熱爆娛樂: 「後底乸」何雁詩強迫棄養，鄭俊弘用倒鈎鐵鏈綁狗 [壹週刊

2017年12月14日星期四

「後底乸」何雁詩強迫棄養，鄭俊弘用倒鈎鐵鏈綁狗 [壹週刊 - 1449] __,鄭俊弘,何雁詩,M1,

五月鄭俊弘放狗時，已經幫 Riley戴住這條釘帶。

娛頭

「後底乸」何雁詩強迫棄養，鄭俊弘用倒鈎鐵鏈綁狗

何雁詩做小三成功強搶走已經有未婚妻的鄭俊弘，兩人不理公司及家人反對，更發展到同居關係，何雁詩更做埋「後底乸」，要照顧鄭俊弘同前度 Beebs所養拉布拉多狗仔 Riley，本刊更曾影到何雁詩帶住 Riley去淺水灣，而且更親手幫牠執屎，好有愛心。

點知，呢份愛心只維持了唔夠一個月，何雁詩始終接受唔到 Riley是鄭俊弘同前度所養，加上 Riley亦唔多肯跟何雁詩，鄭俊弘於是幫 Riley戴上一條有鋒利倒鈎鐵鏈狗帶，唔理隻狗會因此被整傷，諗住可以控制隻狗，但最後何雁詩仍然不滿 Riley「篤眼篤鼻」，鄭俊弘惟有狠心將 Riley送走。

殘忍

這款釘帶布滿多個倒鈎，網上有圖片，因為狗隻用了這些釘帶，導致滿頸傷口。

同鄭俊弘剛公開拍拖初期，何雁詩都有帶 Riley出街，仲親手執屎。

Riley係鄭俊弘同舊愛 Beebs所養。

雪藏半年獲解封

鄭俊弘因為隱瞞有未婚妻同何雁詩搞埋一齊，再加上講大話呃老闆何哲圖唔認拍拖，轉頭又公開戀情，搞到老闆無晒面，最終兩人一齊入雪櫃，經過半年洗底，到上月才被解封，鄭俊弘獲安排在台慶有表演環節。

點知解凍唔夠一個月，鄭俊弘同何雁詩又有負面新聞發生，鄭俊弘同有米未婚妻 Beebs一五年拍拖期間，一齊養了隻黑色拉布拉多狗仔 Riley，當時兩個都當 Riley有如親生仔看待，由於鄭俊弘工作忙碌，湊狗責任落在 Beebs身上，所以 Riley同 Beebs的感情亦特別好。

近三個月本刊有密切留意住鄭俊弘同何雁詩，但未見他們再放狗。

日前鄭俊弘在 Ig post了同 Riley一齊玩的短片，但相信是之前所拍低。

有可能構成虐畜

愛護動物協會侯安娜醫生強烈反對狗主使用釘帶，她表示在任何情況下都不應該使用倒鈎頸圈，對動物帶來不必要的傷害，於香港使用此類頸圈可能會觸犯法例甚至變成虐畜；對於狗隻訓練方法應該以獎勵及肯定方法，而不是承受痛楚，倒鈎頸圈除為狗隻帶來皮肉上的痛苦，心理上亦有嚴重的創傷。

而保護遺棄動物協會創辦人陳淑娟表示，一般的狗種都不需要用到倒鈎頸圈，以往訓練員只會用於特別唔聽話、難控制及厚毛的犬種上；陳小姐更表示狗圈的用途是為狗隻帶來服從的信息，一旦運用不當會對狗隻造成極大傷害。

主動執狗屎

但自從鄭俊弘同 Beebs分手後， Riley就跟住鄭俊弘同住，而何雁詩由小三坐正，當然要做埋「後底乸」，負責照顧 Riley，剛剛接受做「後母」，何雁詩都好樂意照顧 Riley，會帶狗仔出外散步，本刊在四月份更影到何雁詩帶 Riley去淺水灣，同陳瀅及劉佩玥 tea time，其間 Riley更隨街屙屎，何雁詩仲親手幫牠執屎，真係唔話得

