澳門古天樂周焯華，今晚喺澳門新濠影匯舉行太陽城十周年晚會——「傳奇之夜」演唱會，星光熠熠，梗係，一擲千萬請眾天皇巨星上台輪流獻唱，先有Sammi安仔合體唱《唯獨你是不可取替》，又有Eason孫燕姿，仲有香港周焯華——古天樂。古天樂一出場就話:「我真係唔明，點解你每次出場，都要有一個女性喺你身邊嘅？」洗米華唔理答佢，只係話:「唔好意思，我係企中間嘅。」原來古仔企咗老闆個中間位…調完位之後，古仔問洗米華:「點呀，你勁唔勁呀？」洗米華單字回應:「勁。」單手插袋。古仔唔放過佢:「淨係今晚勁咋嘛？」洗米華繼續單手插袋:「冇度稿呀真係…」仍然堅持單手插袋嘅洗米華，想交個場俾番古仔，於是話:「最希望就係古仔唱首歌，好唔好呀？」古仔即接口道:「係呀我會唱呀，同埋我會跳埋舞添!」洗米華就謂:「《當年情》唱得好好添!」劉謙即點頭:「好呀好呀。」點知古仔話:「唔好啦，《今期流行》好啦!」洗米華即向劉謙笑古仔(用普通話講):「他真的不講普通話的。」劉謙即又點頭:「好呀好呀。」古仔就話:「好呀？咩都好呀嘛？」劉謙都係嗰句:「好呀好呀。」洗米華冇聲出。於是古仔又搶番個主場，繼續「夭」洗米華謂:「唔知大家會唔會反對，最後一個表演嘉賓，就係阿華哥，係咪呀？」洗米華雙手拎番出嚟一陣，再雙手插袋，古仔原來未講完:「同埋阿華嫂…」邊個華嫂？？此時洗米華又單手插袋，笑笑口，定個抬油咁款，點知全場竟然尖叫。唔係呀化？唔係古天樂同古嫂合唱喎!而係洗米華同洗米嫂合唱喎？唔係偶像派嚟喎，使唔使全場尖叫咁誇啊!!!呢個Moment，洗米華好似feel到有啲尷，低下了頭……其實佢係，用另一隻，整一整件衫，扣番啲鈕。全場仲high緊，洗米華指指台下，忽然話:「佢唔係咁講喎!」古仔即 止住了他:「你唔好理啲字幕啦!」繼續話:「通常歌手唱得好，啲觀眾嗌encore，咁希望到時華哥同華嫂再出過嚟，再合唱多一首歌好唔好？」全場又叫。洗米華今次冇鈕好扣，於是摸鼻。
| 攝影：畢紹基、吳耀輝 | | |
| | |
|
鍾意就快D Share啦！
|
|
|