遊行隊伍無法再前進，於是就地打小人臭罵林鄭及陳茂波等官員一番。
八卦陣
人社「港毒」鬧爆政府
社民連等團體喺啱啱過去嘅星期日，亦即係「驚蟄」前一日發起遊行，反對肥上瘦下嘅財政預算案，要求還富於民。遊行隊伍行到夏愨道嘅時候，人民力量成員譚得志（快必）帶領遊行人士一齊打小人，鬧爆林鄭同埋三個司長，句句毒辣，記者朋友都忍唔住笑。
話說當日全部人下晝兩點半喺遮打花園出發，原定遊行到政府總部。去到添馬街同夏愨道交界時，警察話遊行人數唔夠一千人，唔開夏愨道橋底俾遊行隊伍行去政總，話要行天橋過去。
遊行隊伍嘅代表同警方僵持咗差唔多兩個鐘，都係傾唔掂數，最後一大班人就地打小人。大會倒出幾十對拖鞋，快必嗌咪，參加者邊打，齊齊招呼林鄭同埋佢手下三個「猛將」：「打你個醉駕波，打到你撞車碌咗落山坡」、「打你個僭建驊，打到你甩肺生 cancer」、「打你個肥佬張建宗，打到你條條骨骼都疏鬆」、「打你個林鄭 777，打到你個仔俾公安老屈」，認真毒辣，唔怪得連長毛梁國雄都講笑咁話大家係「港毒」。
街頭祭壇反法輪功，小學雞咒人死
「青關會」之類組織多年來一直與法輪功打對台，大力宣傳「反邪教」，佢哋沉寂咗一段時間後，放完農曆新年假期後再次活躍起來，而他們的宣傳攻勢已經跳出了傳統的框框來一個大「升呢」，創作力與幻想力都嚇人一跳。《壹》仔上週週末經過銅鑼灣，發現街頭出現了一個吹氣大型祭壇，壇中間掛咗法輪功創辦人李洪志張相，仲有祭品、水酒與香燭，側邊又掛滿「法輪大法好」、「真善忍」等等直幡，唔知頭唔知路者隨時仲以為係信徒悼念「教主」，認真嚇人。
不過，貨真價實的法輪功學員就喺呢個「祭壇」對面默默練功，又掛上「青關會停止謊言」等橫額，所以呢個「祭壇」原來就是反法輪功組織的「傑作」，擺明有人是要詛咒「李洪志去死」，小學雞得嚟都幾惡毒吓。《壹》仔再睇真啲，發現祭壇上面嘅水果祭品都是膠造的玩具，香燭就係入電池嘅 A貨，製作仲未夠認真喎。不過，呢個無標明組織發起團體，又無人看守，搞手到底係響應環保還是成本有限，就只有佢哋自己先知道喇。
雖然「祭壇」無王管，但警方唔知係唔係怕有人手多多，之後又被屈偷嘢，唔單只架起鐵馬圍住個祭壇，又有大批警員在旁戒備，結果「拘捕中學生」風波沒有再重演，就連好事之徒想拜祭吓都有啲難度。
維園阿哥戰補選，政界冇人撐
星期日就係立法會補選，不幸要投呢一票嘅你，應該陸續收到各候選人嘅選舉郵件。先後效力社民連、人力，又幫過白韻琹助選嘅「維園阿哥」任亮憲（馬草泥），就參加港島區補選。
《壹》仔睇過佢份選舉郵件，得一張紙，正、背面都有競選口號同自己個樣，郵件背面支持佢嘅人，三個都係財經界人物，一個政壇中人都冇，當中包括金融作家渾水，以及「股壇燈神」沈振盈。馬草泥係冇聽過沈大師大名，定想挑戰其「燈力」搏勝出？
講開又講，馬草泥自從幫白姐姐助選後，人緣相當差，先有舊黨友、人力陳志全（慢必）喺 Facebook上載已經撕爛嘅合照兼發聲明割席，後有工黨李卓人上星期喺 Facebook開名鬧馬草泥，話對方「賊喊捉賊」，唔插政府 DQ周庭，走去話 Plan B區諾軒「執死雞」，係為上位冇原則嘅變色龍。
上星期財政預算案公布當日，馬草泥都有去立法會示威，不過只有老豆前立法局議員任善寧同佢一齊，人丁單薄得出奇。有人話佢隨時係黑馬，只能放長雙眼，睇吓佢最後幾日點發力啦。礙於選舉條例規定，《壹》仔要提提大家，港島區候選人還包括伍迪希及陳家珮。
區諾軒選前衝刺，周庭 cosplay打氣
立法會補選臨近，區諾軒上星期六喺愛丁堡廣場舉行造勢大會，泛民各個黨派都有派人撐場。佢會後接受《壹》仔訪問時講到對手陳家珮選舉期間忽然加碼批評領展，佢就回應話：「我相信選民係有智慧……唔係選舉（擇）臨時話爭取嘅候選人。」
當晚嘅造勢大會喺夜晚七點左右舉行，有幾百名市民參與。李柱銘、梁家傑、黃之鋒等都有上台講嘢，一向支持民主運動嘅明哥黃耀明亦上台唱咗兩首歌為區諾軒打氣。區諾軒喺台下聽到眼濕濕。大會仲播咗周庭被 DQ前嘅一段宣傳片，區諾軒有份出鏡同做旁白，估唔到今日變咗做自己嘅宣傳片。
點燈集氣前一晚，周庭同區諾軒老婆，將佢嘅辦事處布置成日本動漫《銀魂》嘅「萬事屋」咁，周庭自己就 cosplay女主角「神樂」。周庭話「萬事屋」係一個保存初心嘅地方，希望區諾軒可以有力勇往直前，又幾有心思喎。搞笑嘅係，區諾軒本身其實係《銀魂》嘅擁躉，一眼就洞悉周庭嘅計劃，睇到自己辦事處變成萬事屋後，笑住口咁講：「搞到咁點算呀？」
撰文：巫不言
news@nextdigital.com.hk
|
鍾意就快D Share啦！
|
|
|
