2020年5月8日星期五

做KOL試食母親節蛋糕周汶錡兒子獲讚Handsome Boy #周汶錡

做KOL試食母親節蛋糕周汶錡兒子獲讚Handsome Boy

四歲Jacques及三歲Avner好靚仔呀！為食Avner急不及等試食先。

母親節將至，「索媽」周汶錡（Kathy）昨日收到紐約人氣餅店送上嘅母親節限時甜點，紅桑子玫瑰蛋糕及士多啤梨朱古力禮物，Kathy即興奮喺IG放相，並交由兩位混血囝囝Jacques和Avner試食，但周汶錡兩公婆就未有現身。

呢個紅色鏡面蛋糕以紅桑子及食用玫瑰花花瓣點綴，賣相唔錯，內層係雲呢嗱朱古力醬包住蜜糖海綿蛋糕，配上紅桑子玫瑰啫喱夾心及開心果餅底，慣咗做KOL嘅大仔Jacques捧住蛋糕笑晒口；細仔Avner唔理咁多，一於食咗先講，網民除咗祝Kathy母親節快樂外，留言大讚個蛋糕同萌B一樣咁甜，話兩個小朋友大得好快，但依然Handsome同可愛。

作為兩子之母嘅Kathy相當偉大，今年3月法籍老公Julien Lepeu難忍七年之癢，背妻「偷食」，Kathy勞氣完都為咗小朋友原諒咗老公，還公開拆彈話：「我倆仍然相信『愛』能改善彼此關係，也是化解問題的源頭力量！日後我們仍然會努力，為孩子，為家庭，為對方，互相珍惜，一起進步！」