睇住閨蜜寫真去旅行 Kimi x 沙律帶你影盡全台灣
撰文：Maymay @新假期｜相片：司徒夾帶
睇住閨蜜寫真去旅行 Kimi x 沙律帶你影盡全台灣
台灣閨密遊~打卡景點推介
01. 走進宮崎駿的家
閨密旅程，當然是影靚相行先，談到最靚景點，Kimi和沙律首推「點影都靚」、色彩繽紛的台中彩虹眷村！小村內，不論門窗、郵箱甚至水渠蓋，鋪天蓋地都是「彩虹爺爺」黃永阜塗上了彩繪，日本傳媒更將他比喻為「台灣宮崎駿」，謂他的畫有療癒作用！
想在宮崎駿之家影靚相，Kimi和沙律建議於黃昏時間到訪，一來可避開人潮獨霸小村慢慢影，二來斜陽照射到壁畫上，色彩會更見繽紛鮮艷，學Kimi話齋：「會多添一份民族感。」
台中最紅打卡勝地
事實上，彩虹色壁畫，加上充滿童真的卡通、動物和祝福語句，確是頗有人文色彩，但原來此村的保留，背後也有人文因素。隨着時代進步，政府開始清拆國共內戰後用來安置老兵及其家眷的眷村，約在十年前，彩虹爺爺眼看村子反正也要被拆，就頑皮一次來個改頭換臉，先是自己家的牆壁，繼而再到屋外小巷⋯⋯
結果，這條50米的彩色巷弄成功吸引了政府的目光，並於2014年重生成「彩虹藝術公園」，規模愈來愈大，而黃爺爺則繼續居於村內，每天則為壁畫補色，讓它們歷久常新，難怪任何時候來影都咁靚！
閨密打卡貼士：要襯姊妹裝
Kimi：最基本當然是同色不同款、同款不同色，多數都係同一Color tone，例如粉紅粉藍就最好襯，有時都會match番我哋性格來揀，例如呢套民族服，我就著黑色，因為我性格比沙律剛強，氣質女人味紅色，就留畀佢
彩虹眷村
地址：台中市南屯區春安路56巷
電話：+886(0)920-162-888
開放時間：8am-6pm（商店）
交通：台中市區乘往新烏日火車站方向的56路台中市公車，於彩虹眷村站下車
網址：
02. 墾丁住進外星麵包屋
由十數個圓形麵包屋組成的朵朵堡民宿，十足童話世界，有見及此，Kimi和沙律索性Cosplay起來，變身《IQ博士》中的機械人小雲，來此尋找最愛的粉紅色便便，還居然讓她們找到！
這粉紅色便便，其實是四人套房的浴室外牆，和客廳麵包屋和睡房麵包屋等連起來，便成了寬敞的堡壘！由於麵包屋樓底比一般酒店房間要高得多，說話時還有回音呢！二人說麵包屋設施也算舒適，不過唯一要彈的是早餐質素麻麻，須知道民宿離恆春鎮車程約8分鐘，附近較荒蕪，入住前最好先去便利店買定零食以備不時之需！
閨密遊貼士：Cosplay小道具
Cosplay不一定要穿著和卡通人物完全一樣的衣物，最緊要在出發前多看看該景點的環境，有甚麼可以影的背景，然後選購相關道具，突顯角色形象！好似我呢套小雲衫，帽、眼鏡和小便便也是預先準備好的！
家庭客可愛民宿
戀戀墾丁朵朵堡民宿由十多個麵包屋組成，猶如童話村！雖然主打家庭客，大部分房間都是四人房，雙人房只有一間，就讓我們住下來了！不過我們到訪後才得知，老闆原本的設計意念是《天線得得B》的家，而非《IQ博士》！
戀戀墾丁朵朵堡
地址：屏東縣恆春鎮德和路231-1號
電話：+886(0)8-888-1695
房價：二人房平日每晚NT$2,980/HK$765起、四人房平日每晚NT$3,680/HK$945起
交通：墾丁大街乘車約18分鐘可達，恆春鎮乘車約8分鐘
網址：
03. 為影相而建的情人橋
