前港姐冠軍馮盈盈早前同麥明詩和陸浩明等主持嘅節目《#後生仔傾吓偈》發表「公廁論」，令大家非常嘩然，而身為港姐嘅莊思明亦都直指對方嘅言論好Cheap，唔應該咁講嘢！不過作為盈盈好姊妹嘅麥明詩再度喺網上力撐對方，反問：「何謂Cheap也？」似乎隔空反撃莊思明嘅言論。
思明喺社交網發文畀所有Haters：「不要再用不負責任的言論去攻擊人，每個人都有自由去表達自己的感受，沒有人是對或錯！你們不容許別人有其他想法，你們會想盡辦法用最毒的字眼去傷害那個不認同你的人！這種思維很恐怖，但我不會畏懼！」之後又話：「我做人從來都係對事不對人，但好明顯有人係對人不對事，不想再講因為無道理可言。」佢亦有反擊批評佢嘅網友話：「點解你做人咁冇禮貌？你支持邊個冇人Care但其他人都可以講自己嘅感受！如果得你支持嘅人先可以發表偉論咁不如你搬去北韓，嗰度適合你多啲因為你係接受唔到其他人同你有相反意見！我由頭到尾只係回應咗記者嘅問題講出自己嘅感受，我唔需要全世界人認同我因爲每個人感受都唔同！」
而作為思明嘅男友楊明都喺網上維護女友，留言：「今日睇有網民不斷人身攻擊思明，我有點驚訝，驚訝嘅係原來有些網民係咁惡㗎？！思明從頭到尾都係對事冇對人，記者問佢聽到呢啲用語喺節目出現有什（甚）麼感覺同見解，佢祇（只）係答咗自己對這些用詞嘅感覺啫，都唔得？唔係咁惡吓嘛！唔通同你哋嘅思維唔同嘅人就係你哋嘅敵人？咁成世人咪好唔得閒？各位大俠，如果真係覺得自己支持嘅想法係有道理嘅，點解唔用你哋嘅鍵盤將你個理由同真理講出嚟，睇吓可唔可以改變到人呢？」又指「唔識尊重別人你都會盡量尊重吓自己吖...係咪？」不少藝人都有畀讚。
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
