2015年7月2日 星期四

50歲露 E胸 𡃁仔阿伯都得 羅霖:係唔要二世祖! [壹週刊 - 1321] 羅霖,M1,



娛頭

50歲露 E胸 𡃁仔阿伯都得 羅霖:係唔要二世祖!

橫睇掂睇唔似五十出頭的羅霖,同前夫劉坤銘離婚後再見不是朋友,更加零贍養費過手,要養起三個仔,唯有做生意、娛樂圈兩邊走。短短三年已成為兩間公司董事的羅霖,憑凍齡外表和身材,贏得「美魔女」稱號外,同時更惹來兩間製作公司垂青,邀請出寫真,在七月書展中力拼水著?模。

年齡無阻事業,甚至有人開出電影女主角合約加長期飯票利誘,想將羅霖私有化,但戀愛大過天的她,堅持要有愛,才有發展空間,擇偶條件更講到明:係唔要二世祖!

零贍養

回復單身三年,羅霖一直忙於和同床共枕十七年的前夫劉坤銘,就錢銀瓜葛和贍養費問題對簿公堂。

接受訪問過程中,羅霖一直有問必答,但話題一涉及前夫,即表現避忌。問到兩人對簿公堂的最新狀況,她冷淡拋下一句:「 Settle晒啦,零呀!」至於現時二人關係,她更落閘:「唔再講,唔想俾人話我借佢(宣傳),會告我㗎!」

由闊太變 working mama,獨力養起三個小朋友,還要堅持送他們出國留學,羅霖坦言:「真係幾吃力!」

羅霖同劉坤銘於一三年正式分開,兩人一度為贍養費同三子的撫養權對簿公堂。

寫真集在首爾進行拍攝,羅霖要等到最後一天,才能衝破心理障礙,以泳裝上陣拍攝。

老中青三代

五十出頭,仍然保持 34、 25、 34的誘人身段,其實離婚頭半年,羅霖身邊已經有追求者,但失婚之痛未癒,就連普通見面食飯,她都一一拒絕,直至近年才稍為回復心情,願意認識新朋友,但為了工作,每日只瞓得幾小時,要花時間培養的感情實在奢侈,所以即使有齊老中青三個不同年齡層的異性追求,羅霖依然未有機會行出多一步。

受過教訓,對於擇偶條件,羅霖很坦白,「好鍾意、好鍾意嗰種感覺嘅人仲未出現,我好簡單,只係想搵個有上進心,有智慧同責任感嘅男人,最好白手興家,係唔要二世祖!」

有傳羅霖與亞洲先生林睿過從甚密,主動為對方搵 job。

一二年底羅霖與國產富二代王嶠夜蒲唱 K,原來當時已同前夫簽字分居。

簽字離婚後,去年四月劉坤銘陪細仔劉子晉到又一城睇戲家庭樂。(《蘋果日報》圖片)

送合約搏包養

一直有計劃出書講養生、講美容、分享湊仔經的羅霖,諗都諗唔到年過半百,竟然有人睇中自己凍齡的外表同身材,接洽出寫真。據了解,羅霖原本同另一間公司傾得頗為投契,臨簽約前還跟公司老闆見面,當時對方更送上一紙電影女主角合約,並附帶「包養」條件,相當開門見山。

「之前一直同個女嘅高層接觸,去到簽約前,老細話想同我見吓面,傾完第二日就再俾個 offer我,問我要唔要長期飯票(被包養)。」羅霖說。

見慣大場面,羅霖提出只談電影合約同寫真不談包養,對方即刻冇回音;最終羅霖轉跟可以有更多自主權的「理想天映」合作,推出處女寫真《 Timeless》。

羅霖坦言由選完亞姐至近年離婚,其間都有人主動向她「示好」,要求她接受「照顧」。將感情建立在金錢上,羅霖相信只會留下一世陰影。

「呢啲 offer周不時都有,唔係我使乜捱到而家啫,不如一開始就要(接受照顧),條件好好嘅大把添!我唔想自己唔開心,所以都冇諗,或者到我好頂唔順,先至再諗。」

原本計過度過,想全身退出娛樂圈專心做生意,但為了順利供三個仔到外國讀大學和為兒子留多點錢做儲備,羅霖唯有繼續拋頭露面,接 job出騷。

去年羅霖在《愛•尋•迷》中獻出熒幕初吻,同關楚耀有激情的演出。

原本想去歐洲影寫真的羅霖,怕坐長途機殘樣現形,最後改去首爾並找來當地的攝影團隊幫手拍攝。

意外影泳照

半百出寫真,羅霖最大的心理關口,是寫真必備的三點式泳衣。

「你諗吓,我生咗三個小朋友,個肚有幾大?仲要唔係有好多時間減肥,我又唔可以唔食飯,個肚凸出嚟影泳衣邊好睇先?」雖然合約無強硬規定要有泳衣環節,但專業的羅霖依然帶定泳衣去首爾,有備無患。