去過「經典」打卡點彩虹眷村，Kimi和沙律再為大家推薦近年爆紅的打卡點：「呢條粉紅色步行橋本身已經好靚好浪漫，襯埋粉色造型簡直一流，專登去影相都值得！」位於台中市大坑的粉紅色步行橋，可說是近年台中最紅IG打卡點之一，隨便輸入hashtag便已找到成千上萬的post，更有網民話：「興建此橋的首要作用為拍照，第二才是步行！」
話說政府在整頓新開發的住宅區大坑時，一次過築起了四條大橋，各有主題：拱橋形狀的新桃花源橋，如像古典吊橋的藍天白雲橋，綠色狀似蝴蝶的大坑清新橋，以及以粉紅色外表成功彈起的浪漫情人橋，這亦是四橋中唯一的行人專用橋，附近居民可每晚來此漫步談心，多浪漫！「情人橋兩頭有不同背景，一邊是附近的住宅屋苑，另一邊是山景，後者影出嚟靚好多！我哋揀咗1-2pm左右去，光線好啲，千祈要避開正午12點去，太陽在頭頂，唔靚㗎！」聽Kimi滔滔不絕，所以說，「打卡」也是大有學問的！
閨密遊貼士：一鼓作氣衝去影相
Charlotte：在人多的景點影相，要克服畀人眼望望的心理關口，秘訣係：一鼓作氣衝埋去，影完就走！不過台灣打卡文化盛行，大部分人都對影相見怪不怪，放心影
台中浪漫情人橋
地點：台中市祥順東路一段與景賢路交界
開放時間：24小時
交通：台中火車站乘往潭子火車站（東站）方向的20號台中市公車，於祥順軍福七路口站下車，再步行約3分鐘即達
04. 瞓身粉紅色甜筒大海
兩個女孩，除了扮靚影相，當然也愛甜品！為了一次過滿足兩個願望，Kimi和沙律跑到台中人氣雪糕店I’m Talato去！Talato就是Taiwan + Gelato的結合，亦即以台灣時令水果來做Gelato，標榜乳脂肪含量低，不放任何人工添加物，食多多都無咁有罪惡感，而且還間接幫助台灣小農，推動農業經濟！
最貼心的打卡勝地
說起來意義重大，不過Kimi坦言：「雪糕味道無甚特別，我都係鍾意個雪糕池多啲，任何女仔嚟到都會唔捨得走！」也對，I’m Talato之所以熱爆IG，靠的就是那雪糕泳池，泳池內有約二十個巨型甜筒，讓女生置身在雪糕海中，滿足平日不能狂吃雪糕之慾！而店家也相當識做，在泳池上方設置高位，讓閨密替你拍下這經典場面，瘋狂呃Like！
招牌甜品，微暖的Brownie配上冰凍北海道芝士雪糕，再淋上有機士多啤梨醬，香甜Creamy，加多NT$80/HK$21配多一個時令水果雪糕球，滿足！
閨密遊貼士：Top Shot顯瘦影相法門
Kimi話呢個雪糕池一定係Top Shot最靚，如果想影相時顯瘦，記住不可以完全Relax瞓晒落去，可以用少少力抬腰或抬腿，條頸就可以用手托一托。
塔拉朵I’m Talato（英才路旗艦門市）
地址：台中市西區英才路451號
電話：+886(0)4-2305-8908
營業時間：11:30am-8:30pm
交通：台中火車站乘往嶺東科技大學方向的27路台中客運公車，於英才向上北路口下車，再步行約1分鐘即達
網址：
備註：採現場售票制每位NT$150/HK$39，但門票可作店內消費
05. 維京式又影又食粉紅Cafe
只吃雪糕又點會飽？北上台北，沙律向我們推薦了板橋的人氣Cafe「維京女王」，整間店如像加了粉紅色Filter，不止招牌外牆，連店面柱樑枱布座位，無一不是粉紅色！這還不止，店內還有巨量影相道具：傻豹、勞蘇、StellaLou、紅鶴，無一不是少女們大愛items！
