探熱針
食女斷正 周家蔚發爛 洪天明守行為贖罪
洪天明跟周家蔚結婚兩年，一直有女埋身，經常留在內地開工的他，跟內地索模及性感女約會先後斷正，已再度懷孕四個月的周家蔚，雖然口講相信對方，但私下對經常玩失蹤的花弗老公，十分不滿。
據知，上月中在內地開工拍電視劇《潮拜武當》的洪天明，遠離老婆視線範圍又再作反，跟劇中一班妹妹仔玩到癲，其間更偷召內地女友前往探班，在港養胎一樣收到風的周家蔚，忍唔住跟老公鬧大交。返到香港，洪天明全天候陪老婆，戒夜蒲甚至唔玩微信，暫時斷絕其他野花聯絡，守行為補鑊。
由朝陪到黑
上週五（十一月二十一日），在內地拍劇作反，自由自在三星期後，洪天明終於返屋企交人。早上十點開始，揸住百萬積架新車載老婆到太子道食早餐，落車後跑去幫老婆開車門，再拖實入餐廳。食完再送老婆到彌敦道睇牙醫，一個鐘後離開診所，洪天明跟住揸車到九龍城買日用品。泊好車，摩打腳到街巿掃貨再去銀行，周家蔚留在車上小睡；唔夠半句鐘，完成任務的洪天明折返，先走一轉紅磡，才返油塘屋企。
在家一粒鐘，兩公婆再孖咇外出，過海到上環睇寫字樓租盤後，再揸車落灣仔；原來當晚約好了佘詩曼、曾志偉、錢嘉樂夫婦等食飯，之後一齊過伊館睇阮兆祥做棟篤笑。散場後，原班人馬到新光食消夜，全日陪老婆活動。
講心事爆喊
返到香港變廿四孝老公，事出有因！早前在武當山拍劇期間，無王管的洪天明變甩繩馬騮，對劇中一班妹妹仔十分嗒糖，幾乎個個都啱，周家蔚收到風後，發晒爛渣嘈大交。
「天明好鍾意黐埋班妹妹仔玩，玩到好癲，有時飲大幾杯就捉住人哋講心事，仲會講到喊，話自己同老婆近排有問題好唔開心。大家安慰佢，提議佢帶老婆出去玩，天明又話兩個人溝通唔到，又話自己連老婆電話都唔聽。後來啲女仔都覺得天明只係製造話題『搵食』，大家都自動閃開。」知情者透露。
妹妹仔唔落疊，向來朋友多的洪天明索性叫內地女友去探班，在當地逗留三星期，有幾個女性朋友不怕千里迢迢，特登到武當山跟他食飯短聚，洪天明亦會識做撇開劇組，跟來探他的朋友聯誼。
聽話唔玩微信
洪天明花弗唔定性，再被觸動神經的周家蔚即使隔空找晦氣，他亦好少理，激到有四個月身孕的老婆比未大肚前瘦多三磅。回港休息兩星期，知衰洪天明即時做嘢，連日來自我守行為，做老婆阿四。
「天明應承 Janet（周家蔚）唔會單獨去夜街，就算約人飲嘢都唔會， Janet唔想佢同班女仔繼續聯絡，要天明刪咗之前個 WeChat，佢都即刻照做。下個月返內地拍新劇，到時點都得忍一陣，冇乜所謂。」知情者說。
夜晚得閒唔使開工，洪天明又跟一班女仔在房敷 mask。
10年，洪天明在內地拍電視劇《濟公》期間撻着內地女演員玩失蹤，周家蔚發火分手，其後洪天明隔空氹女友，在微博送花公開道歉，成功箍煲。
補鑊黨
離開老婆視線範圍出埠開工，尤其北上，特別易出事，最緊要補鑊快認錯快，一次又一次過骨。
晒恩愛 馬德鐘
入行緋聞纏身的人夫馬德鐘， 06年明目張膽追郭羡妮，辣㷫老婆張筱蘭帶埋兒子移居法國，之後跟小三 Katherine秘遊泰國又再斷正，偷食形象導致工作量大減後，馬德鐘才鳥倦知還，親往法國箍煲，自此每逢大小場合都帶住老婆晒恩愛，轉型做好男人。
|
鍾意就快D Share啦！
|
|
|
