熱爆娛樂: Viu選美真人騷是非　杜汶澤女陳意嵐陰招批踭　歐家裕捱唔住退選 [壹週刊

2016年9月1日星期四

Viu選美真人騷是非　杜汶澤女陳意嵐陰招批踭　歐家裕捱唔住退選 [壹週刊 - 1382] __,Viu,選美,杜汶澤,ViuTV,M1,

探熱針

Viu選美真人騷是非　杜汶澤女陳意嵐陰招批踭　歐家裕捱唔住退選

明抄《 America's Next Top Model》真人騷玩法的 Viu TV《美選 D.n.A》，身材、樣貌較量外，佳麗之間的明爭暗鬥才是戲肉。據知， Angel組暫時相安無事，但 Devil組已決裂；屬 Devil組的杜汶澤老友陳意嵐，為出線陰招批踭乜都出齊，有傳隊友一號歐家裕（ Stephy鄧麗欣前排球隊花），就因為受唔住對方陰招，已經退選。

Stephy隊花忍唔住爆

選美佳麗同後宮妃嬪一樣，勾心鬥角！ Viu TV的《美選 D.n.A》，節目拍攝個多月，佳麗埋身決鬥，已鬧出不少是非。日前公布入圍的 Angel與 Devil對決兩組，其中 Devil組一號歐家裕（ Joe）據知因為被隊友勁恰玩針對，頂唔順唔想繼續日對夜對，已通知大會退出唔玩。

在大會活動上，歐家裕被追問有否遇上麻煩隊友時，亦忍唔住爆。「有俾人批踭，唔好講名，原來選美真係有呢啲嘢。起初以為佢唔小心批到我，點知好多次，成五、六次咁多，又冇講 sorry，我係有唔開心，有同其他女仔講。」

雖然《美選 D.n.A》佳麗燕瘦環肥，有啲岩巉，但至少比港姐具話題性。

視為大熱的 36F Larine（鄧月平），與同樣巨乳級的紋身女石希露，同屬有睇頭佳麗。

雖有大伯呂良偉做後台，但呂善婷一早被 foul。

杜汶澤女陰功高強

據了解，「批」到歐家裕退賽的批踭佳麗，正是同屬「 Devil組」，由杜汶澤化妝師變演員的進擊陳意嵐。好「有戲」的她，鏡頭前笑騎騎賣 friendly，鏡頭後放毒蛇，被指是個見高拜見隊友踩的「陰功」佳麗。

「佢成日擺大家姐款，呼喝隊友。阿 Joe份人比較怕事，所以 Tarah（陳意嵐）成日恰佢。有次阿 Joe因為感冒，練舞失準， Tarah就即刻單打佢，又藐嘴藐舌。不過一 roll緊機，佢又扮晒關心，行去安慰阿 Joe：『傻豬，唔使喊！』，但一停機，佢就九秒九彈開。假到冇朋友！

「之後拍食飯，好衰唔衰兩個被安排坐埋一齊， Tarah不停起身夾餸，借啲意對阿 Joe批踭，仲要兜口兜面。最後阿 Joe忍唔住講咗句：『你可唔可以唔好逼住我。』」一名幕後人員說。

被陳意嵐「陰功」逼走的歐家裕，因為跟 Viu TV簽了保密協議，為好頭好尾，本週一（八月二十九日）已退選的她仍硬撐活動，焗住同逼人太甚的陳意嵐上台互讚。

選美，都係一台戲。