最重要的是，這裡的食物質素高，價錢也合理，一個足料天王牛肉堡才NT$140/HK$36，而且還可選擇抹茶漢堡包，粉綠色的外表已經夠夢幻，吃來還有淡淡的抹茶甘香呢！「呢度食物質素高，環境又靚，難怪超多人！假如客滿的話，用餐時間便只得90分鐘，都唔知夠時間食定影相！」正因如此，沙律推薦大家如想有足夠時間影多點相，最好選擇於午餐前到訪，千萬不要像她們在下午茶時段到訪！
讓沙律念念不忘的抹茶漢堡包，甘香茶味配上厚肉Juicy漢堡扒、煙肉、芝士和蔬菜，足料！還可加NT$69/HK$18升級至套餐，有薯條和紅茶。
閨密遊貼士：呃like至上
Cafe要做到影相靚，食物又好吃是非常難得。好似旅程中我們到了台南的神田のLa Vie風格誌Cafe，嗰度啲食物真係靚到好似藝術品咁，不過質素就好一般喇，我哋仲要係肚餓時去⋯⋯惟有當「食環境」
維京女王
地址 : 新北市板橋區貴興路117號
電話：+886-(0)2-2957-0700
營業時間：9:30-5pm（星期六及日由8:30am開始），逢星期一休息
交通：台北市捷運板南線至亞東醫院站，於3號出口步行約10分鐘
網址：
備註：每人最低消費NT$100/HK$26，客滿時用餐時間為90分鐘
這是一本「旅遊呃Like Guidebook」
Kimi和Charlotte（沙律），雖憑過人外表俘虜萬千少男心，但內心其實也是普通少女一名，愛旅遊、愛甜品更愛影靚相！如兩女所言：「唔係淨係針對男讀者，希望可以當作一本寫給女生閨密的『旅遊呃Like Guidebook』。」
內裡除了二人wallpaper寫真，還有不少旅遊貼士、影相秘技、造型分享，連「伏味」景點亦有包括在內，絕非一味唱好的旅遊書可比！今次率先和大家預覽寫真，看看這兩位新紮旅遊記者交唔交到貨！
出書紀錄閨密友誼
Q：你們二人的相識經過是？
Charlotte：透過ViuTV選美節目認識Kimi，那時還不算太熟，只知佢好多嘢講，好活潑鍾意結交朋友。後來佢邀請我一齊拍facebook Channel節目，節目同「閨密」有關，不知不覺就成了真．閨密，仲經常相約吃辣！
Kimi成日話我份人無機心，傻吓傻吓，畀人呃咗都唔知，好彩Kimi好有義氣，遇到我畀人恰，會立即替我抱打不平！有佢呢個朋友真好！
Q：去旅行時分工如何？
Kimi：我負責Plan行程，佢就負責乖乖跟住我，哈哈！閨密去旅行，總有人鍾意Plan行程，有人鍾意「唔帶腦」，我哋性格一凹一凸，每次去旅行，沙律都會預先send幾個最想去景點給我，咁我就負責Plan路線行程。
沙律份人好無所謂，只要去到那幾個最想去的地方，其餘的都任我擺布！佢好信任我，連著嘅衫都係由我發辦，所以出發時我行李重38kg，佢的只有10kg！
Q：旅行時係咪Share房？有冇爭廁所用？
Kimi：就係要試過Share房，先稱得上「真．閨密」嘛！我們之前已經去過日本白川鄉旅行，對大家生活習慣都好熟悉，是真正的「天生一對」！會否爭廁所？唔會啦，我哋一齊沖涼㗎，佢洗頭時我沖涼，之後就到我洗頭佢沖涼，生活習慣完全無問題！
Q：今次行程有冇難忘事？有咩景點最伏？
Kimi：今次旅程總共去咗33個景點，玩遍台灣北中南，行程非常趕，基本上所有景點推介都寫咗喺書度，只有一個例外，就係關嶺的景大渡假莊園！見他們說有泥漿溫泉，以為可拍出泥漿浴效果照片，但其質感完全不是泥漿，最多只可說是「泥水」，有嘗試敷泥mask只影大頭相，但最後都係覺得d相太唔靚，索性唔放落書度！奉勸大家，想玩泥漿浴要找別的啊！
|
鍾意就快D Share啦！
|
|
|