七警被定罪，一哥盧偉聰上週六出席警察學院結業禮時，仍然拒絕道歉。（《蘋果日報》圖片）
八卦陣
警隊又籌旗 吸金力勁過保良局
七警傷人罪成被判囚兩年，法庭彰顯公義，但警隊一哥拒絕道歉，唔只出口撐，仲以行動支持，批准員佐級協會同督察協會發起內部籌款，仲話打算籌一千萬幫七警家屬。
其實七警停職呢兩年人工照𢭃，已經袋咗納稅人超過八百萬，早已惹來唔少市民批評；而講到籌旗，警隊早在前年已經幫七警籌過一次錢，仲已經籌咗一千萬，當時本來話幫七警打官司，但因為驚被指包攬訴訟，最後打咗退堂鼓，但筆錢最後點用呢？工會冇詳細交代過。
家陣又再吹雞，又話再籌一千萬。咁上次嗰一千萬係咪已經使晒呢？
查實，《壹》仔覺得警隊工會嘅吸金能力都幾犀利。睇番保良局年報，每年一度嘅大騷《星光熠熠耀保良》，一五至一六年度都只係籌到八百六十幾萬，再前一年好景少少，都只係僅夠一千萬。似乎保良局要向警隊工會請教吓，有咩籌款好辦法
假獨立真建制 伍議員搞事實錄
灣仔區區議員伍婉婷唔知係咪不食人間煙火，竟然投訴巴士唔喺正站前停車上落客，搞到巴士司機火都嚟埋，星期一發起按章工作行動，結果咪搞到塞晒車，打工仔今次真係多謝晒伍議員喇。
睇番資料，伍議員真係好關心交通問題。一三年警方就大型遊行集會改道安排諮詢灣仔區議會，當時伍議員就話元旦遊行當日下午，銅鑼灣一個婆婆因心臟病發要 call白車，仲老屈話「疑受封路影響，延誤幾小時救治」，而婆婆就於翌日不幸離世。不過，好彩消防處心水清，發言人話當日該時段嘅出車記錄並無特別延誤，即時秒殺。
查實伍議員不時都有出位言行。有讀者爆料，話浸信會愛羣社會服務處搞咗個「灣仔戲味」戲劇比賽，灣仔區議會有資助，伍議員就代表區會出席活動。當日有學生喺問答環節講起搞戲劇好需要資源，但佢哋連整道具同慶功嘅錢都唔夠，意思本來想講究竟社會有幾關注戲劇發展。點知伍議員就話：「大餐就冇㗎喇，但仲有啲錢買小食。」叫啲學生食吓小食，唔好講到區會咁刻薄。此話一出，當堂令到班學生滴晒汗。
伍議員究竟係乜人？「梁粉」一名。平時喺記者會喜歡一支箭霸頭位搏影相，當年梁振英參選，佢搞咗個食「梁粉走唐」行動，唔知今時今日佢係咪鍾意「梁粉加奶」呢？
立會博士議員 逐個數
《壹》仔今期訪問咗張超雄博士，佢呢個星期四就會由理大正式退休。講到博士銜頭，呢個年頭一街都係，好似今屆立法會七十個議員中，就有一打咁多。
不過，所謂博士身份，個個唔同。例如立法會主席梁君彥同何君堯，佢哋嘅博士銜頭，前面掛咗「榮譽」兩個字；後者仲被質疑學歷，因為佢讀嘅英國安格里亞魯斯金大學當年只係專上學院，應該未拎到法律學士資格，但何生曾經好霸氣反鬧網民：「總之就唔係野雞， OK？」
其他嘅博士級議員，仲包括李國麟、盧偉國、姚松炎、梁美芬、黃碧雲、容海恩、葛珮帆、劉小麗同鄭松泰，其中容海恩係法律博士（ Juris Doctor），喺香港被認定等同專業碩士學歷；至於民建聯嘅葛珮帆「博士」，佢「曾經」係格林威治大學（ Greenwich University）哲學博士，但間學校被揭係文憑工廠後，葛博士都死口唔認，到選立會時仲自動「降呢」做番碩士添。
葉劉又出醜 選委一秒 KO
話說奶媽林鄭月娥有中共 300+同商界 300+最少四百張鐵票在手，曾俊華、葉劉、胡官都似乎唔夠建制票入閘，搞到要向民主派選委埋手爭取支持，暫時民主 300+偏向提名胡官同曾俊華，葉劉都真係咪話唔葡萄。
不過，民主派唔鍾意葉劉都唔係冇原因，除咗因為往績同政綱唔啱心水之外，聽聞佢約見選委時態度都麻麻。有民主派選委話，葉劉主動約見佢哋，本來都預咗各說各話，冇乜特別期望，點知一講到雨傘運動，葉劉就嘴藐藐話人哋收咗錢，仲反問有邊個冇收錢，班選委就個個舉手話自己冇，即時 KO葉劉，場面都咪話唔好笑。
之前 IT界選委就試過因為時間唔啱，未見葉劉住，葉劉就好委屈咁公開話人哋唔見佢。高教界上星期六見葉劉，選委陳健民就喺 facebook話見完後有種悲涼感覺，暗諷葉劉對 23條立法、對中央咁忠心，但啲票就去晒林鄭度。曾經話中央「開晒綠燈」俾佢去選嘅葉劉，今次真係「葡萄乘淑儀」喇。
撰文：巫不言
news@nextdigital.com.hk
|
鍾意就快D Share啦！
|
|
|