上週六（廿七日），宋芝齡同男友孖住行又一城，二人戴住情侶鈪，全程拖到實一實。
探熱針
港姐宋芝齡任已婚董事嘴嘴掃背
因為韓風盛行，操得一囗流利韓語的宋芝齡，一度人氣上升，但入行廿年都冇乜代表作，惟有轉型開韓語學校，又投資韓國餐廳。表面上蛻變成商界女強人，實則已秘密釣到金龜，陪男友去半島撐枱腳斷正，記者卻發現對方手上已戴住婚戒。
據知，宋芝齡男友是已婚的 HMV集團執行董事何智恒，早前二人拍拖行又一城，情到濃時當眾錫錫，又一杯乳酪兩份食， sweet到呢！
唔夠喉
飛甩 IT男友後，宋芝齡轉頭已搭上投資界猛人何智恒，男方做過律師行合夥人，現為 HMV執行董事。行埋半年，宋芝齡就成功令男友除低婚戒，得米！
釣到筍盤的宋芝齡，早前同男友戴住情侶手鈪孖咇行又一城，去完家品店睇吓冇乜啱買返屋企，跟住手拖手走去買乳酪雪糕，其間何智恒伸出手，不停在著住白色背心長裙的女友背部掃來掃去，之後二人坐低後含情脈脈對望，一杯雪糕，你一啖，我一啖。
食完甜品，何智恒仲未滿足，行行吓竟然玩突襲，嘴啖女友，兩人在公眾場所嘴住起碼五秒，男友痴纏，宋芝齡受晒，笑得勁冧。直至發現記者鏡頭，何智恒才鬆開女友，急急腳閃走。
戴婚戒
早在數月前，宋芝齡同男友去半島酒店歎好西撐枱腳時，亦被本刊撞破。當晚，手上仍戴住婚戒的何智恒表現避忌。
「嗰晚佢兩個 request坐廚師枱，即係喺廚房出面自成一國，其他客人唔會見到佢哋，都食咗三粒鐘先走，個男嘅仲係揸保時捷。」知情者透露。
對於男友已婚，宋芝齡大方承認。
「大家係成年人，啲嘢一定係清清楚楚先行埋一齊！（佢好有家底？）咁講真，我識嗰啲都 OK㗎！咁我都唔差㗎喎！」。
收購 HMV
做過律師的何智恒（ Gilbert），是澳洲悉尼大學商業及法學學士，曾任職法朗克律師行及新世界發展有限公司高級投資總監。大有來頭的他，擁有廿多間上市公司，主力投資科技業務， 07年創辦 AID Partner（即匯友資本），去年與合夥人胡景邵斥資 1.14億，收購 HMV IP權利，在內地、香港及新加坡等地拓展 HMV業務。上月，公布 HMV於中環開設萬呎分店外，早前又斥資 200萬美元，購入自動駕駛汽車 Zoox 1.9%股權。何智恒現居西半山杏彤苑單位，市值約二千七百萬，相當有米。
承認同宋芝齡拍拖的何智恒聲稱和太太已分居，「分咗居幾個月，有問題已經一段時間，（宋芝齡係第三者？）絕對唔係，我唔想佢俾人標籤。」
撰文、攝影、攝錄：娛樂組
|
鍾意就快D Share啦！
|
|
|