曾俊華（中）上星期五出席洪拳展覽開幕禮，同《壹》仔講好享受依家嘅生活。
八卦陣
不應為上車而上車
前財爺曾俊華敗選特首後，除咗去參與視障人士組織嘅聲演會，開金口唱歌，又做電台同電視台節目，百足咁多爪。最近佢同《壹》仔講，依家心態轉變咗，「因為依家可以選擇做自己想做嘅嘢，但舊時係冇咁嘅選擇。」真係離開官場一身輕。
平時有習武嘅佢，最近出席城市大學一個洪拳展覽開幕禮，當日中華武學會創會董事趙式慶等武術界人士都在場。薯片叔叔話學洪拳多年，但因為太忙疏於練習，都唔敢講俾人知自己係洪拳中人。
佢喺香港電台擔任《香港故事──修復時刻》節目主持，之前惹嚟特首辦指佢冇申報。薯片叔叔話呢啲茶杯裡嘅嘢，根本唔值得係風波嚟，強調一直係循規蹈矩嘅人，好清楚守則，「根本唔係事情，根本唔應該發生。」似乎心裡仲有氣咁喎。
特首林鄭上場後將房屋問題列為「重中之重」，話要解決年輕人上車問題，又搞首置上車盤同大幅增加綠置居數量。薯片叔叔認為，無論青年人定成年人，都唔應該不惜一切為上車而上車，而要衡量成個人生發展，諗清楚自己呢一刻最需要啲咩，建議年輕人追求唔同嘅知識，先會對人生有利。
噸位以外新東初選三人理念比併
負責協調民主派參加補選嘅民主動力，早前公布初選機制同參選人之後，星期日喺城大舉行初選論壇。新東論壇比較多人討論嘅，似乎都係新同盟范國威話依家喺議會抗爭隨時被抬走，向工黨郭永健（細孖）下戰書，比併掌上壓或者跑步，俾細孖還擊話「橫又橫過你，高又高過你。」
之但係選議員，政綱重要過噸位，所以都係講番理念啦。身為工黨新任主席嘅細孖打勞工牌，中大學生會前會長張秀賢就強調自己年輕同政綱包含各類議題，咁啱兩個都向《壹》仔提及房屋問題。
細孖批評政府提倡增加私樓供應，「做大個餅」嘅做法無助降低樓價，因為仍然出現一個人買十層樓嘅情況，難以壓抑炒風同確保有需要嘅人可以有樓住。張秀賢都批評政府「置業為本」嘅方針，認為樓價急升，政府仲鼓勵市民置業係叫人接火棒。
至於喺立法會同區議會都做過議員嘅咖喱范，當然主打多年地區同議會經驗，又重提港府應該有單程證審批權。不過講起議會抗爭，佢有啲打定輸數，話一旦議會路線再受打壓，佢會推動「社區維權」，透過深耕細作喺社區凝聚民氣、保存實力，等待下一波抗爭時機一到，就乘勢而起。
與岑敖暉或再入獄
何潔泓：不悲不喜
十三名社運人士因三年前新界東北撥款案，早前被改判即時監禁八至十三個月，上月底終審法院批出其中八人嘅保釋申請，包括土地正義聯盟召集人何潔泓，入獄三個幾月後，終於暫時可以再呼吸自由嘅空氣。
至於男友岑敖暉嘅佔旺案，判刑雖然再被押後，不過佢都可能因此入獄。遲啲何潔泓如果上訴失敗，就要繼續服刑，兩人只能透過短暫視像通話，定期見一陣。
面對隨時再同男友喺鐵窗內隔住個芒見面，何潔泓心情相當平靜，星期日出席一個紀錄片放映會後，同《壹》仔講自己「不悲不喜，當係生命經歷嘅一部分」，唔會太擔心或者傷感，因為抗爭者面對政權打壓，係民主運動路上嘅必經階段同代價。
憶述自己入獄嘅日子，何潔泓話好快喺裡面搵到定位，因為唔少囚友學歷較低，佢可以擔任翻譯、幫手寫信、聽佢哋嘅故事等等，而呢種交流同相處令佢覺得好有力量，覺得自己喺入面做到好多嘢，幫到身邊嘅人。
參演港版《丹麥女孩》慢必做自己
人民力量立法會議員「慢必」陳志全，做過電台節目主持同演員，最近忙住同建制派議員就修改議事規則喺議會打仗，但忙還忙，都抽到時間重操故業，客串拍電影。講緊嘅係由舒琪監製，今屆「鮮浪潮」電影節最佳導演李駿碩首次執導嘅《翠絲》（港版《丹麥女孩》）。
電影講述變性人男主角翠絲，發現自己有做女性嘅傾向，之後逐步去實踐，當中面對嘅困難同壓抑。翠絲一角由剛奪得人生首個電影獎項、國際電影人年展最佳男配角嘅姜皓文（黑仔）演出；新鮮出爐金馬影后惠英紅，會飾演佢老婆。
慢必一向為同志平權發聲，佢透露星期三立法會今年會期結束之後，就會去參與拍攝，至於接拍嘅主要原因，係因為十幾年冇拍過戲。佢話喺戲中會做番自己，即係一名立法會議員，其中一幕係會開記招，為受歧視嘅性小眾爭取權益。
其實慢必以往參演過好幾套電影，包括香港 cult片代表作之一嘅《生化壽司》，亦喺《古惑仔：龍爭虎鬥》飾演拳擊旁述，演技都唔錯㗎。預計《翠絲》下年會上畫，到時又可以一睹慢必嘅演技喇。 A
撰文:巫不言
|
鍾意就快D Share啦！
|
|
|
