0靚模一定讀唔到書？唔係。絕對唔係。擁有34C驕人身材、今年亦有份出寫真嘅港產0靚模Elise(陶嘉莹)，就係一個例外。
仲記唔記得邊個Donut成員Elise？被形容為「翻版蔡少芬」嗰個呢，中文名叫陶嘉莹，今年20歲。佢對上一次見報，已經係一年前嘅事，係喇，又係7月，書展呀嘛！
今年Elise又係聯同Donut一齊出寫真，書名叫《回家‧愛》，性感寫真，有三點式，仲有sexy純純兔look；其實今年Elise除咗書展關佢事之外，仲有DSE放榜。就讀九龍塘陳樹渠紀念中學嘅Elise，報考六科，包括中文、英文、數學、通識會計及財務概論，仲有經濟。成績係——34分！而且，今年佢係以重考生身份應試，考到如此佳績，全憑個人努力堅持不放棄。
今日《蘋果》同埋Elise一齊返學校拎成績單，一收到當下自然開心跳起Yeah，佢話:「依家best 5有30分，總分有34分，穩陣入到我最想入嘅學系，所以都好開心。」考得最好係通識，攞咗5星星；另外有三科都攞咗三個5星，分別係中文、經濟同會計；最唔滿意係英文同數學，英文攞咗4，數學攞咗level 5:「比自己預期低咗。」
其實今年Elise係重考0架，上年佢best 5考得23分，自言分數比自己預期低好多分，而且亦覺得自己唔係發揮得最好，「重讀嘅話就係一個新嘅機會，畀我有更多時間準備，努力番，去考一個更好分數。」噚晚Elise都好緊張，不斷安慰自己，又係咁上高登，睇番其他人係點樣度過噚晚，「其實都瞓得著嘅，但係咁碌嚟碌去，到今朝六點就起咗身準備返嚟學校攞成績單喇。」
Elise依家得到咁好成績，當然鬆晒啦。之前Elise表示好想入港大法律系，咁依家得到呢個咁好成績，是否增加達成夢想機會？Elise話:「因為我今年係第二次考，所以想保守啲穩陣啲。我都同屋企人商量過，如果學士讀法律系的話，出路係會有風險啲，所以屋企人都建議我讀番BBA金融嗰啲。讀完書出嚟做番幾年嘢，儲啲錢，之後再進修上去，因為個課程都幾貴。」Elise表示，佢嘅最終夢想，都係做律師，由小學已經係，所以無論點都好，都一定會堅持落去!
| (攝影：陳俊強) |  攞咗成績，即開心到跳起! |  |
 |  |  |
 覺得Elise越嚟越似蔡少芬! |  |  |
|
鍾意就快D Share啦！
|
|
|
