追唔到尾數就報警「一鑊熟」！
爆壹爆
港女假結婚俾人呃
現年二十歲的晴晴（化名）搵爆哥訴苦，今年一月尾因碌爆卡數，為還錢竟鋌而走險，去網上應徵假結婚，又被「中介人」安排獨自返上內地簽字，原本講好酬勞八萬，結果收得一萬就被人走數。最慘係假結婚對象同中介人愛理不理，現懷有五個月身孕與香港男友有結婚打算嘅佢，都唔知點算，又未知自己是否真能如期在三年後離婚回復單身，坦言很徬徨，甚至後悔。晴晴表示，若於明年年初仍未能收足全數，她不介意報警「一鑊熟」！
今年一月中，晴晴在 facebook招聘討論區中，發現一個帖子寫道：「可搵快錢，數天八萬。」之後佢按假婚集團指示到尖沙咀婚姻註冊處拿取宣誓紙，同日再帶去旺角一律師樓簽署一份相信是「寡婆證」嘅文件。之後又隻身被假婚集團帶返福建福清一條鄉村，與內地男子鄭×平假結婚。「內地結婚官好 hea，完全無問我哋感情狀況等問題，即刻就批，假老公取得雙程證後就來港做黑工。」
回港後，晴晴僅獲得一萬元報酬。追數之下，假老公同中介人李輝都互相推卸，都話俾咗錢，最後仲避開佢。晴晴㷫起上來打算去報警，爆哥提醒她可能一同被檢控，佢就話無所謂，最多大家攬住一鑊熟，反正男朋友已知。
為咗貪幾萬蚊，搞到俾人呃又變成已婚婦，最慘係收唔到錢又離唔到婚，呢鋪真係捉蟲乜乜乜囉。
差人做雞腳黑契仔
爆哥早排約咗朋友去沙田明星海鮮舫食飯，去到門口等人時，竟然見到一大班和勝和大佬，包括元老雞腳黑、前坐館薯仔同現任坐館沙田 Me到場。佢哋入咗地下一間貴賓房，唔通又有喜慶宴會？之後爆哥撞到一個相識嘅勝和古惑仔，即刻問佢邊個請飲，佢話係雞腳黑。咦，雞腳黑早前先擺咗壽宴，又擺咩酒呢？爆哥繼續八卦追問，個古惑仔好似想講又唔敢講咁，仲急急腳走人，話下次再傾。
咁神秘，肯定堅有嘢喎。江湖好快傳出消息，原來當晚確係雞腳黑設宴，事關佢收契仔，所以擺咗幾圍慶祝吓。收契仔使乜咁神秘呀？原來佢個契仔身份好神秘，係一名現役差人，所以餐上契宴都好低調，只係擺幾圍，請圍內人食餐飯就算。朋友話，六十年代好多差人和黑幫大佬上契，但估唔到呢個年代一樣有。
非洲妹殺入廟街
愈夜愈旺嘅廟街，呢排好似特別熱鬧，多咗好多麻甩佬落去睇女。而呢班睇肉家，多數集中喺甘肅街牌坊嗰度，個個企晒喺度吹水，好似有金執咁。爆哥真係唔明，廟街來來去去都係北嫂大媽，有乜好睇呀，天氣咁熱，返屋企歎冷氣好過喇！
原來有新嘢，有人同爆哥爆料，呢排之所以咁多淫蟲湧到廟街，原來嚟咗班越洋「來路貨」。大約一個月前，有四、五個非洲妹殺入老廟企街。黑皮膚，令到一班玩開國產北嫂嘅重口味淫蟲充滿新鮮感，肉金比起北嫂只係貴五十至一百，所以唔少淫蟲都本住「人一世、物一世」嘅心態幫襯，雖然呢班非洲大嫂個個都起碼一百五十磅以上，好有壓逼感，但都好旺場。朋友仲好抵死咁話，由於呢班非洲妹多數夜晚先出現，而且所企位置多數喺暗角，所以一定要留心先睇到。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|
