著吊帶裙的杏兒大晒三吋事業線，成功搶 fo！
探熱針
布吉返港謝晒皮，杏兒 Philip開行 turbo追多個
一向事業心重的胡杏兒，自從升級做阿媽，俾得意仔 Brendon（李奕霆）融化，唔願復工不特止，仲話要食住上追多個。
言出必行！新年過後，杏兒同老公李乘德（ Philip）撇甩 B仔，飛去布吉享受陽光海灘。難得過二人世界，兩公婆把握黃金機會努力造人，分分鐘兩個去三個返喇！
唔只追一個
結婚當日，杏兒在「李家祠堂」對住鄉親父老戲言要「一年抱三」。結果婚後年半，杏兒一索得男，誕下李家長子嫡孫，總算有個交代。不過杏兒未打算收手，早前接受本刊訪問，仲話：「一定追多個！唔只一個！」今次兩公婆趁住要飛布吉出席朋友婚禮，決定放低 B仔，享受二人世界。
「阿 B出世差唔多五個月，兩公婆都冇時間二人世界，今次咁啱有朋友喺布吉結婚，佢哋要去觀禮，咪乘機去拍吓拖，抖吓氣囉！其實杏兒都唔捨得㗎，不過阿 B喺香港有嫲嫲睇住，佢哋一萬個放心喇！」杏兒身邊人透露。
谷奶升 cup
上個星期，杏兒同 Philip出發飛去布吉後， Philip急不及待打卡，喺 Ig po咗同老婆自拍相。相中的杏兒著住白色吊帶裙，露出三吋事業線。比起以往骨杉杉身形，做咗人母的杏兒明顯又再升 cup，難怪早前杏兒得戚自爆餵全人奶，睇嚟呢位新手媽咪奶水好充足！
返港謝晒
布吉之旅四日三夜眨眼過，兩公婆坐夜機返港，出閘時李生李太謝晒皮，冇化妝的杏兒頭戴白色 Balenciaga潮帽，一身運動服，面青青，個樣攰到爆！至於尾隨的 Philip推住兩個大喼，一樣冇厘神氣。兩公婆一前一後急急腳直奔去停車場，杏兒交低行李比老公後，自己火速跳上車。
限量接 job
去年憑住劇集《那兒花開月正圓》，杏兒在內地人氣急升，不過自從 B仔出世後，杏兒事業心熄滅，連推幾套劇集，就算廣告商重金禮聘杏兒同 Brendon母子檔亮相，她都不為所動。
「杏兒都冇諗過自己會咁大轉變，佢本來真係打算一坐完月就復工，但 BB真係太得意、太好玩，根本唔捨得放低佢去開工，所以拍劇一定唔使諗，啲簡單嘅 job都可以限量接吓。」
全職媽媽
圈中有不少女藝人生 B後，對幕前無心戀戰，甘做全職媽媽，以湊仔為樂，無復出打算。
官恩娜
15年，誕下囝囝 Bé Bé G後，官恩娜對歌唱事業完全放低，全情投入湊仔生涯。今年一月她再誕下細女 Aurelie，雖然推出新歌《寶貝女》送給一對仔女，但仍未有意復出，就算一直有不少廣告及商場騷敲門， Ella都不為所動。
撰文：娛樂組
攝影：陳亦龍
|
鍾意就快D Share啦！
|
|
|
