比起 Fiona遲起步拍電影的王菀之，憑住演技夠放，無包袱，成功撼低對方，在《新紮師妹 4》擔正做女一。
探熱針
當頭起 揮低薛凱琪 王菀之坐正
繼今年初在賀歲片《金雞 sss》做哨牙吳璐一鳴驚人，王菀之最近再以台慶劇《老表，你好 hea》中的港女林雪一角，展示搞笑本色。擺明玩得！即將開拍的《新紮師妹 4》，睇準 Ivana埋位演戲可以冇歌手包袱，決定以她取代上一集的女主角薛凱琪，擔正做女一。
勝在冇包袱
十一月十九日無綫台慶，王祖藍戲劇性當眾向李亞男求婚，可惜無助收視，錄得二十五點平均收視，創二十年來新低。
王祖藍獨力難撐，但由他主演兼幕後策劃的台慶劇《老表，你好 hea》，意外把蔣志光「復活」外，成功振夫綱的張繼聰同王菀之，同樣成為觀眾焦點。
在賀歲片《金雞 sss》飾演哨牙妓女吳璐，無邊無界的王菀之演出令人眼前一亮，成為電影公司開戲熱選。
「《金雞 sss》之後，大家留意到 Ivana做戲原來可以咁放，有唔少戲都想搵佢埋位做番個角色，不過 Ivana當時忙住閉關籌備演唱會，就唔到時間嘅，佢都推晒。」知情者透露。
老細堅持換人
現正為《十月初五的月光》電影版開工的導演葉念琛，已籌劃好在稍後開拍《新紮師妹 4》，但上一集的女主角薛凱琪，卻無得冧庄。「電影公司想有新鮮感，但大家對 Fiona做呢類傻大姐角色都睇到膩，加上佢五官比較精緻，唔係咁啱個角色。」
左秤右秤！葉念琛決定大膽用王菀之做女主角，同周柏豪做對手。○二年楊千嬅同吳彥祖孭飛的第一集《新紮師妹》票房過千萬，翌年即開續集，○六年薛凱琪主演的《新紮 3》票房插水，如今換上當頭起王菀之，啱數！
虎頭蛇尾
《新紮師妹》系列頭兩集票房均千萬計，直至第三集男女主角大跌 watt，票房亦大不如前。
《新紮師妹 1、 2》
02年，導演馬偉豪開拍喜劇《新紮師妹》，楊千嬅與吳彥祖擔正，收 1,100萬，女主角方麗娟得到觀眾歡心； 03年食住上，班底照舊，續集《新紮師妹 2美麗任務》票房再創新高，勁收 2,100萬。
|
鍾意就快D Share啦！
|
|
|
