熱爆娛樂: High tea值 68萬　鍾沛枝被女藝員呃去富豪飯局 [壹週刊

2017年9月21日星期四

High tea值 68萬　鍾沛枝被女藝員呃去富豪飯局 [壹週刊 - 1437] __,鍾沛枝,富豪飯局,M1,

當年發展唔理想，鍾沛枝毅然離開，眨吓眼已經離開娛樂圈十年。

繞場壹週

High tea值 68萬　鍾沛枝被女藝員呃去富豪飯局

退出娛樂圈十年的 01年港姐亞軍鍾沛枝，難得再現身幕前，在今集《繞場壹週》做嘉賓，同陸詩韻及陳倩揚講選美秘史， Gigi（鍾之洋名）退出娛樂圈隨即轉戰國泰地勤，現時從事美容 training工作的 Gigi在節目中剖白收埋多年的秘密，包括接下一個老闆秘書的電話邀約，以 68萬去酒店下午茶，以及被藝員同事騙去了一個神秘富豪飯局。

在大台期間，女藝員以敍舊作借口呃鍾沛枝去了唯一一次的富豪飯局。

與鍾沛枝同屆的港姐稱，曾有參選佳麗充當中介人安排富豪飯局。

敍舊變咗富豪飯局

自有選美比賽開始，便盛傳有富豪飯局的出現，參與過的當事人，甚少肯現身說法解開謎團。昔日廿歲出頭的鍾沛枝試過被藝員同事哄騙食飯，去了人生唯一一次的富豪飯局， Gigi笑稱對方已離開娛樂圈，不想影響他人生活，絕口不提對方身份，反而是節目出街後，有同屆的港姐指當年有佳麗充當中間人安排出席飯局。

鍾沛枝︰「其實我真是試過一次，但是在不知情下去咗！係一個藝員女同事約我食飯，佢約咗我好耐，所以就去咗！」

Frederick︰「即是你只想大家聯誼一下？」

鍾沛枝︰「佢約我一個地址，去到之後又有一架車來接我，原來唔係喺嗰度食飯！上車後覺得好奇怪，又見唔到我嗰個朋友，然後就載咗我去一個地方，嗰個地方又唔係好似普通酒樓，喺私人會所裡面。」

陸詩韻︰「載你去邊度你都不知道呀？」

鍾沛枝︰「自己嗰陣時真的很傻，現在諗番就會……第一首先你唔會上嗰架車，第二你會即刻打俾朋友，問佢喺邊度？其實嗰陣你唔會諗太多，只會覺得可能係佢搵人來載我。去到嗰個地方一打開門，裡面已經坐滿人！」

01年楊思琦大熱，由頭帶到尾，鍾沛枝坦言只屬黑馬。

今集《繞場》嘉賓陳倩揚（左）、陸詩韻和鍾沛枝同屬港姐亞軍，也分別在不同的航空公司工作。

在大台拍劇不多，反而頻頻做歡樂小姐接待外賓， 02年曾與朱凱婷接待張國立（右二）等國內演員。

參選期間，鍾沛枝與楊娜（右）感情最要好。

參選時年僅 19歲，總決賽答問環節冇一條答到。

Frederick︰「我見 Gigi吞咗啖口水先講，然後情況係點？」

鍾沛枝︰「好驚！坐滿咁多人嘅！一圍中菜，有男有女，有個男士旁邊有個空位，即是我一定坐呢個位！」

Frederick︰「你朋友究竟有冇嚟到？」

鍾沛枝︰「我坐低就問：『我個女仔朋友去咗邊？』佢話個女仔唔嚟食飯，不過一陣唱 K會見到佢！我心諗我都冇話去唱 K。被迫食咗呢餐飯，返屋企同媽咪講今日嗰個人約我去吃嗰餐飯，但我去到見唔到嗰個女仔！」

