02年離婚嘅曾華倩，同囝囝林浩賢相依為命，為咗培育阿仔成材，無論晴天或雨天，華倩都會陪囝囝去泳池操水。
舊年華倩終於守得雲開，囝囝喺比賽中，打破兩項香港學界紀錄，更勇奪學界50米同100米自由泳冠軍。（新聞連結： http://bit.ly/2xm0qZo ）
華倩視阿仔如命根就係人都知，噚晚佢就陪出國比賽嘅阿仔去機場。點知喺機場就遇到不快事。
事緣噚晚有網民喺網上討論區開Po，點名指斥曾華倩送阿仔入禁區後，始發現自己銀包漏咗喺阿仔袋中，曾華倩要求機場職員代佢入禁區取回銀包，讀者指當時有人喺機場大吵大鬧發爛渣，更因此阻礙部份機場職員收工。
事後網民意見各有分歧，指華倩唔小心將物件帶入禁區，最後想勞煩機場職員代勞，自己有錯在先。但亦有網民指發帖者形同公審，而且言辭刻薄，當事人由於身份證以及信用卡，一併被送到入禁區，情急之下唔識處理亦係人之常情。
對於機場「銀包事件」一事俾網民公審，曾華倩回覆《蘋果》時，否認自己發爛渣，更反指斥噚晚喺機場遇到一個冇禮貎，兼且態度有問題嘅職員。「其實成件事就係我銀包放咗落阿仔個背囊入面，但佢入咗禁區我先醒起，當刻我衝去航空公司個櫃台，問職員有咩辦法，當時個人好徬徨，因為之前都未試過，都想問吓有冇人有呢個情況出現過。點知counter嗰度有個女職員就好冷漠咁話『冇㗎喎，我哋幫你唔到喎，呢啲係機管局安檢嘅問題，或者咁啦，當你個仔架飛機到境，咁佢咪可以去番入境大堂囉，但張機票就作廢啦，不過o依家飛機都就起飛，未必夠時間喎。』
「我唔明客人已經好着急，點解個職員仲會咁講嘢，根本唔係幫人，似係潑冷水多啲，其實佢做啲假動作，或者話『等我試吓』去安撫個客，成件事已經唔同晒。學劉德華話齋，今時今日咁嘅服務態度點得㗎，其實中間都有個男仔想起身話幫我試試，點知嗰位女職員即刻行埋嚟，個男仔就坐番低，所以個女職員應該係上司。」
華倩透露事後亦有搵入境署職員同警察幫手，但得出結果都係話安檢問題，叫華倩最好問番航空公司，最終銀包亦隨阿仔上咗飛機。華倩話本來件事喺噚晚已經告一段落，估唔到今朝瞓醒，竟然見到有人貼文將是非顛倒。「我唔明點解會有人寫啲咁刻薄嘅字眼去傷害人，亦再證明呢個世界上有好人同衰人，係邊個寫，自己心中有數，噚晚係半夜機，機場好少人，而噚晚遇到嘅，絕大部份都係好人……其實寫得出呢啲字眼，佢本身個人嘅人格都好有問題，自己對得住良心，都係嗰句，種善因得善果。」
|
鍾意就快D Share啦！
|
|
|