(互聯網)
球場失意、賭場得意呀！巴西球星尼馬喺今屆世盃失望而回，除咗話「森巴兵團」令人失望8強出局之外，佢自己亦落得孭起「碌神」之名，畀人串爆佢喺球場經常「碌地」扮受傷。雖然喺球場慘成過街老鼠，但尼馬依然繼續享受人生，今個星期一，佢同國家隊隊友加比爾捷西斯等一行六人，去到巴西聖保羅參與一項撲克比賽，佢仲勁爆殺入決賽，家陣等住爭逐高達78,000歐元冠軍獎金添！
查實尼馬鍾意玩撲克都唔係新鮮事，之前佢都試過因為受傷長抖太得閒，去參加過其他撲克比賽。不過，今次佢唔知係咪受到失意世盃刺激，喺呢項名為BSOP撲克大賽嘅賭檯上格外神勇，結果喺多達288位參賽者中，佢打入最後9人決賽，有機會爭冠軍。
尼馬喺球場上或者打過唔少決賽，但能夠喺撲克比賽殺出重圍，真係冇乜幾何。只係好衰唔衰，原本決賽定係周二晚，卻又撞正尼馬要為老友婚禮做伴郎，或要被逼缺席。好彩，BSOP賽會考慮到好似尼馬咁大牌嘅人物參賽，係個絕佳宣傳機會，因此喺徵得所有決賽對手同意之下，宣布將決賽延期，而因延期引發嘅所有酒店同機票開支等，賽會仲肯全部承擔，都算唔話得。至於嚟緊決賽會喺日內舉行，究竟尼馬可唔可以由「碌神」變「啤神」，《東網體育》一定會繼續為大家追擊報道！
東網體育同你追實體壇每個精彩時刻！
https://goo.gl/ewVpvE
來源 source: http://hk.on.cc
|
鍾意就快D Share啦！
|
|
|