每一年娛樂圈都有唔少新人加入，男女老幼、燕瘦環肥，要邊類有邊類，但係唔知點解，每一日睇報紙、上網或者打開電視，睇嚟睇去係ABCD嗰幾個，淨番落嚟嗰演員，有啲係被淘汰，有啲係自然流失，有啲係自己執包袱，去另一個環境繼續發展。李彩寧，99年加入無綫藝員訓練班，當年拍完《金裝四大才子》之後，多咗個「金牌丫鬟」之稱，好多套無綫劇都見到佢。做做吓又見佢走咗去拍電影，似乎前途向邁向光明，點知轉個頭又唔見咗蹤影，直到2013年港視開台，又見番佢出嚟拍劇，不過隨住港視發牌夢碎，又再次消失！由原名李明麗改名李彩寧到依家改名叫李焯寧嘅Karen，日前喺旺角接受《蘋果》訪問，原來佢當年離開咗港視之後，又走咗去讀書進修，家陣已經轉營做marketing，第一個project係「2015世界和平小姐」，嗰陣佢由rundown、舞台設計、交通安排到膳食，全部都係一個人做。李彩寧笑道：「呢次廣告公司搵我幫手，真係做癲咗，不過事後真係好大滿足感，好似做演員一樣，劇集出街受歡迎，就算之前幾多晚瞓唔到，都覺得好玩！」有咗呢一次經驗，李彩寧話嚟緊會返大陸做Management公司：「0依家會專注做管理階段，簽唔簽藝人係將來嘅事，其實喺TVB出嚟嘅人，無論係做乜嘢崗位，都有好多人鍾意問你意見，講真我得做演員呢個工作經驗，必須要做返呢一行，唔做幕前咪去做幕後。」不過話晒做咗幕前咁多年，突然間轉咗去做幕後，難免會有人覺得你做唔掂先轉行，甚至質疑工作能力，李彩寧話：「我之前都試過俾人質疑我嘅能力，不過我會用自己能力去證明自己，佢哋知道我呢個女人係做嘢，知道我可以handle同Manage啲Event，我慶幸冇聽過啲難聽嘅說話。」一切還是多謝無綫。「TVB唔止係一個訓練你拍嘢嘅地方，仲有係點樣教你爭取時間、紀律，你可以邊學邊做。機會係有好多，不過要睇吓你有冇運氣，咁我梗係希望兩邊keep住繼續做，我好welcome大家搵我拍戲，事實上我對拍戲好有熱誠，希望可以有新衝擊。」當年李彩寧喺無綫係拎咗金牌先走，講到離開嘅原因，佢話：「其實係突然間叮咗一聲，最大嘅因素係覺得睇唔到前面，唔知前面嘅路可以點樣去行，雖然機會係多，但係始終冇運氣，所以諗諗吓咪決定出去闖吓，呢個係令我成長嘅一個地方，當你離開出嚟做嘢嗰陣，你會發覺有好多嘢可以應用到，做人會成熟，0依家有個底，感覺穩陣同有信心。」歸根究底，李彩寧話，可能佢輸蝕在唔識經營自己：「我唔識social呢樣嘢，可能因為我block咗我自己。嗰陣仲後生，只係覺得做番自己有乜問題，但係0依家睇番好明顯係我嘅問題，可以話係我嘅失敗之處。」依家37歲，起步還未遲吧。雖然李彩寧嘅外表嬌滴滴，不過佢性格其實都好獨立，仲好正能量：「人生總係有唔同階段，有唔同嘅覺悟，有覺悟好過冇覺悟。尤其係呢2、3年。我嘅變化係最大，可能係我出咗嚟之後，好多嘢都仲未咁清晰，但係當你有好多嘢要自己去做、要見唔同類型嘅客，你會明白呢嘢係必須，唔係叫『假』或者『虛偽』，總之朋友又好、客又好，都要建立一個良好嘅合作關係，嗰個關係係指大家食飯，同吹吓水。」即使工作上遇到問題，李彩寧話自己從未出現過負面情緒：「我嘅人生好正面，做人好開心，永遠都係向前看，唔會向後睇，如果向後睇，只會睇自己做過嘅嘢。當做每一樣嘢都係當學嘢，上咗一個課堂，之後日子都可以準備充足，反正發生咗嘅嘢永遠都改變唔到，所以唔開心兩日，又或者瞓醒先算，再拖落去都冇意思。」
| 攝影：沈健程 | | |
| | | |
|
鍾意就快D Share啦！
|
|
|