掃呢頁CODE去手機

2014年11月27日 星期四

[壹週刊 - 1290 - 財經] 男神賣西裝 潮著要「露肌」 BKD_S,M1,




由荃灣一間小小的 workshop,到跳出尖沙嘴開門市,老闆 Nick與女朋友(左一及二)當然要開香檳慶祝。現場所見,賓客為女士居多, Nick指雖做男士生意,但更要顧及他們女友意見。

壹盤生意

男神賣西裝 潮著要「露肌」

警報!一股韓流襲港!男人穿西裝、要夠緊身;西褲、要有吊腳。身為兼職模特兒的李家駒( Nick,廿六歲)及黃致源( Kyle,廿二歲),把韓仔西裝再改良,配合港仔身形,「韓國係用女裝嘅辦去做,香港男仔唔夠瘦,著落太緊身,我哋會改鬆啲,並剪裁到無胸肌都好似有胸肌!」兩人說。

二人中五畢業後,在 Tom Ford賣西裝,今年初齊齊下海創業,開設網店 Hiatus Fashion。今個月正式在尖沙咀百利商場開鋪,賣每套二千元、潮得來又復古的西裝。 Hiatus這個字的意思,是「裂縫」,「我哋想客人入我哋間鋪時,好似入咗條裂縫,跌番入第一次世界大戰時嘅英國紳士文化……」的確係,好扮嘢。

高一米八、擁三十八吋胸肌的 Kyle,指穿上其自家品牌的西裝後,胸肌的視覺效果更突出。除了凸顯身形,袋巾設計亦特別,本來是袋的內籠,在隆重場合可立刻拉出來扮袋巾,方便快捷。

老闆 Nick和 Kyle,擁有 model身形,頭髮蠟到風都吹唔郁,絕對貪靚。即使是中學時穿校服,二人亦十分講究,恤衫要「攝」到有泡泡哋的感覺,學生皮鞋要著英國品牌 Clarks。為了凸顯 fit爆身形,學校毛衣也要挑剛剛貼身的尺碼。 Nick說:「我俾女朋友話,裝身太耐,出門口嘅時間仲慢過佢!」 Kyle則笑說:「如果無洗頭,我一定戴帽出街。而家我留緊長頭髮,型吖嘛!」

二人穿上自己設計的西裝,都有一點「韓仔味」。 Kyle說:「好多情侶拍拖行我哋鋪,啲女仔見自己男友著完,話好似韓星,男友即刻笑到飄飄然!」情侶入到鋪,往往是女方滿懷期望地俾意見,「我哋會分頭一個同男仔度身、一個同女仔吹水,減少 sell緊嘢嘅感覺。」

款式:無肌變有肌

Nick和 Kyle都認為,現時興的「韓仔西裝」太窄身,不夠大體,故把其改良並加點英倫復古味。 Nick說:「韓仔西裝係有 slim cut效果,但西裝邊位唔夠闊,手袖鈕釦又開唔到,完全無 detail位可言。」市面上的西裝連鎖店,如 G2000,千多元便可執齊一套西裝,更提供改褲腳服務,前後一星期搞掂。相比之下, Hiatus一套西裝的最低消費為二千元,度身訂做要二十日才能完成,競爭力成疑。

要和大牌子競爭, Nick及 Kyle從剪裁入手。令二人最自豪的,是其立體「顯肌」剪裁法。「一般西裝嘅肩膀位,係會縫成水平線,但我哋會將肩膀位打斜、伸展到背部兩至三厘米,令西裝更加挺身。明明無胸肌,睇落都好似有胸肌!」 Nick說。而恤衫則在腰間加一個褶位,令著起來更筆挺。他們認為這種設計比「韓仔西裝」更能凸顯身材,「韓仔成套都收身,但我哋覺得應收身嘅部分就收身,應突出嘅部分就突出,咁先可以凸顯男性健碩嘅胸肌!」

另外,男士著恤衫時,時常摺高衫袖,他們考慮到這點,於是仿效名牌,在恤衫手袖內加上花邊。並在領內加上花紋,與衫袖的花邊相呼應,增加「嫵媚」。二人在 Tom Ford打工時,一邊學名牌的設計意念,一邊自學如何畫設計圖做辦。 Nick說:「喺 Tom Ford打工時,靜靜雞拎啲靚嘢穿上身試,大概知道好嘅西裝 cutting係點。好似腰圍要收啲,胸膛可以闊啲。每季公司都會派小冊子俾我哋,教我哋嗰季興咩,學咗唔少。開始設計時,我哋用自己著得舒服嘅西裝做藍本,照鏡用繡花針,喺覺得要收身嘅地方做記錄,成為自己品牌嘅款式。」

黑色牛皮標籤是 Hiatus Fashion的特色, Kyle說:「希望大家一見到這個 tag,就知道係來自 Hiatus。只係用鈕釦扣住,唔想要,都可以除咗佢。」

從事金融業的熟客 Patrick說:「平時都要著西裝,呢度嘅款式特別啲,唔怕同人撞款,見到呢度嘅老闆咁型,佢哋俾嘅意見都有信心啲啦。」

未開門市前,荃灣工作室便是 Kyle(左)和 Nick(右)為客人度身的地方,那兒只有四幅牆、一張枱,卻為他們帶來了每月數萬元盈利。

定價:平價 Tom Ford

總結在 Tom Ford打工的經驗,他們指靚西裝有三個要素:夠挺、夠 slim、以及夠 man。 Nick說:「一套靚西裝, Tom Ford起步價都要二萬幾。雖然剪裁質量好,但唔係每個人都負擔到。」二人創業前,已決定主攻市場上缺乏的中價「靚」西裝市場。

