一支白酒三個分，吳鎮宇愈飲愈興奮。
娛樂偵訊
歎白酒食好西 吳鎮宇酒量好照揸車
為自編自導自演的黑色幽默江湖片《費曼的夏天》日日開工冇得停的吳鎮宇，難得冇通告，約朋友去中環飯聚鬆一鬆，邊食邊歎白酒，之後仲自己揸車返屋企。喂喂喂，酒後駕駛喎！
再過導演癮
吳鎮宇一四年同囝囝費曼（ Feynman）父子檔做真人騷《爸爸去哪兒》後，兩父子在內地人氣急升；自己開戲，吳鎮宇冇蝕底，搵埋個仔客串。
「好多演員做耐咗，就會想試吓做導演，除咗好耐之前嘅《 9413》同《自從他來了》，鎮宇最近期係○九年搞咗套《追影》，但票房仆直！之後就冇再心思思諗住做導演啦，不過拍完真人騷，佢响內地多咗好多機會，佢同林心如合作嘅內地電影《京城 81號》亦好收得，最近套《使徒行者》亦收過五億人仔，見個勢好，咪又試吓囉！呢個古仔搞咗好耐，收埋好多年。」知情人士透露。
埋單做老細
要開拍《費曼的夏天》，吳鎮宇碌盡人情牌，搵老闆投資，新戲最終順利開拍，他亦鬆一口氣！
日前劇組放假，吳鎮宇決定約朋友去中環九如坊食好西，歎番晚！
向來識飲識食的他，席上同朋友邊吹水邊飲酒，一支白酒三個人開心 share，愈飲愈興奮，平日唔多說話的鎮宇變口水佬，仲氹到大家哈哈大笑，吹到十一點幾，要返屋企交人嘅鎮宇自動波埋單！
愈開愈快
飯後各自散水，友人搭的士離開，飲咗酒的吳鎮宇自己一個行去攞車，揸車返屋企，沿途愈開愈快。
酒後駕駛，但鎮宇當「老行」，冇被截停吹波仔，否則，一身蟻！
銅記「晒馬」
上星期一（八月二十二日），吳鎮宇現身銅鑼灣為新片《費曼的夏天》拍黑幫講數戲，吳志雄（大佬 B）率二百名黑衣人衝出馬路，吳鎮宇就帶住一班「雜牌軍」迎戰，重現當年《古惑仔》「晒馬」場面。拍完幾個鏡頭，吳鎮宇立即走返埋導演位睇 playback，笑晒收貨！
一身蟻
藝人作為公眾人物，都知法犯法，酒後駕駛搞到犯官非的例子，大把！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|