拍攝行程緊密,每日晨早八點直踩至凌晨五點,小睡三粒鐘又再開工,全日靠一個麵包頂肚的羅霖,臨收工發現自己肚皮凹晒,於是膽粗粗影埋泳衣寫真作結尾,但最噴血的,是她的 corset look。

「我咁大個女都係第一次著,好艱苦,同個化妝師研究咗十五分鐘先著到,完全唔明啲人點解咁辛苦,但影出嚟就知嗰種(效果)係男人都會鍾意睇嘅!」羅霖說。

五十出頭的羅霖,以《 Timeless》之名在七月書展推出寫真,同班𡃁模爭賣書。

由闊太變打工仔,羅霖坦言一人養三子好吃力!

擁有 E胸的羅霖,事業線深不可測!

心力交瘁

美滿婚姻原來只是一場錯覺!羅霖 12年決心和劉坤銘離婚,但仍要不斷為贍養費及撫養權與前夫對簿公堂,最終羅霖一蚊都拎唔到。

爭撫養權

12年宣布分居後,二人再見不是朋友,更為兒子的撫養權不時互數,最後庭外和解,決定共同擁有撫養權,幼子跟媽媽生活。

反索贍養費

離婚後,劉坤銘向羅霖反索五位數贍養費,要求對方公開財政狀況,還轉走銀行巨款,甚至去學校接走本應出席羅霖生日派對的細仔,事件最後要律師出面擺平。

爆家暴

回復自由兩年後,羅霖首度自爆離婚真正原因,是她提出分居時遭到家暴,當日未有報警是不想影響三個仔。

收恐嚇訊息

家暴事件被公開後,前夫劉坤銘即反擊指女方搏宣傳,而羅霖亦公開表示收到恐嚇訊息,但因怕再收律師信,所以拒絕公開發訊人身份。

唔到你唔放

圈中女藝人失婚冇束縛亦冇咗倚靠,甚至隨時出現經濟困難,唯有放下底線,豁出去拋胸露肉。

黃婉伶 Race

被爆 04年已在新加坡與富商陳靖諧秘婚的 Race,離婚後大解放,與家姐 Rosanne斥資 150萬在新加坡開性感內衣店外, 09年再豪擲 200萬,谷胸拍水著寫真集,大玩 SM性感誘惑。

鍾麗緹

曾推出全裸寫真,是萬千男士心目中女神的鍾麗緹,兩度離婚,要獨力養育三個女,雖然已經年過四十,但去年為內地時尚雜誌到馬爾代夫拍攝寫真,比堅尼照依然惹火。

模媽 Mia

離婚後取得一對子女撫養權的 Mia, 12年決定全裸上陣出寫真搵奶粉錢,甚至著住谷胸喱士睡衣現身寫真慶功宴,去到盡。

養眼 50後

圈中有唔少半百凍齡魔女,各有保鮮防腐秘方,秘而不宣。

關之琳  52歲

五年前開始淡出娛樂圈,近年連廣告商演都可免則免,致力慈善工作和拍拖的她,星味不減。

林青霞  60歲

94年下嫁富商邢李㷧後便引退,去年大搞 60大壽的青霞,面上已出現歲月痕跡,但大美人始終是氣質行先。

恬妞  57歲

望六張的恬妞,皮膚保持白皙透紅,近年長期在大陸拍劇搵真銀的她,偶爾會來港出席活動,但狀態與《他來自江湖》中的余姣沒太大分別。

鍾楚紅  55歲

港姐出身的紅姑,初出道已經風情萬種,如今年過半百,但 deep V晒料,一樣搶眼。

鍾意就快D Share啦!
Related Posts Plugin for WordPress, Blogger...