冇對手！（設計對白）
探熱針
無心戀戰 Eason祖兒棄權 許志安謝安琪頒獎禮玩晒
年尾樂壇頒獎禮就到，據知，多年來都是大贏家的 Eason今年將會不出席任何頒獎禮外，容祖兒、李克勤等亦罷玩。天王天后缺席，各電台只好推許志安、謝安琪、王菀之及張敬軒等人補上，退而求其次。
冇對手冇癮
今年初在叱咤奪五獎，成為叱咤男歌手金獎十連霸的 Eason陳奕迅，因為在台上演出時要用手機睇歌詞，表現失準黑面發脾氣，更用留班來形容自己。新年度的頒獎禮即將開始， Eason將不會參與任何一個頒獎禮。
「 Eason都玩咗咁多年，以前就話仲有古巨基、許志安、李克勤，但而家樂壇好似冇晒人咁，成個氣氛都唔同晒，就算佢再攞獎，都冇意思， Eason自己知自己事，唔想又好似年頭喺叱咤發自己脾氣，加上今年主力做巡迴演唱會，所以一早同公司講好咗，唔會參加任何頒獎禮。」知情者說。
唔使俾面大台
Eason休戰，據知，和他分屬老友的容祖兒亦決定唔玩。
「對祖兒嚟講，樂壇頒獎禮只係公事，已經冇咗要爭要贏心態，咁多年來來去去都係同千嬅爭，要贏已經贏夠，加上英皇同 TVB關係唔再同以前一樣，大家都唔使俾面對方，攞唔攞最受歡迎女歌手已經唔重要，反正小圈子遊戲，唔係損失。
「其實唔只 Eason、祖兒，李克勤都話唔玩，佢個心態已經唔同晒，返內地搵錢，有時間陪吓兩個仔同老婆。至於楊千嬅都應該只係去叱咤，佢係『我最喜愛女歌手』大熱，同商台關係又好，點都有啲情意結。」
先頒獎煲人氣
大星紛紛打退堂鼓，各家電台唯有各出奇謀，搵二線歌手頂上。
「商台、新城同港台開頒獎禮記者會，基本上冇一個天王天后撐場，最大粒已經係許志安！新城喺記者會上率先頒咗幾個大獎，張敬軒嘅《青春常駐》攞「最欣賞歌曲」獎，謝安琪新專輯《 Continue》得「勁爆年度專輯」，至於許志安首《流淚行勝利道》就係「勁爆年度歌曲大獎」，目的都係想煲人氣，唔使到時冇咗 Eason、祖兒就好似冇人咁。商台就煲安仔、王菀之同周柏豪，港台都係煲軒仔、安仔同阿 Kay，今年頒獎禮，來來去去呢幾個玩晒。」知情者說。
長勝冇癮
過去十年，樂壇都是 Eason、容祖兒玩晒，兩人雖然破了不少樂壇紀錄，但一加一等於二的遊戲，早已令頒獎禮毫無氣氛，天王天后冇癮，獎都唔攞，今年齊齊罷玩。
|
鍾意就快D Share啦！
|
|
|