但「慈母」只維持了唔夠一個月，何雁詩始終覺得 Riley係男友同舊愛的寵物，唔係好接受到，而 Riley對慣 Beebs，唔會肯跟這個新女主人，有時都會好反叛，又會吠何雁詩，搞到何雁詩對 Riley好抗拒。

鄭俊弘因為被 TVB雪藏，導致零收入，好在何雁詩有家底，就算去超市都有女友負責俾錢。

何雁詩不理父母反對，堅持同鄭俊弘過同居生活。

極之唔人道

呢日鄭俊弘同何雁詩去西貢食飯，何雁詩著住貼身背心，好戰鬥格，難怪鄭俊弘咁冧。

為了要令 Riley聽話，鄭俊弘竟然搵了一條有倒鈎的鐵狗鏈（釘帶），幫 Riley戴上，而這類狗帶在香港一般寵物店根本無可能買到，唔適合一般寵物佩戴，因為只要拖狗者又或者狗隻本身稍為用力，這些鐵鈎都好容易會整傷狗隻，極之唔人道。而拉布拉多犬出名係好馴，馴到係可以做導盲犬，所以無可能要用到如此兇殘狗帶去對付。

「呢隻鐵鏈以前通常係訓練一啲好兇猛嘅犬隻用，不過近年都唔會有人用，因為太殘忍啦。呢隻狗帶雖然無被禁，亦都未係唔合法，但係香港唔會有寵物店買到囉，係要專登搵先會買到。」一名熟悉狗隻人士說。

據知，鄭俊弘除了用釘帶外，更有使用電帶，即係狗仔一吠就會觸電，為了氹女友手段好殘忍，雖然之後 Riley的確無再亂吠何雁詩，但係 Riley始終都係心繫 Beebs，何雁詩點都有條刺，人狗相處唔到，何雁詩同鄭俊弘為了 Riley經常嘈交，加上何雁詩情緒經常都唔穩定，又會自殘身體，為了唔刺激女友，鄭俊弘決定將 Riley送走。

女家唔 like

鄭俊弘與何雁詩高調認愛後，多月來，二人情海翻波，女方情緒一度受壓，而男方事業亦全部煞停。

被爆做小三

今年四月，鄭俊弘被踢爆收埋未婚妻 Beebs，而何雁詩則以小三身份，介入二人感情。

死撐否認拍拖

同日下午，何雁詩於 Ig留言「清者自清，行得正企得正」，急急否認小三身份，而鄭俊弘亦接受無綫訪問，稱無同何雁詩拍拖，亦已與未婚妻分手，唱片公司老闆更堅稱二人只是朋友。

高調認愛

兩日後，鄭俊弘與何雁詩突然十指緊扣現身機場，高調承認戀情。

割脈自殘

被圍插做小三，今年六月，有傳何雁詩大受壓力，情緒不穩，失控醉酒自殘，割脈送院，其後何雁詩出席活動時更刻意穿長袖衫遮手。

分手疑雲

上月，於好友陳嘉寶婚禮上，何雁詩被指醉酒後大吵大鬧，鬧某人是「衰人」，又衝口而出認單身，惹來與 Fred的分手疑雲。

遭何父冷落

本月初，何父因病入院留醫，女方特意安排男友前往探病修補關係，可惜何父表現冷淡， Fred最後無癮提早離開。

繼續扮好主人

鄭俊弘於是在幾個月前開始將 Riley送到親戚屋企暫住，不過他自己間中都會去探狗，又會帶狗去球場玩，而且每次他都會拍定唔少相片同短片，不定期放上社交網站，繼續扮好主人。片中見到 Riley唔使再戴住倒鈎狗帶被虐待，同埋玩得好開心。

而本刊在最近三個月都有密切留意住鄭俊弘，發現 Riley已經再沒有在他西貢寓所出現，希望鄭俊弘以後都唔好再接番 Riley返屋企。