2020年5月8日是一代歌后鄧麗君（Teresa）逝世25周年，世界各地的歌迷籌備眾多紀念活動，包括前往台北金寶山鄧麗君墓園拜祭，其中既是歌迷，亦是鄧麗君的私人廚師兼管家的張金美，貼身侍候偶像多年，兩人的感情特別深厚，每年都會親身前往金寶山探望Teresa。可惜今年遇着武漢肺炎疫情影響，一切原定的活動均要取消，對張金美和所有歌迷而言是相當失落和無奈。
雖然無法親身前往台灣探望，但張金美日前就應《蘋果》邀請重回Teresa生前居住的赤柱，回味當年偶像在這地方的生活點滴。張表示Teresa在1987年搬到赤柱，當時仍未算熱門遊客區，環境相當清靜，Teresa更經常會到赤柱市場，即現在的赤柱大街買花和飲咖啡。
花店老闆：次次揀粉色玫瑰
十年人事幾番新，何況已經25年？大街上的店舖已面目全非，惟獨位於街頭Teresa以前經常光顧的花店依然不變，畢竟是認識多年的舊街坊，老闆羅先生甫見張金美即熟悉地互相寒暄一番，即使已事隔多年，但老闆對Teresa的記憶仍然深刻︰「鄧小姐喺屋企鍾意插花，每隔幾日最多一個禮拜就會落嚟一次，每次都會揀玫瑰，特別係粉紅色。」老闆又憶述Teresa為人隨和無架子︰「佢把聲好溫柔，好有禮貌，每次見面都會問候吓我，大家閒話家常，我有同佢講鍾意聽佢嘅歌，鄧小姐好開心咁話『多謝』。」
走到赤柱海邊，張金美憶述Teresa愛望海，以前會沿海邊漫步到赤柱海灘游水︰「以前呢度好少人，卜公碼頭同美利樓都未搬嚟，啱晒鄧小姐佢鍾意清靜。」沿海的一排餐廳中，張金美指着一間海邊的餐廳表示︰「呢間餐廳以前係粉紅色外牆，鄧小姐最鍾意粉紅色，所以每次都嚟呢間，最鍾意坐一樓近窗邊嘅位置，有時約咗朋友見面傾偈一坐就兩、三個鐘。」眼前的餐廳已變成黃色外牆，張金美語帶欷歔地稱︰「呢間舖轉過好多手，都過咗廿幾年，咩都唔同晒」轉入赤柱內街，售賣紀念品及飾物的舖頭成行成市，張金美表示Teresa間中都會在這裏買飾物︰「佢對生活好有要求好有品味，特別鍾意中式嘅物品，有時喺度見到啲枱布、餐具，佢都會買返屋企。」
為偶像信守承諾看管大宅
Teresa的故居位於佳美道18號，為一幢兩層高建於50年代充滿歐陸風情的大宅，居高臨下飽覽整個赤柱海景，張金美憶述自己由1991年開始為大宅任管家，直到1995年Teresa離世後，仍然留守至2004年大宅地皮轉手才遷出，她坦言︰「我住喺度嘅日子仲多過鄧小姐，佢走咗之後，所有嘢都係佢屋企人打理，佢哋兄弟姊妹對我好好，畀我一路繼續喺度住。」張金美表示Teresa愛寧靜，平日最愛坐在花園邊嘆茶邊賞花，相當寫意，不過眼見Teresa的故居被拆卸重建變成獨立屋，張金美看到此景不勝唏噓，指着旁邊的位置說︰「全部嘢都唔同晒囉，25年唯一冇變就得番側邊呢幅牆同呢棵樹。」留守偶像舊居十多年，張金美表示最重要是因為一個跟Teresa的承諾，她說︰「鄧小姐臨去泰國前同我講：『金美，你要幫我睇住間屋，而家啲人信唔過，其他人我唔會講，我淨係相信你一個。』」段段回憶湧上心頭，張金美的淚水亦徐徐落下。然而，其家人終決定在2004年將物業轉手，對張金美而言總算不負Teresa所託︰「我當時覺得終於完成任務，其實佢屋企人都曾經想我去幫佢哋手，但係我覺得已經遵守咗鄧小姐嘅承諾，好好睇住間屋，既然而家決定賣，咁我都可以光榮引退。」
誤打誤撞加入歌迷會
今年60歲的張金美是緬甸華僑，跟絕大部份人一樣，早已接觸過鄧麗君的歌曲，之後來港，誤打誤撞下和妹妹一同加入歌迷會，張金美形容是鄧麗君影響了她一生︰「本來我淨係鍾意聽佢啲歌，冇諗住參加咩活動，當時我個妹年紀細，我唔放心佢自己出去於是就跟住佢，可能係緣份，慢慢就同歌迷會會長熟絡咗。」那些年的偶像非但未有高高在上，反而經常相約歌迷私下聚會︰「我記得有一年鄧小姐話要去法國進修三個月，想搵識煮嘢食嘅人照顧佢飲食，可能我一向都好靜唔出聲，歌迷會會長覺得適合就介紹咗我，當時我媽咪都好贊成。」
張金美直言自己是芸芸歌迷中最幸運的一人，在三個月的法國之旅中，Teresa更像一位姐姐般照顧她︰「佢成日同我講，做女人要識儲錢，一定要識照顧自己。」回港後Teresa索性邀請張金美擔任管家，負責打點她的起居飲食︰「我呢世人最開心就係喺佢身邊嘅日子，佢成日同我傾偈，教識我好多嘢，試過教我包餃子，佢話女人一定要學識包，否則就嫁唔出。」憶起這些點滴，張金美面上不期然流露出開心的笑容。雖然物換星移，但對張金美來說，Teresa從來未有離開︰「我當佢去咗旅行，事實上我全屋都係佢嘅相，日日聽住佢嘅歌，佢一路都陪住我。」
採訪︰曹家誠
來源 source: http://hk.appledaily.com
|
鍾意就快D Share啦！
|
|
|