陳倩揚︰「但嗰餐飯有無事發生？」

鍾沛枝︰「冇呀！純粹食飯。但係嗰個人第一句就同我講：『我約咗你好耐！』我就覺得一定係我朋友做咗啲手腳，其實根本唔係普通食飯！」

陳倩揚︰「之後仲有冇再見？」

鍾沛枝︰「有見過！佢真係同我講其實係嗰個人想約你吃飯，但我其實一毫子都沒收過。」

陸詩韻︰「佢有冇解釋點解唔直接同你講，而要這樣做？」

鍾沛枝︰「佢根本知道我嘅性格係唔會出去！而家自己就會知道原來是去咗一個不應該去嘅飯局，如果你老實跟我講，我係唔會去食。」

Frederick︰「你嗰個同事可能係一個中介，佢嘅副業就係專業約食飯，可能係咁樣！」

鍾沛枝︰「但我冇收過錢，佢可能會中間收咗啲利益，我不知道係咪有利益。」

陳倩揚︰「好慘！可能吃飯嗰位男士，會覺得你是收咗錢，你係一個收錢食飯嘅女仔。」

寂寂無聞

離開無綫，隨即考入國泰做地勤，一度成為傳媒追訪對象。

現年 35歲鍾沛枝， 19歲便參加港姐獲亞軍，同時被封「突破原美小姐」，其後鍾沛枝再代表香港於南非太陽城參選「世界小姐」，但無緣奪獎。

入行後鍾沛枝僅拍過劇集《金牌冰人》、《酒店風雲》、《天涯俠醫》和《天幕下的戀人》等，但都是二、三線角色，鍾沛枝在無綫大部分時間都是主持《都市閒情》。

在娛圈發展不如意，鍾沛枝 07年離開無綫，其後在娛樂圈銷聲匿迹，轉行去國泰做了四年地勤，輾轉又做過幾間美容公司公關，又開班教美容，辭工回復自由身，現在閒時幫家人打理燒味飯店，去年，被拍到與拍拖 3年的澳洲籍男友藍先生在中環置地行街，卻表示未有結婚打算。

68萬現金下午茶

通常港姐都特別會惹來一啲富商飛來蜢，陳倩揚同陸詩韻都收過男士慕名遞上名片，但都不及鍾沛枝，接下老闆級的秘書電話，相約食一餐有六十八萬現金的下午茶。

鍾沛枝︰「我試過收到啲不明來歷的電話，你唔知道佢哋點解會有你的電話？佢會打來話想約你食下午茶！佢話係某某嘅秘書……仲話俾一筆錢上車就可以先攞，然後就可以去吃喇！我話唔好意思……你係邊個，點解要同你食下午茶？而且仲要俾錢我食下午茶，我覺得很奇怪！佢話有六十八萬現金，你會覺得點解是六十八萬？六十八萬一個下午茶係好貴，而且仲要係現金，即是要攞住一袋嘢！但首先我唔會去食，拒絕咗佢！佢話喺黃埔咩酒店約你食下午茶……原來呢啲可能就是雜誌經常講嗰啲，我自己都有咁諗過！」

現年 35歲的鍾沛枝，自從去年同澳洲籍男友藍先生甩拖後，感情未再有着落。

鍾沛枝（右）同朱千雪（左）出現撞樣情況！

鍾媽媽 keep得好，同鍾沛枝出街似姊妹多啲。

Frederick︰「有沒有即刻同 TVB匯報？」

鍾沛枝︰「冇呀，冇話俾 Rosa知，我驚俾佢鬧！佢會問喺外面識咗啲乜嘢人，做咩俾電話人哋！」

陳倩揚︰「我冇試過冇呢啲經驗，問一下 Sharon！」

陸詩韻︰「其實派唔派卡片視乎個人，即是可能佢都係禮貌地俾你卡片。問題係我哋嘅身份，可能當選嗰年就會尷尬啲。因為我們左右都是護法！通常這種情況好少收到卡片，因為要俾或者聯絡的話，都係俾 Rosa或者同事電話。講真做空姐時收卡片收得仲多！我覺得港姐的身份反而令到一啲人有少少卻步同尷尬，即係你遞卡片過來做咩？佢都會覺得好似唔係太好。」