今屆新鮮出爐亞姐，冠軍張軼君（中）、亞軍唐淑薇（左）及季軍陳洋鈴（右）均表示對公司很有信心，不怕冇糧出。
探熱針
騎呢選美騷 亞姐紋身照攞冠軍
賣盤臨門撻 Q，亞視財政危危乎，搞到要周圍撲水，才能完成今屆亞洲小姐競選。禍不單行，總決賽當晚，由於錄影廠內逼滿強國觀眾，不單只在直播錄影廠內行出行入，完騷後更一窩蜂衝上台同冠亞季軍影合照，場面幾乎失控。至於出爐亞姐張軼君，腰間即使有個 10cm大的花形紋身，照樣可以爆冷奪冠，亞視，真係點都得！
激嬲呂志和
亞視賣盤不成，加上財政危機未解決，隨時有機會清盤收場。
「本來呂志和肯出三十億買亞視，出咁多錢買個台返嚟，仲要額外攞多嚿錢出嚟幫亞視還債，點知王征中途反價，話三十億唔夠，當人『水魚』咩，呂志和嬲嬲哋咪唔買囉！原本佢已經搵咗曾志偉幫手，拉攏劉德華佢哋幫手擦番靚亞視個牌頭，而家乜都唔使啦，最大機會係清盤！」知情者說。
雖然如此，不過亞洲電視執行董事葉家寶仍死撐：「一路傾緊新買主，對亞視續牌好樂觀，好多人對亞視好有興趣，前景好樂觀。」
電視台照賣、亞姐照選。但出名騎呢多於鬥靚的亞姐選舉，當中五大笑位，真係估佢唔到。
笑位一：無掩雞籠
選美期間，台下班強國觀眾可以在錄影廠內自出自入，高談闊論，完全懶理直播進行中。
笑位二：紋身冠軍
亞洲小姐以「凝聚萬象，純美再生」為主題，但黑馬冠軍張軼君，腰間卻有一個 10cm大的花形紋身，絕對是香港開埠以來，首位公開有紋身的、依然攞冠軍的佳麗。
笑位三：黃夏蕙被趕
當晚除咗有天下無敵美魔女宮雪花充撐場面外，仲有黃夏蕙 BB。完騷後夾硬衝上台影大合照，葉家寶見到，第一時間截住夏蕙 BB，仲想趕佢落台，好在夏蕙 BB馬步夠穩，趕極唔走，之後仲指住葉家寶係咁鬧。
笑位四：作大
亞洲電視執行董事葉家寶，聲稱亞姐有一萬元月薪外，還有剪綵及代言活動，計計埋埋會有百萬年薪喎。真嘅？係咪咁多 job先？亞視會唔會拖糧先？
笑位五：人肉布景板
出爐三位亞姐，冠軍張軼君、亞軍唐淑薇及季軍陳洋鈴，完騷後原本被安排接受傳媒訪問，但場內過百內地觀眾全都衝上台影合照，三位亞姐即時化身人肉布景板，影足一小時都未影完。
|
鍾意就快D Share啦！
|
|
|