二人當初為尋找心水布疋,竟由深水埗搵到首爾。 Kyle說:「不同國家嘅布疋都有不同特質,例如意大利布疋羊毛成分較高,做出來的效果也挺身,但一米長就要八十蚊。日本布疋的款式就特別啲,數量都比較少及短,可能只有三十米長,每種花色只出一次,所以我們可以把布疋買斷,成為獨家款式。」一套男裝所需布料約六至八米,故單是布料成本便要六百多元。兩人把設計好的款式,交由市面上一些裁縫師傅縫製。據知,一套西裝,縫製成本要約一千多元,毛利三至四成,定價二千元已「無乜肉食」。

鋪頭的宣傳照由 Nick及 Kyle輪流擔任模特兒及攝影師,為配合設計主題,二人亦偏好到有古舊感覺的場景拍攝。

鋪頭亦兼賣煲呔,約二百多元一個,分別有

格仔及斜紋款式,「咁樣就更加有復古的

感覺,不用成日戴呔咁悶。」 Nick說。

客路:四成 gay客

當初他們只開網店,都是靠 facebook及 Instagram宣傳,但為了更「吸睛」,兩人親自上陣,穿起自己設計的西裝行 catwalk。為了找靚景襯托西裝,他們更不時要凌晨出動,「我哋荃灣 workshop出面有道門幾有復古味,但日頭好多人行,要等到夜晚才出去影。點知夜晚落咗閘,又要等到第二朝,哈哈。」

現時有了鋪頭,他們更能把以往在 Tom Ford學到的 sale客招應用。「當客人一行入嚟,睇客人拎起咩色同咩款嘅衫,都大約知個客嘅風格。到時會再埋去八卦吓個客買嚟做咩。」兩人發現,來買西裝的客人主要有三類:第一是結婚做禮服:「佢哋最鍾意復古同誇張嘅款式。」第二是上班族。「他們注重細節,所以 sell客時會講解多啲鳳眼(袖口的釦洞)嘅顏色選擇,及袖口花邊款式,令佢哋套西裝更個人化。」 Nick說。第三類,竟然是同性戀客人:「佔咗生意四成。佢哋好大膽的,好有自己風格,唔使太多意見。」由於怕客人被標籤,說起這些 Nick和 Kyle便顯得避忌。當客人堅持己見時,阿 Nick亦有他們對潮流的執着,「好似而家興恤衫袖長過西裝袖,我哋都會盡力說服客人跟番個潮流。但如果客人嘅要求會破壞我哋設計,我哋寧願唔接呢單生意,以免影響品牌。」

老闆 Nick每日均會著自家西裝返鋪頭作生招牌,而原本已有三十九吋的胸肌,望落似有四十吋,「我好講究㗎,每日襯衫都要用二十分鐘,自己著靚啲,客人見到買嘅機會都大啲啦。」

兩位準新人正在選擇新郎的禮服,穿上格仔西裝的 Nick,吸引了客人購買一模一樣的款式,客人亦滿意剪裁:「已經試咗幾間,覺得呢間 cutting比較貼身。」

Hiatus Fashion門市開了廿多日,已做了八萬元生意。他們亦對未來半年的生意寄予厚望,「冬天應該會多啲人買西裝,加上今年好年,年尾會有好多人趕結婚,未來半年真係好重要!」 Kyle說。興奮的同時,他們亦意識到,穿在他們身上「出 show」般的西裝,未必是普通客人那杯茶,所以亦開始發展非西裝系列,「除咗已經賣緊嘅恤衫外,我哋都設計緊一啲歐式大衣同西褲,希望可以提供多啲選擇俾客人,吸多啲客。」 Nick說。問及生意展望,身為時裝迷的二人,不是說要開幾多間店,或賣多少件西裝,而是雙眼發光說:「最想我哋啲衫入到 Harvey Nichols!」

開業資料

( 3/14)

•租 金•$18,000^

•裝 修•$42,000

•入 貨•$150,000

•雜 費•$10,000

•總投資•$220,000

^三按一上(荃灣工廈租金)

營業資料

( 10/14)

•營業額•$120,000

•租 金•$19,500*

•入 貨•$24,000

•人 工•$20,000#

•雜 費•$4,000

•盈 利•$52,500

*荃灣工廈及尖沙嘴店租金

#老闆二人各一萬元人工

一點意見

郭子鋒( Kay Kwok)

時裝設計師,曾為容祖兒、張惠妹等明星設計演唱會服裝,個人品牌「 Kay Kwok」於今年春夏倫敦男裝周亮相,曾於意大利 Mittelmoda時尚大賞獲全場總冠軍,是二十年來首名得此獎項的香港人。

1.設計欠靈魂

「其實不用出名亦可入 Harvey Nichols,但服飾設計上一定要夠個人特色。依家嘅作品無靈魂,太大眾化。要花多啲功夫改善設計能力,亦可考慮玩味較重嘅設計方式,如拼布。」

2.加強飾物設計

「建議可於每個系列加入三至四款較大膽的設計,另外仲可以玩吓飾物,如扣針、領帶,亦可於飾物上玩吓印花,要注重設計上嘅細節。」

3.兩條線難應付

「應付兩條 Line的設計吃力之餘,開支亦會大。如果摸不清兩條 line的設計定位,會有反效果。」



鍾意就快D Share啦!