2015年7月16日 星期四

衰收尾 杜汶澤新戲違規 警方召黃德斌錄口供 [壹週刊 - 1323] 杜汶澤,黃德斌,M1,



探熱針

衰收尾 杜汶澤新戲違規 警方召黃德斌錄口供

杜汶澤監製的三級江湖片《選老坐》,開拍以來一直相安冇事,唯煞科一場「開片」戲,因人為疏忽,未有向警方申報拍攝場地出現改動,令一眾著住警察制服的演員包括黃德斌、陳家樂等要執手尾,被警方傳召返差館錄口供。

製片疏忽

杜汶澤監製的《選老坐》,五月底安排飾演高級督察的黃德斌,帶住同僚陳家樂及𡃁妹李綺雯等,阻止黑幫開片的街頭煞科戲,因製片的疏忽,未有向警方申報拍攝地點由土瓜灣臨時轉了去尖沙咀,警方即刻做嘢,通知影視聯絡組同製片了解,但對方一味拖字訣,遲遲未有向警方解釋臨時轉換場地及未有提交申請的原因,結果令事件愈搞愈僵,據知,近日警方已正式向電影公司進行追究。

任監製的杜汶澤當然責無旁貸,最慘係一班飾演警察的演員,亦無辜受牽連,黃德斌等人近日已陸續收到通知,要到灣仔警察總部錄口供,為拍攝違規一事協助調查。

這場阻止黑幫街頭講數開拖的煞科戲,因製片改了地點而沒有通知警方,令到有份扮警察的演員如黃德斌、陳家樂等要執手尾,陸續收到通知要到警署協助調查。(《蘋果日報》圖片)

(《蘋果日報》圖片)

因製片的一時疏忽,姜皓文、李綺雯及陳家樂無辜受到牽連,他們亦要抽時間到警署協助調查。

有排煩

「套戲由開拍到煞科,製片都冇同飾演警察嘅演員講解要守嘅規則,好在佢哋個個都有經驗,知道著住警員制服拍戲時,唔可以亂擺甫士俾人影相,所以埋位前後都好小心,就算幾熱都好,一停機就笠件外套遮住制服。」

演員全力配合,但製片卻累街坊,明知警方對著制服拍戲申請相當嚴謹,時間日期地點必須一早申報清楚,不能有半點差誤,其間如有任何改動,需要馬上知會警察影視聯絡組。

「差佬而家同扮演警察嘅演員講,話改咗地點,演員係有責任拒拍,但電影公司從來冇同佢哋解釋有呢啲條文,況且大家都係收 order去現場,鬼知製片冇同警方申報咩。」知情者說。

由英皇電影投資的《選老坐》,演員陣容不俗,除了黃秋生、杜汶澤、姜皓文等實力派演員外,還有洪卓立、王宗堯及陳家樂等新演員。

曾在電視劇《當鐵馬遇上戰車》中飾演交通警的黃德斌,一早知道著住警察制服要分外小心行為舉止。

三級電影《桃色》中,扮演警察的吳嘉龍與章小蕙雖有肉搏戰,但因跟足規矩申報,故順利過關。

《選老坐》監製兼演員的杜汶澤,與黃秋生終於破冰有傾偈。

申請嚴謹

對於影視界向警方申請使用有關警察、交通督導員或駐港部隊制服作拍攝用途,警方的影視聯絡組要求相當嚴謹。不但要求電影及戲服公司將題材類別、故事大綱、拍攝日期、時間以及地點作預先申報,當中亦不能有絲毫誤差,甚至連演員對白,都要詳細提交。飾演紀律部隊的演員,除要填上個人資料,事前亦要把制服造型,給警方檢定是否跟真實的紀律部隊打扮相同,故飾演軍裝警察的演員不能染髮,女的更加不能濃妝抹艷,並要紮起頭髮。

無得留低

11年,日本 AV男優、有「神之手」之稱的加藤鷹,在電影《蜜桃成熟時 33D》中拍了一場穿著香港警隊制服的強姦戲,由於事前未有申請,加上話題敏感,甚至有傳加藤鷹因此而被拘捕。雖然最後未有出事,但因為片段有辱警成分,電影公司受壓下被迫刪剪有關情節。反而吳嘉龍跟前 B嫂章小蕙合作三級片《桃色》,戲中的他雖然扮警察,不過因唔係著住制服同章小蕙肉搏,固無需捱剪。

任達華未衰過

在杜琪峯執導的經典軍裝警匪片《 PTU》中飾演警察的任達華,過往在多部電視及電影作品中扮過無數次差佬,至今一次都未出過事,原來華哥相當熟知申請程序,他說:「扮警察之前要報晒(向警方申請),如果唔係有事就死火,製片仲會同啲演員影晒相,知道邊個扮警察,全部要有記錄,我拍咁耐冇試過出事,製片事前會做好晒準備,就算出咗問題,都可能係一時疏忽,如果出事,啲演員返警局落口供都好正常。」

鍾意就快D Share啦!
Related Posts Plugin for WordPress, Blogger...