探熱針
縮骨哥 拍拖使女友錢 側田側側膊
獲 Paco接收的側田，轉會太陽娛樂在即，過渡期冇嘢做，唯有拍拖消磨時間。上星期，側田同女友在數碼港睇完戲孖住返屋企，其間由搭的士、買糖水，到便利店掃零食，側田都是繑埋手，全程由女友做阿四。零風度！
揞住荷包
唔使頭髮濃密，亦唔一定要富貴住貝沙灣，冇乜頭髮住香港仔住唐樓的側田，溝女一樣得心應手！韓籍未婚妻一走了之後，接力的長髮新歡亦已經一齊大半年。
上週五（七月十日）晚，側田與女友到數碼港拍拖睇戲，散場經過麥記，側田走入去買蘋果批，離開時被途人評頭品足：「戴帽嗰個係咪側田嚟㗎？真人都幾普通喎！」側田當聽唔到，同女友坐的士走。
的士在香港仔大街停低，側田闊佬懶理先落車，女友俾錢！之後行去附近的甜品鋪買外賣，側田繼續揞住荷包。
臨上樓前，女友去埋便利店掃零食，冇嘢好幫手的側田自顧照鏡，忘我地欣賞他因為早前為演唱會修身的效果，其間又不停捏住下巴，留意是否有多餘肉。
過橋抽板
要 keep住瘦，側田對任何食得落肚的都不感興趣，只攞了幾支蒸餾水走人，只見他將自己要買的放在收銀櫃枱後便行開，側側膊等女友俾錢。
回流香港三年，上月得寰亞以個唱留人，有機會在紅館開了兩場演唱會的側田，決定過橋抽板，轉會到風頭躉公司太陽娛樂，重投黃柏高旗下。無論公事私事，側田都習慣𡁻完鬆！
|
鍾意就快D Share啦！
|
|
|
