前日《蘋果》獨家踢爆世紀賤男黎振燁背妻偷食大台「姣精」朱智賢，女方明知男方有老婆，亦不惜背男友謝東閔偷嗒人夫。成件事最大受害人莫過於下個月生得的黎太。《蘋果》收到消息，黎振燁原定於今日下午，會拖着大肚老婆步出黃大仙寓所，並齊齊上無綫預先安排的車輛，直駛往電視城，為偷食事件拆彈。可是，據知已原諒老公的黎太，最終臨時改變主意不肯現身，令賤男相當頭痕，不過最終能否氹掂大肚老婆公開表示原諒自己，則是未知數。另一邊廂，大台今日下晝4時半會安排另一對情人朱智賢和謝東閔到電視城現身交代。
黎振燁唔陪大肚老婆產檢，反而做觀音兵陪朱智賢睇醫生兼「車廂偷食」，證據如山無得反駁，因此大台高層連日絞盡腦汁商討如何拆局。有傳昨日一班高層終於諗到「絕世屎橋」，便是讓賤男拖大肚老婆今日現身並亮相節目，最初高層要黎振燁和黎太在鏡頭前搞場大龍鳳，還打算派出公司車接黎振燁和太太到電視城。不過最終計劃因太太懸崖勒馬，大台的如意算盤亦未能打得響。
據知，黎振燁2月初才和公司續簽5年長命約，加上朱智賢有三部劇未上，包括：《踩過界II》、《愛美麗狂想曲》和《食腦喪B》，經歷去年「安心事件」並拖累黃心穎有份演出的劇集《法政先鋒4》需要重拍，大台為怕歷史重演，因此今次要求大肚黎太現身親口說原諒賤男，為事件淡化降溫。但如今黎太不願出鏡，只得黎振燁一人亦無補於事，故男方暫時不用返公司。有指大台「棄男保女」，所以今日安排另一偷食主角朱智賢和男友謝東閔現身交代，但朱主持的《東張西望》工作，則要煞停一段時間，藉此過冷河。
黎振燁兩年前曾拍攝由陳耀全監製的劇集《是咁的，法官閣下》，原定陳耀全在9月開一套關於拳擊的新劇，已預定黎振燁飾演一個重要角色，便是做視帝黎耀祥由外國回流返港的兒子，可是，由於黎振燁背妻偷食形象破產，因此監製決定易角。他現時等候大台發落，老婆不願配合「演出」，未知能否挽回剩下所餘無幾的形象。
-----------------------------
App內1-Click訂閱《蘋果動新聞》
按此了解更多
來源 source: http://hk.entertainment.appledaily.com
|
鍾意就快D Share啦！
|
|
|
