雖然有比堅尼索女氹氹轉，但克勤卻表現避忌，全程目不斜視。
探熱針
沙灘家庭樂 李克勤見索女即閃
九月將與容祖兒在紅館舉行演唱會的李克勤，排練在即撞正兩個寶貝仔放暑假，廿四孝老豆唧出空檔，安排家庭樂。在三十三度高溫下，克勤同老婆盧淑儀帶埋兩個仔，一家四口到淺水灣沙灘進行下水禮，陪太子玩沙，兩公婆全程無落水，著住 T恤短褲的克勤，臨走時同兩個仔去沖身，見有比堅尼索女行過，馬上低頭目不斜視，急急腳閃人。
做足防曬
反應好！同容祖兒的紅館騷已加到十一場，李克勤亦開始全天候備戰，日日開會傾內容，又要分身為《左麟右李》的國內巡迴做準備；不過點忙都好，一定預留時間給家人。
上週二（七月七日）下午三時，克勤孖住老婆盧淑儀，帶埋兩個仔到淺水灣同陽光玩遊戲。習慣到泳池游水的克勤，去沙灘只為兩個仔可以玩沙。
三十三度天氣又翳又熱，兩公婆揀到樹蔭下坐，克勤著住 T恤短褲，老婆盧淑儀更加用太陽帽遮住大半塊面，完全冇落水打算，至於兩個小朋友亦戴住太陽帽，又在頸位加毛巾，慎防被猛烈陽光曬傷。
今年七歲的 Ryan，攞住膠桶膠鏟一支箭走到海邊玩沙，媽咪就拖住細仔 Rex跟後，盧淑儀彎低身同細仔玩水，乖巧的 Rex有樣學樣，兩母子玩到濕晒身。
玩完水，盧淑儀行返去樹蔭底陪老公， Rex就跟實哥哥砌沙堆，兩兄弟跑來跑去，玩得非常開心。
放電兩小時，兩公婆開始收拾行裝打道回府，一聽見媽咪叫， Ryan同 Rex便乖乖跑回父母身邊，完全無扭計，好家教！
唔敢望索女
由於 Ryan玩到全身汗又黐滿沙，兩公婆於是帶他到更衣室外露天花灑沖身。盧淑儀幫 Ryan沖身，克勤就熟練地將沙灘墊拉開變成臨時屏風，遮住 Ryan的身體。
其間，不停有比堅尼索女出出入入更衣室，戴住 cap帽太陽眼鏡的克勤，一直耷低頭目不斜視，等到 Ryan換好衫，第一時間鬆人。
打風睇戲
沙灘家庭樂後兩日，打風放假，下午四時多，去數碼港睇《迷你兵團》，未夠鐘，克勤先陪兩個仔到麥記食薯條，原來當日克勤兩公婆約了 Ryan的同學仔及家長，一齊睇戲聯誼。
要準備演唱會，又要 keep住兒子的朋友圈，克勤分身不暇。
|
鍾意就快D Share啦！
|
|
|
