出錢又出力的嘉玲，在璦玲基金慈善拍賣期間，積極舉牌競投。
探熱針
上海夜場拍烏蠅 劉嘉玲照買 2,500呎豪宅
下個月八日滿四十九歲的劉嘉玲，近幾年做生意人多過做藝人，時裝、家品、飲食，噏得出都有，其中包括搞夜場 Muse，已經在上海開到第三間分店，但隨住中央積極打貪，夜店生意大受影響，其中一間開在旺區的分店，已悄悄關門大吉。
多一間少一間，對近日收厚酬為內地綜藝節目《我是演說家》做導師的劉嘉玲來說毫無知覺，早前又以三千多萬人民幣（港幣四千多萬），買入位於上海最貴地段，長寧區的華山夏都苑一個二千五百呎，四房兩廳單位，證明大把喺手。
貴租頂唔住
劉嘉玲說，近年梁朝偉的步伐愈來愈慢，自己則愈來愈快，瓣數多的劉嘉玲，拍戲、出席品牌活動、做舞台劇，甚至破例為內地綜藝節目《我是演說家》擔任導師，但一切都是次要，娛圈工作只是用以保持名氣，方便廣結人脈，做生意，搵大錢。
早於○六年，劉嘉玲開始涉足商界，與友人合作搞首間夜店 Muse，至今已經有三間分店。於余姚路同樂坊的老店，因為被附近居民投訴噪音，加上人流少等問題，在一二年底正式關門大吉。
「呢區本身都唔係旺區，班蒲精都係因為嘉玲個名而嚟，地點又唔就腳，加上近年上海大把有水準嘅 club，臨閂門嗰一年，週末都得幾丁友，生意好差！」一名上海蒲友說。
同年，劉嘉玲將 Muse搬到上海外灘，繼續經營。至於位於恒隆廣場的分店，雖然位處甲級商廈靜安區，但隨着內地積極打貪，夜場消費嚴重受到影響，捱不住貴租下，亦於今年結業，上址已變成鷺鷺餐廳。
半億新竇
上週二（十一月十八日），劉嘉玲與丁子高等同在上海出席外灘十八號十周年慈善晚宴，在會場坐足三粒鐘，俾足面。
晚上十時，坐寶馬離開的劉嘉玲直接返回寓所，但卻非多年前買落，位於興國路的丹楓苑，亦不是早前被指一炮過三千萬買入的豪宅嘉傲庭，而是靠近舊居丹楓苑的另一頂級豪宅華山夏都苑。「嘉玲媽咪而家大部分時間都留喺上海住，華山夏都苑同丹楓苑只係隔條街，好方便，間屋計港紙成四千幾萬，但嘉玲都照買。」知情人說。
上週四（二十日）傍晚時分，已由上海返港的劉嘉玲現身中環 YSL，為參加《我是演說家》節目揀衫，發現記者後，原先坐在大堂試鞋的她，急急匿入 VIP房，最終三大袋走。
頂級豪宅
07年落成的華山夏都苑位於上海最貴族的地段長寧區，單位以三至四房兩廳為主，約 2,500呎，而複式單位則有五房四廳，約 5,000呎。屋苑內裝修豪華，有 360度景觀，屬頂級豪宅物業。此外，發展商有 24小時酒店式服務提供，包括早餐，家居清潔、乾濕洗衣等服務，屋苑可租可買，但租戶都經過篩選，大多是跨國 CEO，非富則貴。
|
鍾意就快D Share啦！
|
|
|
