖跟前夫劉坤銘婚姻出現問題期間，二人在北京搭上並迅即打得火熱，但直至最近，熟透的羅霖才被男友父親接受。
四年前搭上
一二年宣布離婚後，身形樣貌幾乎冰鮮的羅霖愈戰愈勇，今年六月，她自爆有個細自己十年的富貴男友，對方更自薦出鏡，跟羅霖到法國，為女友代理的紅白酒拍婚紗宣傳照，不過，成輯相 J君最多只有大側面。
事業行先，但羅霖身邊一直不乏異性，而這個被她形容是裙下之臣中，唯一一個「鬧極唔走」的男友叫王嶠，二人已相識四年，打從開始，王嶠對經常飛內地的羅霖不單管接管送，更次次做老細，請食飯爭埋單，出手闊綽。
「好多年前， Candy跟劉坤銘搬咗去上海住過一段時間，當時 Roger生意唔掂，佢就開始出返嚟做嘢搞模特兒公司，因為咁識咗唔少想入行想出名嘅富二代，朋友圈子更愈來愈 young，至於王嶠，亦係朋友介紹識嘅。」知情者說。
本刊問羅霖男朋友係咪叫 Tony，她說叫 Joe。英文名可以改，在被他早已刪走的微博頭像，王嶠的確曾經叫 Tony。
婚紗照玩神秘
為紅酒品牌拍婚紗宣傳照，羅霖刻意只讓男友側面曝光。
再做闊太
跟富二代王嶠感情穩定，本來最愛 Chanel的羅霖，日前被發現升呢在 Hermes掃貨，由菲傭攞住用大黑袋載着的 Hermes戰利品走人。
迷戀女神
羅霖在內地沒有知名度，但挾九一年亞姐冠軍銜頭，對做生意或者識朋友都有一定幫助，因為內地人的觀念，「亞洲小姐」就是代表香港，得獎的更加巴閉，所以，當時只得廿幾歲的王嶠，完全將四十有七的羅霖視為女神，火速展開攻勢。
「其實王嶠過往的女朋友年紀都大過佢好多，所以同 Candy好啱 key，其實佢哋唔只相差十年，應該係一個 double，有成廿年； Candy唔想俾人知佢大過男仔咁多，所以報細咗。不過最重要係王嶠唔介意，佢對 Candy，絕對可以用迷戀嚟形容，兩個識咗之後，就定期見面。」
扮後生
一二年十月，本刊也曾目擊宣布已經同劉坤銘分居的羅霖，人肉速遞到北京瘟仔，為拉近年齡差距，向來打扮成熟的她短褲黑絲扮後生，跟當時一身名牌打扮的王嶠食完飯，直落北京工人體育館旁的 MGM夜店繼續蒲，之後二人再到二環一家川菜館食烤魚消夜，飲飽食醉到凌晨五點，才雙雙返酒店。
「王嶠係富二代，喺英國讀過書，未婚；屋企人做建築生意，佢老豆亦好就佢，只要個仔鍾意，就算身邊啲女朋友大一截，都唔會反對或者干涉， Candy都見過男友屋企人。過去幾年， Candy幾乎每個月起碼會返內地一次見男友；後生又有錢，仲要對自己死心塌地，去邊度搵呀？所以大家都覺得佢今次勁過中六合彩，尤其係個男仔仲要好聽話， Candy唔鍾意嘅嘢，佢一定唔會做。」知情者說。
有富二代男友錫住，就算每年孭住八十萬學費，供兩個兒子去美國讀書，羅霖依然可以做名牌常客。早前，本刊便見她帶住細仔及外傭姐姐，到中環 Hermes入貨；獲特別招待的她，連掃幾袋。
讚王父開通
對於跟男友 J君一二年已經搭上，羅霖回應含糊。
「啊，係咁，我暫時唔會公開佢（男友）嘅資料。（你哋唔只相差十年？）之前講咗十幾年，我唔介意姊弟戀。（已經見過家長？）我見過佢爸爸，佢爸爸 OK開通。」羅霖說。
愈嫁愈富貴
咪以為離過婚又生育過的女人冇選擇，世事其實充滿驚喜！好似有兩子的陳伶俐及兩女的陳少霞， 40歲前搵到第二春，更愈嫁愈富貴。
陳伶俐
現年 39歲，選過港姐的陳伶俐，跟大她十年的音樂人林敏驄育有兩子， 08年二人離婚後，她開公關公司獨力照顧兒子， 12年改嫁新加坡隱形富豪胡嘉烈後人劉頌銘，深得奶奶愛錫的她，經常被拍到陪老人家出入飲下午茶， 14年為劉家生埋茨姑椗後，陳伶俐翌年投資千萬在銅鑼灣開畫廊，成為標準闊太。
陳少霞
93年入行，甫出道已經有機會跟梁朝偉、劉華等影帝合作， 00年離開大台引退，嫁到澳洲並誕下兩女， 08年離婚，為生活重返幕前。 11年，陳少霞甲狀腺出現問題，大女亦患有糖尿病，加上前夫離逝，生活變得十分艱苦，直至在教會認識了大把錢的法拉利之父李文輝，陳少霞從此富貴，今年七月， 39歲的她更正式成為李太。
撰文、攝影、攝錄：娛樂組
|
鍾意就快D Share啦！
|
|
|